Skip to content
BibleKenya

Alkitab Bahasa Wondama

Lukasi 12

Aniau atapua maso siniotu verausari pasia

(Mat. 10:26-27)

Siniotu pa sepau sembe siaran-siaran sesorum veito sesobabuasa sia vavera. Avori dieniniau nie verausari pasia e diojo, “Mesanemipai to vesie mo so siniotu Farisi pasia sene ragi1 pasi, asina awitituwa pai. Varo pi vetau tawana kota, e nari vetasieva va e varo pi veve aniwara, e nari veveruana va. Apavo vitopi menggavora na kumuar pa raropa, nari setadiawasi na sasaar pa raropa; e vitosi mesamumuisi na andiraro pa, nari setopanasi na anio pa babua pa.”

Mematai maso Syen

(Mat. 10:28-31)

“Ine maneta pa mia, mesanemipai to vesie mo! Mematai vemu tarai pasia vape moja, aso vepui ma nari kasa setono piesa va. Vape joisari maso mia, teini nari memataiti pa. Memataita paini Allah! Aso I ma mu to manau, andi vieru e kiei so adia vevoru moja va pai raropa! Sanetiar vea, andi memataiti.

Vevovo aja sisumi pa rim so pipi katu mo pa muandu. Toapa jana Allah diparo esi va. Allah dietor rurandau vena mendumi pasi vura to manau kota, apavo mematai va, aso Allah diedidin ariri mia rawai nanapa aja sisumi ninesi!”

Vetopan sasara Kristus na dopon kuaruvi

(Mat. 10:32-33, 12:32, 10:19-20)

“Sanepai to vesie mo: Siniotu vetopan sasara jau na aropo kuaruvi siniotu vepau amamo Atuma Siniotu pai kota nari tiopan sasari na aropo Allah nie siniotu rora pasia. Vape siniotu veporasa Ja na aropo kuaruvi siniotu vepau, amamo Atuma Siniotu pai nari piorasi na aropo Allah nie siniotu rora pasia. Masisi siniotu pesi kievoro piesa rawai Atuma Siniotu pai, Allah nari vie ampun nie tatar jasi; vape teini kievo sisiajara Wainunu Sren pai mamo, Allah kasa vie ampun nie tatar jasi va.

Masisi siniotu pesia senggor mia so anio ari agama Yahudi pasia ave setutan usara mia na aropo pareta ma veveru pasia, mesanemi sasera mia vape moja, nanapi nari toane avori menggavo vori mia pa, pivai so kavo vitopi nari menggavora pa. Aso nana oras jani kota, Wainunu Sren pai nari dieniniau mia so vitopi nari menggavora pa.”

Kavo tarawa nana siniotu vene pi vepau venganggau pai

Nana kaiwasa vepau jasia esi kievo maso Yesus e diojo, “Guru, buemiasa ine netavava wai, ave viov amane pi vepau jai piri so ama wasi.”

Vape Yesus kievo maso i e diojo, “Maneta panau, teini disatuir jau ave ive siniotu vekutu kavo e veruwasa mene pi tawa vevata pasi ariri mandu pa?” Avori Yesus kievo maso kaiwasa vena jasia e diojo, “Mesanemipai to vesie e metarama voria, mesanemi kariria siniotu sene pi va. Aso tenam siniotu nei ma dievakir nana pi tasamuai pasi va.”

Avori Yesus tiopanusara kavo sora tarawa ninei, “Siniotu pesi nie pi vepau. I ma siemuai kakopa vionae siemuai pi vepau vesiri. Siniotu vesamuai pi vepau jani sane pai usara na sane raropa, ‘Varo uta ea ave iruir ine pitatana nesi, vitopi nari inanari ne?’ Janama sane pai usara ea e kievo so matauni e diojo, ‘Isamuai ria to manau; ine java wasi nari jemias e sendurasi avori ivaun ve baba rawai pesi. Na jana nari ipir ine gandum pasi vura, tutiri pi esi pasi. Avori ikavo na sane rarone e jojo: Ja ma siniotu vesamuai pi vepau sa vekariria va, e vevata to woroi. Nine ma imanau ine marior, japi e junu, e sane vesie vea!’ Vape Allah kievo maso i e diojo, ‘Hei, siniotu venganggau panau! Diru ninei kota nari vuoru, avori teini nari siemuai pi vepau ruira so au pasi?’

