Lukasi 20

Viutan usara paja nana Yesus

(Mat. 21:23-27; Mrk. 11:27-33)

1Nana raria pesi pa, Yesus andia dieniniau e tiopanusara Kavo Vesie nana Allah maso kaiwasa venana Anio Syen pai raro pasia. Apa veveru maso Imam pasia e siniotu veruin sasavu kavo aniau na Torat pasia tutiri veveru nana kaiwasa Yahudi pasia, sendama, 2e senggavo maso Yesus e setojo, “Ite tuopa maso ama, tutiri paja nana topina avori nuenari vava jasi pa, e teini diono paja jasi maso Au pa?” 3Yesus ruar maso sia e diojo, “Ja kota nari jo juta maso mia e metopa maso Jau, 4Teini diemiasa Yohanesi viono kambu masi pai pa, Nana Allah te nana Siniotu e?”

5Avori senggavo vavera na rabua sia so vava jana, e setojo, “Masisi tatojo, ‘Tutiri paja nana Allah mamo,’ I ma nari kievo maso tata e diojo, ‘Metotopi mesanemitiar maso Yohanesi va pa?’ 6Vape masisi tanggavo e tatojo, ‘Tutiri paja nana siniotu,’ amamo kaiwasa vura nari seso tata nana rovuki, aso sesanemitiar toapa Yohanesi ma nabi pesi nina.” 7Avori senduar maso i e setojo, “Ama ma amanduin va, so nana topina kambu masi jana.”

8Apa Yesus kievo maso sia e diojo, “Masisi toapa jana, Ja kota kasa Itopa maso mia va tutiri paja na teinina inanari vava ninesi pa.”

Kavo tarawa nana siniotu ve nanaripi na romi anggur pasia

(Mat. 21:33-46; Mrk. 12:1-12)

9Avori Yesus tiopana kavo sora tarawa ninei maso kaiwasa pasia, “Nana raria pesi pa siniotu pa siri tiana anggur pesi na nie romi pai. Diemiasa siniotu pa sembe toi senanari romi jani tutir arer ave nari sembovo pi romi jani ariri sia, manau pa suvi e ria so uta viaroi e nia na jana to vava woroi. 10Janama raria pai miesi to manau so vio verosu buo anggur jani pa, siniotu vene romi anggur jani diemiasa nie womi pesi, ave senggoro buo anggur sendosu pa rawesi maso i. Vape venanaripi jasia sendora womi jani e setamiasi e vievu tutir vara ve vereri. 11Apa diemiasa womi vevesiei pesi, vape womi jani sendorai kota e sesisiajari, avori setamiasi e vievu tutir vara vevereri. 12Avori diemiasa womi veve toru pai ea. Vape siniotu jani kota sendorai veito vie kapor, avori senggei so vorira wa nana romi jani. 13Apa vene romi anggur jani kievo e diojo, ‘Vitoni nari inanari ea ne? Nari jemiasa ine atuma isanemipaja nei, e ariria nari setatuani!’ 14Vape nana rabua siniotu venanaripi jasia sesajo vene romi jani atu pai pa, setato kavo e setojo, ‘Atuma ninei andi nari siemuai romi jani nana rabua tamani vioru to manau pa. Mendama ave tamuni, ave amamo tasamuai romi ninei.’ 15Apa senggei vorira wa nana romi anggur pai e semuni.”

Avori Yesus kievo e diojo, “Raria ninei siniotu vene romi anggur pai, vitoni nari nienari maso siniotu venanaripi na romi pasia? 16Nari riama e mu siniotu venanaripi na romi pasia, avori diono romi jani maso siniotu vevesiei venanaripi nana.”

Siniotu viadiawa pa, senggavo maso Yesus e setojo, “Moja vesiri!”

17Yesus siejo raso sia avori kievo e diojo, “Masisi toapa jana, nari toane toi tutiri kavo vevui nana Repo nei.

‘Rovuki, siniotu venanari anio pa senggea pai, vie rovuki retena to manau.’

18Siniotu teini tiau ajai so rovuki jasi, nari piere; e siniotu teini tiere rovuki jani, nari pietata e vie wabu.”

19Avori siniotu veruin sasavu kavo aniau na Torat pasia e veveru nana imam pasia senduina toapa kavo sora tarawa jani ma Yesus kievori maso sia. Apa sesasera ria ave setapu Yesus nana raria jani kota, vape semataiti kaiwasa borai pasia.

