Skip to content
BibleKenya

Alkitab Bahasa Wondama

Lukasi 17

Vava veve diajara siniotu sinanari tatar

(Mat. 18:6-7, 21-22; Mrk. 9:42)

Yesus kievo maso nie siniotu verausari pasia e diojo, “Ariri vava veve diajara siniotu sinanari tatar pa, i ma asia tawana. Vape kariria pai maso siniotu veve diajara pai! Vesie rawai rovuki vemarabat pesi kiesie na siniotu jani rao pai, e vekei na rawana pai raro pa, nanapa viediajarae siniotu pesi nana siniotu katu nine sia esi nienari tatar pa. Toapa jana, metarama vediora!

Masisi nomu maneta pai nienari tatar, buono sanepaja maso i. Masisi siovera sane pa nana nie tatar pasi, amamo vie ampun nie tatar pasi. Masisi nienari tatar maso au veito rim e muandu mo na raria pa siri e ria ve rim e muandu kota so au e diojo, ‘Kuesiou jau vape moja,’ amamo vue ampun nie tatar pasi.”

Nana sanetiar ve karakuai

Rasul1 pasia senggavo maso Yesus e setojo, “Syen, buona ve amane sanetiar ne sikarakuai.” Syen ruar e diojo, “Masisi mene sanetiar pai bieba miesisi sawi mor, menggavo maso airavo murbei ninei, ‘Nari tuepati e rua tipu na rawana wa,’ amamo airavo ninei nari kior usara nomu pareta pasi.”

Siniotu venanaripi ariri womi

“Masisi esi na mia siemuai siniotu venanaripi ve womi e vie bajak na romi pivai dierama piaum domba. Masisi womi jani sioverai, nari kievo maso i e diojo, ‘Rua saira ma buapi?’ Sa pivai. Sovera pa nari kievo maso i e diojo, ‘Vue masis ine pisia pasi. Buevavar sasu vevaro rariai e buenota jau nana ane imasoi japi e junu ne; to manau vori janama buapi.’ Ariri mo, mia ma kasa mesanandiki womi jani va, aso nienari ariri nie tuan pai nie pareta pai to manau. Toapa jana kota maso mia. Masis menanari ariri Allah nie pareta diona pasi vura maso mia to manau, metojo, ‘Ama ma amambe womi vea; ama nanaripi ariri vitosi amananaripi pasi.’”

Yesus diono panam maso siniotu pa sembe sura

Nana Yesus nie rara vera so Yerusalem pai pa, ria tu uta veve wata na Samaria e Galilea. Nana pa sua so aniose pesa, siniotu veter pota pado2 pa sembe sura sendama maso Yesus. Vape setosa vekasau e setananar e setojo, “Yesus! Guru! Sanepai ama!”

Yesus siejora so sia, kievo e diojo, “Menda so imam pasia e mesau ve sesajoro mene tarai pasi.”

Na rabua senda pa, sene pota pasi sinai.3 Janama siniotu pa siri na sia ruini pienam na nie pota pai to manau, siovera so Yesus e tutir raupui vebaba sienandik Allah. Avori riama disana aebu pasi na Yesus aropo pa e sienandik Yesus. Siniotu jani ma siniotu Samaria nina. Janama Yesus kievo maso i e diojo, “Josa siniotu pa membe sura mia mesamuai panam mana? Veve rim e at pasia ma senana topina ea? Aso vitopi siniotu vevesiei ninei vea andi sioverai ma tiopan sanandika maso Allah pa?” Avori Yesus kievo so siniotu pai e diojo, “Buatau, e rua. Aso au ma sanetiar maso Jau, apavo puenam to manau na nomu pota pai.”