Toapa jana tutir siniotu veruir pi vepau maso matauni, vape siesera ve siemuai pi vepau na Allah aropo pa va.”

Sanetiar vea maso Allah.

(Mat. 6:25-34)

Avori Yesus kievo maso nie verausari pasia e diojo, “Aso toapa jana itopa so mia e jojo, ‘Mesanemi sasera so mene tenam pasi vape moja, toapa nari metan, pivai nari metavavara so mene tarai pai.’ Tenam nei ma diete rawai pisia nei, ma tarai nei kota ma diete rawai avavar pai. Mesajo aja moga pasi ma sitana pi va, e siema pi va, sivaro anio e java kota, vape Allah diewawatasi! Mae mia ma metariai rawai mo nanapa aja wasi. Teini nana rabua mia, nana sane sasera pai vea, diadi dionae nie tenam pai piam katu esa pa? Masi nanapi katu nine vea, diadi so menanari pa va, aso vitoni mesanemi sasera so pi viombesiei pa? Mesasir ariau aike pasi sitipu pa; ariau jasi sinanaripi va, siawar va kota. Vape Raja Salomoi ma siemuai pi saserai vepau kota, vape siesuni na avavar viate ariri ariau jasi va. Apavo, masi samue vetipu nana mapar, raria ninei andija vape nari raria kausapa pa ma senggei so adia pa raropa. Vape Allah andi mierandini samue jasi veito siete mo. Avori toane tutir mia! Vape mia ma mesanemitiar mo va! Apavo, mesanemi sasera mia maso pi metan va ma pi metunu vape moja. Vava jasi vura ma kaiwasa vena dunia e veruin mojara Allah pasia, sesaserasi. Tamamui ma ruin vitosi mesauwasi vura pa. Vape mia ma mesasera Allah vie pareta ariri raja na mene tenam pasi, amamo Allah nari dionasi vura kota maso mia.”

Pi vepau venana rora

(Mat. 6:19-21)

“Mia ma mepau va nana kuaruvi, vape mematai va! Aso Tamamui sane vesien diono berkat vemasi pai maso mia nana nie Pareta pai. Membova mene pi saserai pasi, e sine vait pai, membovsi so siniotu vevaro pi pasia. Menanari karawa sa vekapop va so mia, rar vevata to woroi na rora wa. Pi vepau jasi ma sa sinai va aso viamanana pi pasi ma sa sikosi va e pusie pasi sa sikariria va. Aso na topina vea nomu pi vepau pasi si nana, na jana kota sanemu pa aja!”

Womi tawana viarama vedior Yesus

(Mat. 24:43-51)

“Metarama nana vava pasi vura. Tawana metavavar sasu e mene padamara pasi tawana siveviar, masi tutiri womi pa setarama vedior sene tuan siovera na mei ririau pai. Masi tuan pai siovera ma e tiov rature pai, nari sawawara e sesieva rature pai. Vesie vesiri maso womi tuan pai riama e siemuai sia mana aja setanotai. Vevata mo, ikavo maso mia e jojo: tuan jani nari diemiasa nie womi pasia semasoi, avori dio adadura sia. E masi tuan pai ria na diru rabua pa ma te, nana bera sapa pa e siemuai sia setono ariria, amamo vesie maso womi jasia. Ave menduina! Masisi tuan vene anio pai ruin ariri oras toni nari viamananapi pai dio riama pa, amamo nari dierama vediora ave viamananapi pai suapui so anio pai vape moja. Apavo mia kota, metotarama, aso Atuma Siniotu pai nari riama nana kasau sa metinduin va pesi.”

Womi vekor usara ma Womi vekor usara va

Petrusi dutan maso Yesus e diojo, “Syen, kavo aniau erine kuevora pasi sitera ama te, kaiwasa vura e?”

