Lukasi 15

Kavo tarawa nana domba venai

(Mat. 18:12-14)

1Siniotu vesau pajak pasia tutir siniotu veve tatar pasia, esa mamo sendama so Yesus ave amamo setadiawa nie kavo aniau pasi. 2Avori siniotu Farisi pasia tutir siniotu veruin sasavu kavo aniau na Torat pasia senggavo vavera, senggavo e setojo, “Aih, Siniotu nei kior siniotu veve tatar nesia ma diapi tutir sia.” 3Avori kievo kavo sora tarawa nine maso sia,

4“Masisi na rabua mia pa, siniotu pesi nie piaum domba pa pau pa utin siri, e siri niai mamo, ria vurusu siniotu at vemandi sura e rim e at pasi e ria e siesera siri venai pai to siemuai. 5E masisi siemuai sovera domba pai, piosasani ajai so varabuo pa, e sieriowi tutir sane vesie. 6Avori kiori e vievura so anio wa, siau siniotu venana jasia tutir nie maneta pasia, kievo e diojo, ‘Mendama ve tasanemi vesasie, aso ine piaum domba venai pai isamuai soverai to manau.’ 7Toapa jana kota na rora wa, sane vesie pa baba rawai aso siniotu veve tatar pa siri siovera sane pa, rawai nanapa siniotu pa sembe siniotu at e vemandi sura e rim e at setindija to manau e sembaro tatar.”

Kavo tarawa nana pipi venai

8“Masisi tutiri vavi pesi nie pipi 1perak pa sura, avori siri niai, apa nari dio toane? Apa kiair padamara e dirara anio pai, siesera nanari veito siemuai. 9Janama siemuai pipi pai to manau pa, siau siniotu venana jasia tutiri nie maneta pasia ma, avori kievo e diojo, ‘Mendama ve, tasanemi vesie aso ine pipi perak venai pai andi isamuai to manau!’ 10Itopa so mia e jojo: Toapa jana kota, Allah nie siniotu rora pasia sesanemi vesie so siniotu vetatar pa siri siovera sane pa na nie tatar pasi pa.”

Kavo tarawa nana atuma venai

11Yesus kievo riwanea e diojo, “Siniotu pesi nie atuma mua pa sumbe muandu. 12Atu vepui pai kievo so tamani e diojo, ‘Jai, buono tane pi vepau pa rawa esi so jau.’ Apa tamani viovo pi vepau pasi nana kasau atu pa sandu. 13Mutu raria pa toi, janama atu vepui pai viov nie pi tawa vevata pasi vura, avori ria so uta viaroi. Na jana miemeiri pipi jasi vura to sikai tutir tenam sane vesasie dunia pai. 14Janama nie pi vepau pa sikai vura, vavisi ve baba pai mun na uta jana, apa veito vievisi e imbaro pisia. 15Avori ria nienari pi so siniotu venana aniose jana esi. Siniotu jani diemiasi ria so nie romi pai ave dierama nie pimuna pasi. 16E atuma jani vievisi vesiri apa dio dia pisia pimuna pasi, vape varo siniotu viono pisia maso i. 17Janama sane pa sovera e diojo, ‘Kaiwasa venanaripi na jai nie anio wa sia ma sepau e pisia pai piau ma diondemiwari, vape jana nine vare ivoru na vavisi pai! 18Nari ibata jau e ira so jai, e ikavo so i e jojo: Jai, ive tatar to manau maso Syen Allah ma ive tatar ma so jai au. 19Sa suau ja ve nomu atuma va. Buetor ja ve siniotu ve nanaripi usara Jai au.’ 20Apa biatai e vievu so tamani.

Aja vie kasau rami nana anio pai, tamani siejori to manau, avori sane pa manawar so i aso sane pai veja. Tamani diepaira siemuai, apa tiepuri e sumi. 21Atu nei, kievo so tamani e diojo, ‘Jai, ive tatar so Syen Allah to manau e ive tatar maso Jai au. Sa suau ja ve nomu atuma va.’ 22Apa tamani kievo maso nie womi pasia e diojo, ‘Saira! Menggor sasu viate mo pesi ma metisasuni, metono pi varakia pesi ma duri na varakia pai, e mesasa aeva sor na ae pasi. 23Menggor sapi atu vavoru vionorija pesi e menggutui. Nari tatapi e tasanemi vesasie. 24Aso ine atuma nei vioru to manau vape tienam ea; niai to manau vape sioverai maso jau.’ Apa janama sesanemi vesasie.

25Vape atuma mua baba pai ma andija nia na romi pai, janama vievu ma deriasi anio pai, diediawa raupui pasi sirotu e simajai pa. 26Apa siau nie womi pesi, dutani e diojo, ‘Avo vitopi towana na anio wa pa?’ 27Womi nei ruar e diojo, ‘Nemetakatu siovera to manau e tamamui diemiasa senggutu sapi atu vavoru vionorija pesi, aso siemuai sovera atu pai tutir vesie pa!’

28Apa atuma retena nei kiesiou vesiri e kiembarai sua so anio pai. Avori tamani suvi rari kievo e tuvai ave sua. 29Vape ruar so tamani e diojo, ‘Taun toi, inanaripi usara jai au. E aja jindawain nomu kavo pesa va. Vape aja buono kambing atu pesi so ja ve isanemi vesasie tutir ine maneta ne sia varami! 30Atumui ma ria e miemeiri jai nomu pi vepau pa tutir vavi vera diru, vape veito sioverai ma e, buonggutu sapi atu vavoru vionorija pai so i.’ 31Tamani kievo so atu pai e diojo, ‘Komo au ma tawana nuana tutir jau. Pi vepau isamuai nesi ma au nomu si. 32Apavo ave tasanemi vesasie, aso nemetakatu vioru to manau e nine ma tienam riwanea, niai to manau vape nine ma vesamuai soverai ea.’”