Lukasi 13

Masisi suovera sanemu pa nana nomu tatar pasi va, nari tuere kariria pai

1Na raria jani siniotu pa setopanusara so Yesus nana siniotu Galilea pa sembe toi, Pilatusi mu sia pa, na rabua senunu pi som so Allah. 2Yesus diediawa kavo jana pa, kievo e diojo, “Aso semu siniotu Galilea pasia toapa jana, apavo metojo jana oisara sia ma sembe tatar rawai mo nana kaiwasa Galilea esi wa sia vura e? 3Piva vesiri! Vape itopa maso mia: Masisi memanau mene tatar pasi va, mia vura nari metere kariria pai kota, ariri sia. 4Toane toi kota tutir siniotu sura e rim e toru vevoru na Siloam, nanapa anio katu vetariai pai via kepana sia pa e? Mia ma metojo jana oisara sia sembe tatar rawai nanapa siniotu vevesiei venana Yerusalem pasia e? 5Piva vesiri! Itopa so mia riwanea: Masi memanau mene tatar pasi va, nari mia vura metere kariria pai ariri sia.”

Kavo tarawa nana Airavo Ara veve buo va pai

6Manau na jana pa Yesus tiopanusara kavo sora tarawa ninei, “Siniotu pesi siemuai airavo ara vetipu nana nie romi anggur pai. Raria pesi ma ria siesera buo nana airavo jani, vape disamuai buo pesi va. 7Apa, kievo so venanaripi na romi pai e diojo, ‘Suejo, irama isasera buo nana airavo ara ninei, taun toru to manau, vape isamuai buo pesi va. Ruova airavo jani vea! I ma diosa kakotara uta pa vea!’ 8Vape venanaripi na romi pai ruar maso i e diojo, ‘Piesa va diosa taun siri ea, Tuani. Nari isariai wawariri kakopa nei e jono pupuk so i. 9Nari vie buo na taun verama wai te pivai. Vape masisi pivai, amamo Tuani buemiase riova vea.’”

Yesus diono panam so vavi vepota pesi nana raria Sabat

10Na Raria Sabat pesi pa, andina raria siniotu Yahudi pasia semanau nanaripi, Yesus dieniau na anio ari agama Yahudi pesi raropa. 11Na jana, vavi pa siri ma piota taun sura e rim e toru to manau, aso tiere wainunu vekariria na nie tarai raropa. Vavi jani karupa bu e diadi va so diosa to tindija. 12Na rabua Yesus siejo vavi jani pa, siawi e kievo so i e diojo, “Mai, puenam to manau na nomu pota pai!” 13Avori Yesus pisasana vara pa ajai na vavi jani, e na raria jani kota vavi nei diosa to tindija avori sienandik Allah.

14Vape veveru na anio ari agama Yahudi pai kiesiou, aso Yesus diono panam so siniotu na raria Sabat pa, avori kievo so kaiwasa pasia e diojo, “Raria pa rim e siri so venanaripi; toapa jana mendama na raria jasi ma ave mesamuai panam, mae Raria Sabat pai ma moja!”

15Syen ruar maso i e diojo, “Siniotu viove vetindija pa mia, vape venganggau ni mia! Nana Raria Sabat pai mamo siniotu vura sendeku sapi ma keledai nana sine war pasi e sesuvirasi e senggosi ave setonae siunu kambu. 16Toapa jana vavi pesi na usapui Abrahami, woroi pa taun sura e rim e toru Bilis pai diaviti, apavo i ma sa irera pi vekasiesi nei na raria Sabat va e?” 17Yesus kievo tonine pa, siniotu vekavo vavera tutiri pasia semamaja vesiri; vape siniotu esi pasia vura sesanemi vesie aso sesajo pitandor Yesus nienari pasi vura.

Kavo tarawa nanapi sawi mor

(Mat. 13:31-32; Mrk. 4:30-32)

18Yesus duta e diojo, “Ave veruin ariri mo, jono kavo sora tarawa nine pa ma vava ariri Allah vie pareta ariri Raja pa. 19Allah vie pareta ariri Raja pa miesi ariri sawi mor pesi1. Sawi mor pa siri siniotu pesi kiori e tianami na nie romi pai. Pi mor jani tipu e vie airavo, e aja pasi sinanari karai na airavo jani nie arawa pasi.”

Kavo tarawa nanapi ragi

(Mat. 13:33)

20Yesus kievo riwanea e diojo, “Masi Allah vie pareta ariri raja, tutir vitoi jitato nie vava pa? 21Vava pa ma masi vavi vekor ragi e vetetiovara tepung pa liter siniotu muandu, veito pirisa vura.”

Rature vera so tenam vemanau va pai

(Mat. 7:13-14, 21-23)

22Nana rara vera so Yerusalem pai, Yesus ria usara aniose baba ma aniose katu e dieniniau. 23Avori siniotu pesi dutana Yesus e diojo, “Jai, apavo siniotu nari vesamuai vesie pa sepau va e?”

Yesus ruar e diojo, 24“Metosasera ave mesua nana rature vetakakotar pai. Aso, mesanemipaja! Kaiwasa pa sepau nari setosasera ve sesua vape diadi va. 25Nana rabua vene anio pai biatai e siori rature pai pa, mia ja metosa na vorira pa e metov e menggavo, ‘Jai, sueva rature pai so ama!’ Nari ruar e diojo, ‘Ja ma iruin mojara mia, menda na topina!’ 26Avori mia nari menduar e metojo, ‘Amatapi e amatunu to manau tutir au, e bueniau ama kota to manau na amane ria vena aniose wasi!’ 27Vape vene anio pai nari kievo maso mia e diojo, ‘Ja ma iruin mia va, menda na topina. Membe kasau vurusu aropo ne, siniotu venanari kariria pa mia!’ 28Nanapa raria, mesajo mene tapu pa Abrahami, Isak, ma Yakob ma nabi pasia vura sesanemi vesie na Allah vie pareta ariri Raja pa, mia ma nari mesai e metere kariria aso mia ma nari setatavar mia so vorira! 29E siniotu pai nari sendama na rawa mura, ma rawa matan, na rawa wanamba ma rawa wanamarai, semasoi e nari setapi, nanapi Allah vie pareta ariri Raja pa. 30E vevata mo, siniotu vepui pasia nari sembe siniotu vepapo siniotu vepapo pasia, nari sembe siniotu vepui.”

Yesus sane pai maso Yerusalem

(Mat. 23:37-39)

31Nana raria jani, siniotu Farisi pa sembe toi senda so Yesus e senggavo e setojo, “Suvi e vuevu vurusu uta nine, aso Herodesi dio mun au.”

32Yesus ruar maso sia e diojo, “Mendara e menggavo so warasiriwai jani, ‘Ja ma Yetavar wainunu vekariria e jono panam so siniotu vepota, na raria nine e kausapa, e imanau inanaripi na raria veve torua pai.’ 33Vape raria ninei, kausapa e saar, ja ne ira ine rara nei rami, aso vesie va so nabi pesi semuni na Yerusalem vorira pa.

34Yerusalem, Yerusalem! Mia memu Nabi pasia! E Allah nie amiasa pasia, suo sia na rovuki to semboru! Ve toi to manau, isanemi vesie iruiri atuma pasia, masi vaveri tutir kokori sinia pai pioruiri atu pasi na vararau vavar pa, vape mia ma menggambarai! 35Vevata mo, nomu anio nei nari sembavuri e sieja. Vape Ja ikavo maso mia e jojo, mia ma nari mesajo Ja ea va, veito menggavo e metojo, ‘Berkat pai so i verama nanapi Syen sano pa.’”