Nanapi vevaiti pajak maso Kaisar

(Mat. 22:15-22; Mrk. 12:13-17)

20Apa guru agama pasia e veve ru pasia sesajo vedior Yesus, avori sembait siniotu pa sembe toi ave setove siniotu ve tindija ave setamias siniotu jasia setuta maso Yesus ave kievo sasara kavo pesa amamo setapur I, avori setono I maso veveru vepaja nana pareta pai. 21Apa kaiwasa vesamuai vait to manau jasia senggavo maso Yesus e setojo, “Guru, amanduin toapa, nomu aniau ma kavavo pasi vura, sitindija, e bueniniau Allah nie majar pai to tindija, aso au ma biri siniotu va. 22Toapa jana ite tuopa maso ama, apa ariri tane pareta agama pasi nei mamo, diadi so amambait pajak maso Kaisar te piva e?”

23Vape Yesus ruini sene sanepaja vekariria jasi, apa kievo maso sia, 24“Metoisara maso Jau pipi dinar pa siri. Wainunu e sano venana pai ma teinina?” Janama senduar maso Yesus e setojo,

“Kaisar!”

25Avori Yesus kievo maso sia e diojo, “Toapa jana, pi vitopi Kaisar pai nieu mamo metono maso Kaisar, pi vitopi Allah nieu mamo metona maso Allah!” 26Sesamuai sasara pa esa va kota nana kavo Yesus kievora pasi. Apa setandor to sepeja vea so ruar pa.

Siniotu Saduki pa setutan nana sobata pai

(Mat. 22:23-33; Mrk. 12:18-27)

27Apa siniotu Saduki pa esia, sendama so Yesus, sia ma senggorusara toapa siniotu vevoru pasia kasa sesobata sia va. Setutan maso Yesus e setojo, 28“Guru, Musai vui pareta ninesi so tata: Masisi mua pesi vioru e vinie pai andija tienam rami e siemuai atuma va mamo, neta katu pai riaut inar pai ave viara usapui so neta vava vevoru to manau pai. 29Mambe raruo pa sembe rim e muandu. Mua retena pai ririau, avori vioru e disamuai atuma va. 30Avori veve muandu pai riaut inar pai, vape vioru kota e disamuai atuma va. 31Vava vemasi vaveri kota tere maso neta veve toru pai rama so veve rim e muandu pai. 32Vepui vavi jani vioru kota. 33Apavo nana raria vevoru pasia sebata sia wa mamo, nari vavi nei teini vie sawa maso i na raria sobata pai? Aso membeneta rim e muandu nine sia sendauti to manau.”

34Yesus ruar maso sia e diojo, “Kaiwasa vetenam na rabua ninei ma sendiriau, 35vape teisia sesamuai sano na sobata na kasau rabua vevoru pasia to manau, e setenam na raria nari verama wai sia ma sendiriau va. 36Aso sia ma nari semboru ea va; semasi tutiri siniotu rora e sia ma atuma Allah, aso sesobata sia sovera to manau nana voru pai. 37Musai matauni tiopa sasara toapa siniotu vevoru pa nari sesobata sia sovera ea. Nana nie aivuire nana samue veveviar pasi, diapa Syen andina ‘Allah Abrahami, Allah Isaki ma Allah Yakopi.’ 38I ma Allah siniotu vevoru va! Vape Allah maso siniotu ve tenam. Aso na aropo Allah, siniotu vura setenam.”

39Siniotu veruin sasavu kavo aniau na Torat pa sembe toi senggavo e setojo, “Guru, nomu kavo ruara pasi sive vata vesiri.” 40Toapa jana sematai setuta piesa ea maso Yesus.

Nanapi Raja Vekor Vesie pai

(Mat. 22:41-46; Mrk. 12:35-37)

41Yesus duta maso sia e diojo, “Aso vitopi kaiwasa pa setojo, Raja Vekor Vesie pai ma usapui nana Dauti? 42Aso Dauti matauni kievo nana surat Mazmur pai,

‘Syen Allah kievo maso ine Syen pai:

Muesoi na rawa vata ne

43veito jonae siniotu vio vemun Au pasia

setatuan maso Au.’

44Apavo masisi Dauti siau Raja Vekor Vesie pai ve ‘Syen’, apavo I ma usapui Dauti nari toane?”

Yesus diono kavo sanepaja ave setarama vedior sia maso siniotu veruin sasavu kavo aniau na Torat pasia

(Mat. 23:1-36; Mrk. 12:38-40; Luk. 11:37-54)

45Aja kaiwasa borai pa setadiawa, Yesus kievo maso verausari pasia e diojo, 46Metarama vedior mia maso siniotu veruin sasavu kavo aniau na Torat pasia. Sia ma sesanemi vesie senda vavera e sesasun sia nana sasu viaroi, e sesanemi vesie esi pasia setatuan sia nana uta vevovo pi wasi e sesanemi vesie semasoi na dopo anio ari agama Yahudi e na uta mei. 47Setawi vaveri inar pasia e setawara sene pi vepau pasi. E setitupu vava kariria senanari pasi, sembe nadi viaririoisi ave siniotu pa setojo sia ma siniotu viate siana. Nari Allah diono hukum ve marabat vesiri maso sia!