Lukasi 18

Kavo tarawa nana inar pesi tutir siniotu vekutu kavo

1Avori Yesus tiopanusara kavo sora tarawa pesi e ditaniau nie verausari pasia ave tawana sembe nadi ma sesanemi sasera vape moja. 2Yesus kievo e diojo, “Nana aniose pesa siniotu vekutu kavo pesi i ma mietai Allah va, e ditatuan siniotu pesi kota va. 3Na bendar jana kota inar pesi tawana ria maso siniotu vekutu kavo pai e siau ave kievo vori. ‘Sanepai jau e kuevo vori jau nanapi siniotu ivaririwi tutira wai.’ 4Woroi pa raria toi, siniotu vekutu kavo ninei kiembarai sanepai inar pai. Vape vepui pa siniotu vekutu kavo ninei sanepai usara e diojo, ‘Imatai Allah va, e itatuan esi kota va, 5vape aso nari inar nei dio vaveri ja tawana vea, apavo vesie rawai pa ikavo vori nana nie kavo variriwi nesi. Masisi piva, amamo nari ria vei tawana ma veito nari diono vava vekariria so jau.’”

6Avori Syen kievo e diojo, “Mesanemipai to vesie vitosi siniotu vekutu kavo vetindija va nei kievora si pa! 7Aso nari Allah ma kasa diadi so kievo vori matauni Nie usapui viananar so I na diru ma sasaar pasia va e? Apavo nari titu raria so sanepai sia e? 8Vevata mo, ikavo maso mia e jojo: Nari sawawara vea kievo vori siana sene kavo variriwi pasi! Vape masisi Atuma Siniotu pai riama, nari siemuai siniotu vesanemitiar maso i pesi na uta nei.”

Kavo tarawa nanapi siniotu Farisi tutir siniotu vesau pajak

9Yesus tiopanusara kavo sora tarawa ninei kota maso siniotu ve disatuiri maso siniotu viojo vetindija rawai siniotu vevesiei pasia, ma sanetiar matauni ma diete. 10Yesus kievo e diojo, “Siniotu pa sumbe muandu sunda so Anio Syen pai ave sumbe nadi. Esi pai ma siniotu Farisi nina, mae esi pai ma siniotu vesau pajak nina. 11Siniotu Farisi pai ma diosa e vie nadi nana sane raro pa e diojo, ‘Allah, isanandiki Au, aso ja ma imasisi siniotu esi pasia va, vionggariria e vepanawar pi ma venanari kavo vavi va. Isanandiki aso ja ma imasisi siniotu vera e vesau pajak jani va. 12Ja ma jeriori ve muandu na ari pa siri, e vait sura nana pi ine isamuai pasi vura jonasi ve pi som maso Au.’ 13Vape siniotu vesau pajak pai diosae vie kasau e piaja va so siejo ajai so rora wa. E dupis aropa e kievo e diojo, ‘Allah, sanepai siniotu veve tatar ne, jau!’”

14Vevata mo, ikavo maso mia e jojo, “Nana raria sumbavu so sune anio wa pa, siniotu vera e vesau pajak pai andi Allah diojo tindija, e siniotu Farisi pai ma pi va. Aso siniotu teini dio tieriai pa nari nia dou, vape siniotu teini dio niana dou pa, nari niana vavo.”

Yesus vie berkat atuma pasia

(Mat. 19:13-15; Mrk. 10:13-16)

15Siniotu pesia senggor sene atuma katu pasia so Yesus ave dieka rut sia e vie berkati sia. Vape Yesus nie verausari pasia senggasiou siniotu jasia. 16Vape Yesus siau atuma pasia siejo vava jana pa, avori kievo maso nie verausari pasia e diojo, “Metono kasau ave sendama so jau! Metarandu sia vape moja, aso siniotu vetoapa nine sia nari sembe kaiwasa nana uta Allah vie pareta ariri Raja nanapa. 17Vevata mo, ikavo maso mia e jojo: Teini dieriaisi tutiri Allah va ariri atuma katu ninei, kasa vie usapui nana Allah va.”

Siniotu vesamuai pi vepau pesi

(Mat. 19:16-30; Mrk. 10:17-31)

18Siniotu veveru nana Yahudi pesi duta maso Yesus e diojo, “Guru viate panau, ja ma nari inanari vitoi ave isamuai tenam to woroi-woroi pai?”

