Skip to content
BibleKenya

Alkitab Bahasa Wondama

Lukasi 14

Yesus diono panam so siniotu vepota pesi nana raria Sabat

Na raria Sabat pesi pa Yesus ria diapi na siniotu Farisi veveru pesi nie anio pai. Na jana siniotu pesia sesajo vedior Yesus. Na raria jani siniotu vepota na ae pasi tutir vara pasi sibabara pesi riama so Yesus. Avori Yesus duta maso siniotu veruin sasavu kavo aniau na Torat e siniotu Farisi venana jasia e diojo, “Ariri tane hukum agama pai mamo, diadi tatono panam so siniotu vepota nana raria Sabat te piva e?”

Guru agama pasia e siniotu Farisi pasia sepeja vea. Avori Yesus diekara rut siniotu vepota jani vara pa e diono panam maso i, avori diemiasi e ria. Manau na jana Yesus kievo maso sia e diojo, “Masisi esi na rabua mia, nie atuma pesi, pivai nie sapi pesi tiau so parigi pa raropa na raria Sabat pesi, ariria nari meposasani nana parigi pai te piva e?”

Vape esi dinduara piesa so Yesus nana kavo nine va.

Vesanemi vena dou e viono ate

Aso Yesus siejo siniotu verama pasia seto setiri uta masasoi na dopo mo. Toapa jana diono kavo aniau ninei maso sia vura. “Masisi siniotu pesi siau mia menda so mei ririau pesi, menda mamo memasoi nana uta masasoi viatate vape moja. Aso verui mojara va e, siniotu jani siau siniotu vevesiei veve baba rawai nana au pesi kota pe, amamo vene anio vesau mandu to manau jani, sawawara e riama so au e kievo e diojo, ‘Kuesiou va, uta nine ma veve masis maso siniotu verama wani.’ Amamo nari muemaja vesiri, e nari diemias e suesera uta masasoi vena dopui mo wa.

Toapa jana, masisi esia sesau mia, metiri masasoi vena dopui mo, ave tuan vene anio pai nari riama e kievo so au e diojo, ‘Maneta, ruama muesoi nana masasoi viate rawai ne.’ Toapa jana kota setatuan mia na aropo siniotu vevesiei verama pasia vura. Aso teini diojo tieriai pa, nari Allah dionae niana dou, vape teini diojo niana dou pa, nari Allah dionae tieriai.”

Avori Yesus kievo so vene anio pai e diojo, “Masi buo suau vei siniotu so kuaruvi sane vesie viapi na diru pivai na sasaar, amamo suau nomu maneta, pivai raruomu pasia vape moja, pivai siniotu vena deriasi au vesamuai pi vepau pasia vape moja. Aso nari sesau au kota, e toapa jana suemuai sovera na vitopi nuenari pa. Vape masisi buono kuaruvi mei, suau siniotu vevaro pi, siniotu vekariria e siniotu vemarera ma siniotu veremi kaber kota. Nari suemuai berkat, aso siniotu jasia ma kasa sepa so sesovera nomu vesie pai va. Nomu vesie pai, nari Allah sioverai maso au nana raria siniotu vetindija pasia sesobata sia sovera nana voru pai.”

Kavo tarawa nana mei ve baba

(Mat. 22:1-10)

Nana rabua siniotu verama viapi vura na jana esi diediawa Yesus kievo pa, apa diojo, “Vesie vesiri maso siniotu nari viapi tutir Allah nana raria riama vie pareta ariri raja pa!”

Vape Yesus kievo so siniotu pai e diojo, “Nana raria pesi, siniotu pesi diono kuaruvi mei baba pesi e siau kaiwasa vepau. Nana rabua kuaruvi mei pai dio ria pa, diemiasa nie womi pesi e ria so siniotu siau wa to manau pasia e diojo, ‘Mendama, aso pi vura sive masis to manau!’ Vape sia vura, senggavo e setojo kasa sendama va. Siniotu retena pai kievo so womi jani, ‘Erine vori ivori kakopa savaru pina, e jo ira ve isajora, apavo kuesiou ja vape moja.’ Esi kievo e diojo, ‘Erine vori ivori sapi pa sura e jojo ira jono aririasi. Vekasiou ja vape moja.’ Esi riwanea, kievo ea e diojo, ‘Erine vori iririau ne, toapa jana sa ira matu va.’

Womi pai vievura e tiopanusara vava jana so nie tuan pai. Tuan pai kiesiou vesiri, e kievo so nie womi pai e diojo, ‘Sawawara e rua so ria vena aniose baba, tutiri ria kasisiau pasi e kuor siniotu vevaro pi e siniotu vekariria, siniotu veremi kaber ma siniotu vemarera pasia ma so nine.’ Avori womi pai kievo e diojo, ‘Tuan, nomu pareta pasi ira si to manau, vape uta pasia sipau rami.’ Avori tuan pai kievo maso nie womi pai e diojo, ‘Vera so ria baba wasi e tutir ria kasisiau vena aniose vorira wasi e buona e kaiwasa pa sendama ave ine anio nei dionu. Sanepaja! Varo siniotu kota na rabua siniotu isau to manau jasia, nari seta pisia vena ine kuaruvi mei nine katu ninei!’”

Siniotu vio verausara Yesus

(Mat. 10:37-38)

Kaiwasa pa sepau senda usara Yesus. Yesus mienawer e kievo maso sia e diojo, “Masisi siniotu pesi dio riama so jau, vape andija sane pai siniani to rawai tutir tamani ma vinie pai, tutir nie atuma pasia, ma raruo pai, e kota ma disanemipai riwana matauni, sa vie siniotu verausara Jau va. Siniotu vekambarai vesariouwa vene aitabat1 e verausara Ja pai, sa ria usara Ja va. Masisi nana rabua mia esi dio viaun anio vetariai pesi mamo, retena pa nari miesoi e dietor nie pipi pai papori, ave amamo ruin nari pipi pai miesi so dimbaunu anio pai to kiai mo pa te pivai. Aso masi veito pipi pai kiai e nienari ma kiai va, vape sama dou pai ma nienari to manau, amamo siniotu vura sesajo nanaripi jani nari semari. Nari senggavo e setojo, ‘Ye, siniotu nei viaun anio pai, vape kasa diadi so nienari e kiai va!’ Toapa jana kota masisi raja pesi nie verut pimamuna pa sembe siaran sura, seto sembe marova tutir raja viombesiei verut pimamuna pa siaran siniotu siri, amamo nari raja jani miesoi e sane pai ariri papori, nari piaja maso vie marova tutir rai wai te pivai e? Masisi ruin toapa piaja va, e rai pai nia vie kasau rami, diemiasa esia ave siau mari ma vesie pai vea.” Vepui pa Yesus kievo e diojo, “Toapa jana kota maso mia! Masisi teini dio vie siniotu verausara Jau, amamo retena mo tiavini nie pi saserai pasi.”

Sasi tarai veve kambu

(Mat. 5:13; Mrk. 9:50)

“Sasi pai ma diete, vape masisi sasi pai vie kambu mamo, nari diadi tatoni e vie sasi riwanea e? Varo viate ea, sa diadi vioni maso romi va, maso pupuk va kota. Apavo vekei vea. Teini vie taradiau mamo, diediawa!!”

Source notes (1)
  1. Footnote Kavo nine ma kavo sora tarawa, ve topanusara maso siniotu teini dio ria usara Yesus mamo nari tiere marior vepau, aso siwi nie tarai vura maso i e kiorusara Yesus veito Nie voru pai.

Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.