Skip to content
BibleKenya

Alkitab Bahasa Wondama

Lukasi 19

Yesus tutir Zakheus

Nana rabua Yesus ria so Yerikho pa, ria rawai aniose baba jana. Na aniose baba jana siniotu veveru na vesau pajak pesi, i ma siemuai pi vepau. Sano pa Zakheus. Dio sasera ave siejo Yesus, vape diadi va aso siniotu pasia sepau, e i ma tienambukari vesiri. Apa diepai rawai kaiwasa pasia papo, avori sia na airavo ara pai, ave siejo Yesus, aso nari ria nana jana ma. Na jana Yesus ria maso uta jana e siejor ajai avori kievo e diojo, “Zakheus vuar saira! Aso raria ninei nari jo iramatu jena na nomu anio pai.” Zakheus sawawara e viar vedior Yesus na nie anio pai tutir sane pa vesasie. Siniotu vesajo vava jasia vura setamuaus e setojo, “Yeh! Dio ria diena na siniotu veve tatar wai nie anio pai!” Avori nana anio pa, Zakheus diosa e kievo maso Yesus e diojo, “Syen, ine pi vepau ne rawesi ma nari jonasi maso siniotu vevaro pi pasia, e teinina vea, jawi to manau, e ikor nie pi pa siri mamo, nari ivait sovera so i ve at riwanea!” Avori Yesus kievo e diojo, “Nana raria ninei au tutir nomu anio raropa vura, mesamuai vesie pai vurusu kariria na Allah e ditono tenam vavoru, aso au kota ma vue usapui nana Abrahami. Atuma Siniotu pai riama ve siesera ma kior vesie maso siniotu venai nana kariria pasia.”

Kavo tarawa nana pipi emas

(Mat. 25:14-30)

Siniotu pasia aja setadiawa Yesus kievo rami, tiopana kavo sora tarawa pesi. Aso nana raria jani ma riama dieriasi Yerusalem, e siniotu pa semamo ma setojo Allah sawawara e riama ve nari vie pareta ariri Raja na dunia ninei. Yesus kievo e diojo, “Siniotu veve baba pesi, ria so uta viaroi ave seposasani e vie raja, avori sioverai maso nie uta pa. Aja ria varami, siau nie womi pa sembe sura, avori diono pipi barawa pa sura maso sia, womi pasia sesamuaisi ve siri-siri. Avori kievo maso sia e diojo, ‘Pipi ninesi ma membori pi e membova veito itavera ea ma.’ Vape kaiwasa vena uta jasia semadidi. Apa ria to manau pa, setamiasa siniotu pesi ave ria tiopa, ‘Ama ma amanggambarai siniotu ninei vie raja maso ama.’ Vape siniotu pai seposasani e vie raja, avori sioverai maso nie uta pa. Sawawara e siau nie womi pasia e sendama, ave ruin ariri pipi sesamuai pa toi to manau. Womi retena pai riama kievo e diojo, ‘Tuani pipi emas siri buono jani, jevajani pa isamuai sura to manau.’ Tuan jani kievo e diojo, ‘Nomu nanaripi pa vesie vesiri, au ma womi viate ni au! Aso nana vava ve madidia mamo au ma suemuai sanetiar, nari iposasan au e vue ru so aniose baba pa sura.’ Womi veve muandu pai riama kievo e diojo, ‘Tuani, pipi emas siri buono jani, jevajani pa isamuai pipi pa rim to manau.’ Raja pai kievo maso womi jani e diojo, ‘Nari vue ru maso aniose ve baba pa rim.’ Womi vevesiei pesi riama kievo e diojo, ‘Tuani nomu pipi emas pai nine; iruani nana sisi sope pina e ipiri ariri. Ja ma imatai Tuani au, aso Tuani au ma siniotu vemas ni au. Tuani buonggor pi vitopi buoneu va pa, e buonduri pi nana uta tuana pi na va.’ Raja pai kievo maso i e diojo, ‘Au ma womi vekariria ni au! Ariri matau nomu kavo kuevora vediasi apavo nari jono hukuman pai maso au. Au ma ruini ja ma siniotu vemas ni jau: ja ma ikor pi vitopi ineu va pa e iruri pi nana uta itana pi nana va. Masisi toapa jana mamo buotopi buono pipi pai e sunana bank pai va pa? Ave masisi isovera mamo isamuai pipi jani tutir ve rawai pasi.’ Avori raja jani kievo maso kaiwasa viosa na jasia e diojo, ‘Menggor pipi jani vurusui, e metoni maso womi vesamuai pipi emas sura pai.’ Vape kaiwasa pasia senggavo e setojo, ‘Tuani, i ma siemuai pipi pa sura to manau.’ Raja pai ruar e diojo, ‘Vevata mo ikavo maso mia e jojo, teini siemuai to manau pa, nari siemuai to pau rawai. Vape teini siemuai piesa va pa, pi venana pai, nari vekor vurusui. Vape nine ma menggor siniotu vekambarai ive raja pasia e memu sia vura na aropo ne!’”