Raria Allah riama vie pareta pa

(Mat. 24:23-28, 37-41)

Siniotu Farisi pesia setutana Yesusi e setojo, raria toni Allah riama vie pareta ariri Raja pa. Yesusi ruar e diojo, “Allah vie pareta ariri Raja pa ma, sa vieva tutiri pi veve ruana e siniotu sisajori va, veito kaiwasa pa setinggavo va, ‘Menda ma mesajo, andi nine!’ pivai, ‘Andi wana!’ Aso Allah vie pareta ariri raja to manau na rabua mia.”

Manau na jana pa Yesus kievo so nie verausari pasia e diojo, “Nari raria pai riama mamo, mesanemi vesie mesajoro raria pa siri vea nana raria vura na Atuma Siniotu pai nari vie pareta pa, vape mia vura kasa mesajori va. Nari kaiwasa pa setopa so mia e setojo, ‘Mesajo andi nia jana,’ pivai, ‘Mesajo andi nine!’ Vape mia vura mesuvi e mesaserai vape moja. Aso masisi verevera vepot na rora wa e veveviar pai nie visambiara pai na sopesi wa raso sopesi wa, toapa jana kota nari vava veveruana na raria Atuma Siniotu pai nari riama pa. Vape aja veruana varami nari siemuai marior vepau, ma kaiwasa nana rabua nine pasia setawa irari. Nana raria Atuma Siniotu pai nari vie ruana pa, vava pa masi vaveri nana rabua Noak papopa. Kaiwasa pa setapi, setunu, e sendiriau; toapa jana vei vea veito Noak sua so wa vebaba pai raropa e diekarija pimasa pai riama mun kaiwasa pai vura. Masi vaveri na rabua Loti kota. Siniotu pa setapi e setunu, sembori pi vavera, setana pi e sembaun anio. Vape na raria Loti suvi nana Sodom pa mamo, na raria jani Allah viara rama robuki adia pai masisi rama pimasa na rora wa e mieiri sia vura. Toapa jana vava nari ariri na raria Atuma Siniotu pai vie ruana pa.

Na raria jani teini niana nie anio babua pai mamo kasa viar e sua so anio pai raro pa ave kior piesasi vape moja, Toapana kota siniotu pesi romi wa, siovera so nie anio pai vape moja. Mesanemipai so vitopi vediadi to manau maso Loti vinie pai pa! Teini diosasera ve vesie so nie tenam pai, nari nie tenam pai niai. Vape teini nie tenam pai niai, mamo nari siemuai tenam viaworoi pai. Itopa so mia e jojo: Nana diru jani, siniotu pa sumbe muandu sandua surena nana andiau pa siri, nari senggoro esi pai e esi pai kota sembavuri. Vavi pa sandu sututa gandum, nari senggor esi pai e sembavuru esi pai. [ Siniotu pa sumbe muandu sandua sunanaripi na romi, esi pai nari senggori ma esi pai ma sembavuri.]”

Yesus Nie verausari pasia setutani e setojo, “Syen, vava jani nari vediadi na topina?”

Yesus ruar e diojo, “Pi vevoru pesi niana topina vea, aja vian pi vevoru pasi asija sinana jana kota.”4

Source notes (4)
  1. Footnote Rasul Yesus nie siniotu diria, e diemiasa vera e vetopana nie kavo aniau pai.
  2. Footnote veter pota pado: Pota viomadidi apavo vetere pota nine sia ma setonae sesua so ari va, e setonae semasoi ve kasau.
  3. Footnote Yesus sane vesie dio panam so sia, toapa jana diemiasa sia so imam pasia, ave sesajo sia e senduin ariri sepanam to manau pa.
  4. Footnote Sora tarawa nine ma vieruana sanepaja pa muandu, retena pai, raria Yesus riama pa ma kior sasaar maso kaiwasa vura: kasa riama ve aniwa va, vape kaiwasa nari sesajo e senduin vava jana, veve muandu nanapa Atuma Siniotu pai raria riama pa, kaiwasa vevoru na vava wainunu pai nari sesamuai hukuman.

Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.