Skip to content
BibleKenya

Alkitab Bahasa Wondama

Lukasi 21

Pisom nana inar vevaro pi pai

(Mrk. 12:41-44)

Nana Syen nie Anio pai, Yesus siejo kaiwasa vesamuai pi vepau pasia sengge sene pipi pasi susa aiku vetini pisom pai. Siejo inar vevaro pi pai esi kota, diono pipi tembaga katu mo pa muandu. Avori Yesus kievo e diojo, “Vevata mo itopa maso mia, inar vevaro pi nei ma dionae rawai to pau nana esi pasia vura. Aso sia vura setono pi som katu vea nana pi sesamuai to rawai pa. Vape inar ninei, i ma viero pi, vape diono pi venana pasi vura. Pipi pa sandu ma nari dimbori pisia so i pana.”

Yesus kievavo nanapi Anio Syen pai nari mierura pa

(Mat. 24:1-14; Mrk. 13:1-13)

Nana pa siniotu pa sembe toi senggavo nana Anio Syen pai, e senggavo usara Anio jani so semarandini tutir rovuki viatate, e tutir pisom saserai vura maso Allah, apa Yesus kievo maso sia e diojo, “Nari raria pesi mamo, pi mesajora nine si vura, nari sitabari; Apavo rovuki vena anio jasi, sa sivata sasani na uta sinana pa ea va!”

Yesus kievo nanapi nie verausari pasia nari sesamuai marior

(Mat. 24:3-14; Mrk. 13:3-13)

Setuta maso Yesus e setojo, “Jai Guru, tuopa maso ama. Raria toni nari Anio Syen pai mierura pa? Vava vitopi nari vieruana pa, ave amanduina toapa raria pai miesi mamo pi jasi vura nari vediadi?” Yesus kievo e diojo, “Metarama, ave setawi vavera mia vape moja. Aso siniotu pa sepau nari sendama e senggor sano ne e setojo, ‘Raja Vekor Vesie pa Ja nine, e nari raria vemanau pai dieriasi to manau.’ Vape menda usara sia va. E masisi metadiawa kavo nanapi marova pai e variriwi pai mamo, mematai kota vape moja. Aso tindija mamo jasi vura ma nari siveruana papori, vape raria vemanau pai ma aja piva rami.” Avori Yesus kievo riwanea e diojo, “Kaiwasa pesi nari biatai vie marova tutiri kaiwasa pa esia e kerajaan pesi nari vie marova tutiri kerajaan pa esi. Mundija pimasa pasi nari vie diadi na uta pa pau, e nari pota wamuavu tutir vavisi pa simu, e nari pi vio mataiti pasi tutir pi vio tandori pasi sive diadi nana rora wa. Vape jasi vura aja si veruana varami mamo, nari setapu mia e sendora mia. Mia ma nari siwi mia so anio ari agama Yahudi pasi, e setono mia e mesua na bui pa raropa, E nari senggor mia maso aropo raja ma veveru pasia, aso menda usara Ja pa. Vava jana nari ono kasau maso mia ave metopanusara Kavo Vesie nana Allah maso sia. Aso toapa jana nari mesanemi vavera va, so vitopi nari menggavo voria mia na pa. Aso matau Jau nari jono kavo sanepaja ve tindija pai maso mia, ave vio vemu mia pasia senggavo maso mia va, pivai senggavo pau tutir mia va. E mia nari mesiniami e metamami, mendaruomi, ma mene usapui pai e mene maneta pasia nari setono mia kota, ma membe toi ma nari semun mia. Siniotu pasia vura nari senggambarai mia aso menda usara Ja pana. Vape rurandau venana mendumi pa esi kasa niai va. Masisi menggarakuai, nari mesamuai mene tenam pai.”

Nana Yerusalem nari niai pa

(Mat. 24:15-21; Mrk. 13:14-19)

“Masisi mesajo verut pimamuna pasia senda wawariri Yerusalem, nari menduina aso aniose jana woroi va e nari niai. Nana raria jani, kaiwasa venana Yudea pasia nari sembavu ajai so wi wa. Kaiwasa venana aniose raro pasia nari sembavu vurusu aniose pa, e kaiwasa venana aniose vorira pasia kota kasa sesua so aniose raropa va. Aso raria jasi ma, ‘Raria Allah nari siovera kaiwasa nei nie hukuman pai’, ave veruana vitopi ve aivuire to manau nana Repo pai raropa pa. Kariria vesiri maso vavi aja vesanemi vava pasia, pivai vavi vesamuai atuma nana rabua jana pasia! Aso nari marior ve baba maso uta vura e hukuman pai maso kaiwasa ninei. Esia ma nari semun sia tutir pimamuna e esia kota ma nari senggor sia ariri kaiwasa setapu ve womi so uta vevesiei, ma siniotu veruin mojara Allah pasia nari seta patata Yerusalem veito raria Syen diria maso sia pasi simasi.”

Atuma Siniotu pai riama pa

(Mat. 24:29-31; Mrk. 13:24-27)

Nana wor pai, e sembai pai ma siverere pasi nari siveruana vava pasi. Na dunia nei mamo, kaiwasa pa nari sematai e senduini va aso setosa sunu vekuja pai tutir bata vebaba na rawana pai. Kaiwasa pasia nari sematai vesiri aso sesajo vitopi nari veruana na dunia nei vura pa, aso paja venana rora wa nari simanawar. Nana raria jani siniotu pasia nari sesajo Atuma Siniotu pai riama na arepa pasi raropa tutir paja ma sasaar visanggapara ve baba. Masisi vava jasi vura sive diadi mamo, mesobata mia e meposasan mendumi pasi, aso katu esa ea mamo, nari mesamuai vesie pai.

Aniau nana airavo ara pai

(Mat. 24:32-35; Mrk. 13:28-31)

Avori Yesus tiopanusara kavo sora tarawa ninei maso sia, “Mesajo airavo ara pai pivai airavo vitoi vea. Masisi mesajo airavo jasi sive tuba to manau, amamo menduina toapa woroi vae raria pai miesi so biebuo pa. Toapa jana kota, nana raria mesajoro pi borai erine ikavora maso mia pasi sivediadi, apa menduina toapa Allah vie pareta ariri Raja pa dieriaisi to manau. Ikavo maso mia e jojo vevata mo: Pi ninesi nari sivediadi nana siniotu vetenam na raria nine sia, aja semboru vura varami pa. Rora e kakopa nari sinai, vape Ine kavo nei ma nari viata veito woroi-woroi mo.”

Metarama vediora

“Metarama mene tarai pasi, metombei so mei e metunu sua vekarakuai vape moja, pivai metoto mesanemi vei so mene tenam raria vura pasi vape moja, apajoma menduini va so raria vemanau pai ria tandor ma pa. Aso raria jani nari riama via kepana kaiwasa vura na uta nei. Metarama vediora, e membe nadi tawana ave mepaja ma metaisu nana vava vura nari veveruana na aropo Atuma Siniotu pai.” Raria vura nana ari jani Yesus tiopana nie aniau pai nana Anio Syen, e diru mamo ria diena nana suovavo Zaitun e nia na jana. Bera ora kaiwasa vura senda so Anio Syen ave setadiawa Yesus dieniau pai.

Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.