Alkitab Bahasa Wondama
Lukasi 16
Kavo tarawa nanapi siniotu veru pipi, vetindija va
Yesus kievo maso nie verausari pasia e diojo, “Siniotu vene pi vepau pesi, siemuai siniotu veru pipi viono ariri nie pi vepau pasi. Siniotu vene pi vepau jani diediawa kavo, toapa nie siniotu veru pipi pai miemeiri nie pipi pasi. Avori siau nie siniotu veru pipi pai, e kievo so i e diojo, ‘Vitopi jediawa nana au pa? Raria ninei, buono kavo vetindija maso jau nana nomu nanaripi na ine pi vepau pasi. Au ma kasa nuenaripi ve veru pipi ea va.’ Apa siniotu veru pipi jani sane pai usara, ‘Vitopi nari inanari na raria ninei pa? Ine Tuan nei dio dionae imanau na ine nanaripi nei. Ipera kakopa nei ma, ipa va; kota imamaja isau pi. Isamuai ria to manau, apavo masisi imanau to manau, ave amamo isasera maneta pesia ave senggor jau so sene anio wa so raria verama wasi!’ Ave isamuai ine maneta pasia senanari to nine, avori siniotu veru pipi jani, siau siniotu veve niaki na nie tuan pai siri-siri. Maso siniotu retena pai, kievo so i e diojo, ‘Nomu niaki pa toi na ine tuan wai?’ Siniotu jani ruar e diojo, ‘Sari zaitun pa, kabesu pa utin siri.’ Siniotu veru pipi pai kievo maso i diojo, ‘Surat niaki pai nine. Muesoi e sawawara vui surat niaki vavoru pa: siniotu muandu e sura.’ Avori kievo maso siniotu veve muandu pai e diojo, ‘E manetai buone niaki pa toi?’ Siniotu jani ruar e diojo, ‘Gandum pa karung siaran siri.’ Siniotu veru pipi pai kievo e diojo, ‘Nomu surat niaki pai nine. Vui: utin rim e toru.’ Apa tuan pai kievo sanandiki nie siniotu veru pipi vetindija va pai, aso nie vava nienari pa vesie; aso kaiwasa verausara sanepaja dunia nei sia ma senduini sepir ariri sene vava vesie rawai nana siniotu vetenam nanapi sasaar.”
Avori Yesus kievo riwanea e diojo, “Metadiawa! Menggor pi vepau vena dunia nei ave metisasera maneta, ave masis pi vepau venana dunia nei sive diadi va, amamo ine maneta pa mia nari senggor mia so uta masasoi na woroi-woroi pai. Masisi siniotu vesamuai sanetiar nana pi vava madidia, siemuai sanetiar kota nana pi vava vebaba. Vape siniotu vevaro sanetiar nana vava pi madidia, viero sanetiar kota nana vava ve baba. Apavo, masisi membaro sanetiar maso pi vepau na dunia nei to manau, nari teini dio sanetiar mia so pi vepau vena rora wasi? E masisi mia varo sanetiar maso mia na pi vepau siniotu vevesiei seneu, teini nari diono maso au pi vitopi nari nomu pa?
Womi pesi sa piaja nienari pi so tuan pa muandu va, aso nari sane pai esi pai rawai nana esi pai, pivai nari kior usara esi pai rawai nana esi pai. Toapa jana kota maso mia. Sa menanaripi so Allah ma kota maso pi vepau venana dunia nei va.”
Yesus nie kavavo pasi
(Mat. 11:12-13, 5:31-32; Mrk. 10:11-12)
Siniotu Farisi pasia setadiawa kavo Yesus kievora pasi vura. Avori semari, aso sia ma sesanemi vesie pipi. Vape Yesus kievo maso sia e diojo, “Mia ma na aropo siniotu vevesiei mamo, veruana metojo metindija vesiri, vape Allah ruin mene sanepaja pasi. Aso vitosi siniotu pa siejo tariai pa, vape Allah siejo dou vesiri.
Allah nie hukum Torat Musai diona pasi e, nabi pa sene aniau pasi, asia sivata e sive topanusara veito rabua Yohanesi viono kambu masi pai. Manau na jana, Kavo Vesie na Allah setitopan usara nari vie pareta ariri Raja pa. E siniotu pa seto sasera ave sesua e sembe usapui nana Allah. Rora e kakopa nei diadi sunai, vape kavo pa siri na Allah nie hukum Torat pai ma kasa niai va .
Teini kiembarai vinie pai avori ririau tutiri vavi vevesiei pesi mamo, siniotu jani nienari kavo vavi. E siniotu veraut vavi vesawami kiembarai wai, amamo i ma nienari kavo tutir vavi jani kota.”
Siniotu vesamuai pi vepau pa esi tutir Lazarus
Yesus kievo riwanea e diojo “Siniotu vesamuai pi vepau pesi. Nie sasu pasi ma sietate, senanarisi nana sis vemanis, e tienam na sane vesie tutir pi vepau na raria vura. Na nie rature anio pa repo pa sepiri siniotu vesau pi pesi, sano pa Lazarusi. Nie tarai pai dionu nana kapor matabo. Lazarusi vievisi pa dio dian pisia tamua vetau nana dora siniotu vesamuai pi vepau jani. Esa mamo veito wona pasi sirama sirep nie kapor pasi.
Janama siniotu vevaro pi jani vioru, avori siniotu rora pasia senggori viata siwar Abrahami na rora wa. Siniotu vesamuai pi vepau jani kota vioru, e sepiri na kamberei papi pa raropa. Na uta adia vevoru moja va pai, siniotu vesamuai pi vepau jani siemuai marior vesiri. E nana raria siejor ajai, siejo Abrahami na ve kasau, e Lazarus miesoi siwar Abrahami. Avori siniotu vesamuai pi vepau jani dienanar e diojo, ‘Jai, Abrahami! Sanepai jau. Buemiasa Lazarus ve siow varakia pai na kambu pa raropa, ave dionae vavasa tapare nei aso imarior vesiri na adia ne raro ne!’
Vape Abrahami kievo e diojo, ‘Sanepaja ine atuma panau: nana raria tuenam pa, suemuai pi borai viate to manau, vape Lazarus ma siemuai vava saserai viate va. Raria ninei Lazarus siemuai sane vesie pai na nine, e au ma suemuai marior vesiri. Esa kota, na kasau ama tutir au kurumi baba pa siri viediora to manau, ave amamo siniotu venana nine sia, diadi so senda matu so jana va, e siniotu venana jasi, diadi so sendama so nine va!’ Siniotu jani kievo e diojo, ‘Toapa jana mamo isau maso au, Jai buemiasi Lazarus e ria so jai nie anio wa. Aso raruo pa sembe rim asia jana. Buemiasa Lazarus diono kavo sanepaja so sia, ave setota e sesua so uta marior ninei raro pa vape moja.’
Vape Abrahami kievo e diojo, ‘Musai nie surat sesamuai pasi tutir nabi pa sene surat pasi to manau; vesie ma nari senda usara vitopi ve aivuire na buku jasi pa!’ Vape siniotu vesamuai pi vepau jani ruar e diojo, ‘Jasi ma simasi va, Jai Abrahami. Vape masi siniotu vevoru pesi tienam ea, e ria maso sia, sia ma nari sesovera sesanemi nana sene tatar pasi.’ Vape Abrahami kievo e diojo, ‘Masisi setadiawa Musai nie pareta pai e nabi pasia va, amamo siniotu vevoru pesi tienam sovera ea, sa sesanemitiar kota va.’”
Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.