19Yesus dutani e diojo, “Aso vitoni kuevo e buojo jete pa?” “Varo siniotu viate, vape Allah miesari vea. 20Ruini Allah nie pareta pai to manau: ‘Nuenari kavo vavi vape moja, mu siniotu vape moja, buemanana pi vape moja, topanusara kavo viawia vape moja, tuetuana tamamui e siniamui sandu.’”

21Siniotu jani kievo e diojo, “Jai Guru, pareta jasi vura ma ira aririasi to manau nana rabua ivavoru pa.”

22Yesus dieduata siniotu jani tutiri sanepai, kievo maso i e diojo, “Vava pa siri ea andi aja nuenari varami. Vuevu e vuovo nomu pi pasi vura; buono pipi pasi so siniotu vevaro pi pasia e nari suemuai pi na rora wa. Manau mamo ruama rua usara Yau.” 23Vape na rabua siniotu pai diediawa pa, sane pa kariria aso siemuai pi vepau vesiri.

24Yesus dieduata siniotu nei sane pa kariria pa, toapa jana kievo e diojo, “Marabat vesiri so siniotu vesamuai pi vepau sua nana uta Allah vie pareta ariri Raja pa! 25Tapisa rawai maso unta pesi sua nana ret nie kamberei pesi nana siniotu vesamuai pi vepau pesi sua nana uta Allah vie pareta ariri Raja pa.”

26Siniotu viadiawa Yesus kievo toapa jana pasia setutani e setojo, “Masisi tojana mamo, teini nari diadi so siemuai vesie pai?”

27Yesus kievo e diojo, “Maso siniotu pai ma sa diadi va, vape maso Allah ma diadi!”

28Avori Petrusi kievo e diojo, “Suejo! Amambavuru amane anio raropa to manau ave amanda usara Au.”

29Yesus kievo e diojo, “Vevata mo ikavo maso mia, siniotu vevavu vurusu vene anio to manau pai, pivai vinie pai, pivai raruo pai pivai tamani siniani sandu pivai atu pasia aso ria usara Allah pana, 30siniotu jani ma nari siemuai sovera pa rawai nana rabua nine kota, nana raria verama wasi mamo nari siemuai tenam viaworoi pai.”

Kievo nanapi Nie voru pai, veve torua pana

(Mat. 20:17-19; Mrk. 10:32-34)

31Yesus ruir nie siniotu sura e muandu verausari pasia mesari, avori kievo e diojo, “Metadiawa! Nine ma tanda so Yerusalem. Na wana, pi vura nabi pasia sembui nanapi Atuma Siniotu pai, nari vediadi pa. 32Nari sesiwia so kaiwasa Yahudi va pasia, e nari sesisiajari, e semadidi, e sengganisui. 33Nari sendasi e semuni, vape nana raria veve toru pai, nari tienam riwanea.”

34Yesus nie kavo kievora pasi vura ma, nie verausari pasia setinduini esa va. Yesus nie kavo kievora jasi sive aniwara maso sia. Apavo setatara kavo vitopi Yesus kievora pa.

Yesus diono panam so siniotu veremi kaber pai

(Mat. 20:29-34; Mrk. 10:46-52)

35Na raria Yesus dieriasi Yerikho pa, siniotu veremi kaber pai miesoi siau pi nana ria derepa. 36Na jana diediawa kaiwasa pa senda tuwa, apa duta sia e diojo, “Avo vito nina?”

37Senggavo maso i e setojo, “Yesus, siniotu Nazaret pai, andi ria tuwa pa,”

38Apa siniotu veremi kaber jani dienanar e diojo, “Yesus, Dauti atu panau, sanepai jau!”

39Apa siniotu vena dopo pasia, senggasiowi e setamiasi ve pieja. Vape siniotu veremi kaber nei dienanar to raupui vebaba ea, “Yesus usapui na Dauti! Sanepai jau!”

40Yesus mienau eta e diemias e senggor siniotu veremi kaber pai maso I. Nana jana riama, Yesus dutani e diojo, 41“Pi vitoni muajar ve inanari so au pa?”

Veremi kaber jani ruar e diojo, “Jai imajar so isajo.”

42Avori Yesus kievo e diojo “Toapa jana mamo, suejo! Aso sanetiar maso Jau, apavo puenam.”

43Na raria jani kota siniotu pai siejo, avori ria usara Yesus e siom sienandik Allah. Na jana kaiwasa vura sesajo vava jana apa sesom, sesanandiki Allah.