Yesus suapui so Yerusalem tutir sanandika pa

(Mat. 21:1-9; Mrk. 11:1-10; Yoh. 12:12-15)

Yesus kievoro kavo ninesi vura to manau pa piepo sia e senda sene rara pai so Yerusalem. Nana rabua senda sederiasi Betfage tutir Betania na suovavo Zaitun, diemiasa nie verausari pa sumbe muandu e sunda papo. E Yesus kievo so sandu e diojo, “Munda so aniose vena dopo jana e nana rabua musua nana jana, nari musajo keledai atu pesi senggasiesi. Keledai jani ma aja esi sia nana varami, mundera wai setinggasiesi pai, e munggori ma. Masisi siniotu pesi duta mandu e diojo, ‘Murotopi munderai pa?’ Amamo mutopa e murojo, ‘Syen andi diemias.’” Avori Yesus nie verausari pa sunda, e susamuai ariri vitopi Yesus kievora pa. Na rabua suro sundera keledai atu jani, amana, vene pai kievo maso sandu, “Murotopi mundera keledai pai pa?” Sunduar e surojo, “Syen dio sia nana.” Avori sunggor keledai atu pai maso Yesus. Janama setasie sene sasu pasi na keledai pai vavopa e setonae Yesus siajai. Janama Yesus sia nana keledai jani e ria, apa kaiwasa pa setasie sene sasu pasi na ria pai. Na rabua Yesus vare riama so Yerusalem pa, nana ria veviar maso suovavo Zaitun, kaiwasa verausari pasia vura setumi e sesanandik Allah e setopana vesie maso i aso pitandor sesajora pasi vura. Setumi e setojo, “Berkat pai maso verama ariri Raja nana Syen sano pa, mari ma vesie pai na rora, e sanandika maso Allah na uta vetariai mo!” Siniotu Farisi pa sembe toi nana kaiwasa vepau jasia senggavo maso Yesus, “Jai Guru, buemiasa nomu verausara au pasia ve sepeja.” Yesus ruar e diojo, “Vevata mo itopa maso mia e jojo! Masisi sepeja, amamo rovuki ninesi nari sienanar.”

Yesus siaisi Yerusalem

Nana pa Yesus riama dieriasi so Yerusalem, e siejo aniose jana, apa siaisi. Kievo e diojo, “Kawa iroro, vesie vesiri mamo masisi raria ninei ruini vitoini nari kior mari ma vesie pai maso au pa! Vape nine ma kasa suejoro va. Aso nari raria pai riama toapa ve mun au pasia nari setaur tembok wawari au; senggepa au e seto sawawara au nana samabu pasi vura. Esia ma nari setono kariria maso au tutiri kaiwasa venana pasia vura; e rovuki pa siri kota, kasa viata sasani nana esi pasi va, aso au ma ruini va nanapa raria Allah riama ave kior vesie maso au pa!”

Yesus sua so Anio Syen

(Mat. 21:12-13; Mrk. 11:15-18; Yoh. 2:13-16)

Avori Yesus sua nana Anio Syen pa varavu vorira pa e dietavar vevovopi na jasia, kievo maso sia e diojo, “Nana Repo pai Allah kievo to nine: Ine Anio nei ma anio nadi nina. Vape metoni ariri ve uta siniotu viawara pi pasia setaniwa nana pa!” Raria vura Yesus dieniniau na Anio Syen pai raropa. Imam veveru pasia, e siniotu veruin sasavu kavo aniau na Torat pasia, tutiri veveru na Yahudi pasia seto sesasera ria ave semuni, vape setisamuai ria pesi va ave senanari vava jana, aso kaiwasa vena jasia tawana sesanemi vesie setadiawa Yesus nie kavo pasi.

Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.