Syen ruar so i e diojo, “Teini vie womi e diono ariri pi nana anio raropa e kior usara tutir sane vetindija ma ruin usara pi vura? Tuan pai rusasani ave diono ariri womi pesia, e diono pisia maso sia nana raria pai. Vesie maso womi jani, masi nie tuan pai sioverai ma siemuai andija ria nie nanaripi pai. Vevata mo, ikavo maso mia e jojo, tuan jani nari diono nie pi vepau maso womi jani. Vape masisi womi jani kievo na sane raropa e diojo, ‘Aja woroi rami so Ine tuan wai sioverai ma pa,’ avori riora tatiri womi pasia e diapi e ditunu veito sua pasi simuni, apavo Tuan pai nari sioverai ma nana raria tutir oras tatinduin va pesi. E nari tuan pai diediawi to rawai vesiri e dioni e miesi vaveri tutir siniotu vekor usara Allah va pasia.

Womi veruin ariri Tuan pai nie sanepaja, vape diono ariri tuan pai nie sanepaja pai va, nari tuan pai riorai na airora vekarakuai, Vape womi veruin ariri tuan pai nie sanepaja va, avori vepui nienari sasara piesa mamo tuan pai riorai na airora vetapisa vei vea. Aso siniotu vesamuai pau to manau pai, tuan pai siau to pau nana i kota. Mae siniotu vesamuai sanetiar to manau na pi vepau, tuan pai nari siau to pau kota nana i.”

Varo mari vape variriwi

(Mat. 10:34-36)

Yesus kievo e diojo, “Irama maso dunia nei ve ikor adia variriwi. E sane vesie vesiri mo masisi adia variriwi pai vieviar to manau, vape pi varami! Marior pimasa mo pesi ave nari irai. E pi jana aja rama varami, sanene kariria vesiri. Apavo nari memamo metojo iramane ma ave ikor mari maso dunia nei e? Pivai, mari va, vape variriwi. Na retena nine ma, anio raropa siri ma sembe rim, sembe toru sesanemitiar, sembaririwi tutir muandu vesanemitiar va, e muandu vesanemitiar va sumbaririwi tutir toru vesanemitiar. Tamapai nari vieririwi tutir atu mua pai, ma atu mua pai nari vieririwi tutir tamapai. Siniani kievo e pau tutir atu vavi pai, ma atu vavi pai vieririwi tutir siniani. Nioni vavi pai nari vieririwi tutir rewa pai, ma rewa pai nari vieririwi tutir nioni vavi pai.”2

Ave veruin ariri vava na raria verama wasi

(Mat. 16:2-3)

Yesus kievo ea maso kaiwasa pasia e diojo, “Masi mesajo arepa vesa na rawa mura pa, sawawara e menggavo e metojo, ‘Nari ve rama.’ E vava jana vevata mo nari veruana. E masi mesajo wana marai pai sio, mia menggavo, ‘Nari wor pai disa.’ E vava jana vevata mo nari veruana. Eh Siniotu viove vetindija, vape venganggau pa mia! Mia ma menduina nari ve rama e ve wor, vape aso vitopi menggambarai menduini ariri Syen nie vava sanepaja veveruana maso mia nana rabua nine pa.”

Kuevo e vesie tutiri vekasiou au pasia

(Mat. 5:25-26)

“Aso vitopi diadi so matau menggutu ariri vetindija pai va pa? Masisi esi vie karaka mia so kuaruvi vekutu kavo wai, metosasera ve menggavo ariri kavo tutiri, ave amamo simanau vurusua, nana aja mena ria pai rabua pa pa. Masi piva, nari piapara mia so aropo pareta pai, e nari vekutu kavo pa siwi mia so viarama na bui pai e dionae mesua so bui pai. Itopa maso mia e jojo: Nari mia ma sa mesuvi na bui wai va, veito membait mene niaki pasi to sikai mo pino.”

Source notes (2)
  1. Footnote ragi Pi vinanari mamami, ave tandemi tutir tepung pai mamo siasan e pirisa.
  2. Footnote Suejo Mika 7:6

Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.