Lukasi 11

Kavo aniau Yesus nana vava veve nadi pa

(Mat. 6:9-13, 7:7-11)

1Nana raria pesi pa Yesus vie nadi nana uta pesa. Vie nadi to manau pa, nie verausari pasia esi kievo e diojo, “Syen ite bueniau ama na nadi, ariri Yohanesi dieniau nie verausari pasia ave sembe nadi pa.” 2Apa Yesus kievo so sia e diojo, “Meto membe nadi, mamo, menggavo toapa nine,

‘Jai,

Au ma Allah siria panau na.

Ave amamo ama som ma ama tatuan Au.

Au ma amane Raja panau na.

Ave amamo vue pareta na kakopa nei.

3Buono pisia vemasi maso ama na raria vura.

4Vue ampun amane tatar pasi,

aso ama kota amambe ampun siniotu

ve nanari sasara maso ama pasia.

E kuor ama maso sotoura pai raropa vape moja.’”

5Yesus kievo so nie verausari pasia e diojo, “Masisi siniotu pesi ariri nana rabua mia esi ria so nie maneta pesi, na nie anio pai na diru rabua, e diojo, ‘Manetai ive niaki nomu mamami pa toru, 6aso ine maneta aja venana rara pai rabua pa, deriasi riama so anio pai to manau vape ivaro pisia so i!’ 7Masisi nomu maneta rua soa pai, ruar tonine, nana anio pa raropa, ‘Buo vaveri ja va! Rature nei siori to manau e ja tutir ine atuma nesia amatena to manau. Kasa ibata jau e jono pi so au va.’”

8“Nari toane?” Yesus kievo so i e diojo, “Ikavo e jojo! Masisi nomu maneta nina, vape sa biatai e diono pi so au va. Aso muemaja va so suau pi nana nendiwana pana, apavo nari biatai e diono pi vitopi suau wa pa. 9Apavo, itopa so mia e jojo: Mesau vea, nari diono so mia; mesasera vea, amamo nari mesamuai; metov vea, nari rature pai tiesieva so mia. 10Aso siniotu teini siau nari siemuai; siniotu teini siesera nari siemuai, e siniotu teini tiov, nari rature pai tiesieva ma so i. 11Na rabua mia pa, masisi atuma pesi siau dia nana tamani, apa nari tamani diono korou pesi so i e?” 12Ite siau ponori, apa nari diono karewai rubasu pesi so i e? 13Masisi mia ma menganggau, vape menduina e metono ariri vava viate maso mene atuma pasia. Avori toane tutiri Tamamui na rora wa! I ma nari diono Wainunu Sren pai so teisia sesau pa!

Yesus tutir Beelzebul

(Mat. 12:22-30; Mrk. 3:20-27)

14Nana raria pesi pa Yesus dietavar wainunu vekariria viono sore mumuja e suvi vurusu siniotu pesi, janama siniotu pai kievo. Kaiwasa pa sepau senggavo usara, 15vape na jana kota esia senggavo e setojo, “I ma dietavar wainunu vekariria na paja Beelzebul, aso veveru na wainunu vekariria pai na.”

16Na jana kota esia sesau Yesus nienari pitandor, ave seto sesotouri. 17Vape Yesus ruin sene sanepaja pasi. Apa kievo e diojo, “Masisi negara pesi miesasavu aso vie marova vavera tutiri matauni, negara jani nari kieriria e niai, e nana anio raro pesi, sesanemi siri va e sembaririwi, anio raro jani nari kieriria e niai. 18Toapa jana kota nana kerajaan Bilis pai raro pa; masisi kuaruvi pa siri miemu tutir kuaruvi pa esi mamo kerajaan pai nari miesasavu. Metoja toapa Ja ma jetavar wainunu vekariria tutiri paja na Beelzebul. 19Apa masisi jetavar wainunu vekariria tutir paja na Beelzebul, toane tutir verausari pa mia nari metatavar na paja teinina? Aso nari sia setopa riwana sene kariria pasi. 20Vape ariri jetavar wainunu vekariria tutir paja na Allah, apa vevata mo Allah andi riama vie pareta ariri Raja na rabua mia to manau.

21Masisi siniotu vepaja pesi, rut pimamuna vemasi, diosa vedior nie anio pai, amamo nie pi saserai pasi vura nari simanasi. 22Vape masisi siniotu vepaja rawai ni pesi, rura e dionae piava, e siniotu jani diewara pimamuna sanetiara pasi, e nari viovo nie pi saserai pasi vura.

23Teini nia tutiri Jau va, riewai Jau ma e teini ruir tutiri Jau va, piosasiepara.”

Wainunu vekariria pai siovera

(Mat. 12:43-45)

24“Veito wainunu vekariria pesi, suvi na siniotu pesi, ria wawarir na mapar kurumi veseja pesa ave siesera uta mienau nana pa, vape disamuai esa va. Toapa jana, kievo e diojo, ‘Nari isovera so anio ivavu vurusua to manau wai!’ 25Apa ria so wana pa, siemuai anio pai setirari to viero rariai e diete mo. 26Avori suvi e kior wainunu vekariria vevesiei pa rim e muandu e vinggariria rawai nana retena pai. Janama sendama so siniotu pai e semasoi na jana. Apa manau na jana pa dinggariria rawai nana retena pai.”

Teini siemuai vesie pai

27Aja Yesus andia kievo rami, vavi pesi nana rabua kaiwasa vepau pasia, kievo so Yesus e diojo, “Vesie pai maso vavi vesanemi vava Au pai ma susu vesusu Au pai.”

28Vape Yesus kievo e diojo, “Vesie pai maso teisia setadiawa Allah nie kavo pai ma senanari ariria pa!”

Kaiwasa pasia sesau maso Yesus ave diono pi tandor.

(Mat. 12:38-42)

29Na rabua kaiwasa borai pa sesorumi pa, Yesus kievo e diojo, “Usapui ninei ma, usapui venganggau. Sia ma sesau viono pitandor, vape maso sia ma kasa viono pitandor pesa va, vape pitandor nana Nabi Yunus. 30Aso ariri Yunus vie pi tandor maso kaiwasa Niniwe pasia pa, toapa jana kota Atuma Siniotu pai nari vie pi tandor maso usapui ninei. 31Nana raria vemanau mo pai, raja vavi vera nana rawa wanamarai1 pai nari biatai tutir kaiwasa rabua ninei, e nari diono hukuman pai maso sia. Aso raja vavi jani riama nana dunia nei sope wa ave diediawa Salomo nie sanepaja ruina pai. Vape nana rabua nine ma, esi bieba rawai mo nana Salomoi. 32Nana raria vemanau mo pai, kaiwasa Niniwe pasia nari sesobata sia tutir usapui nine. Nari setono hukuman so usapui nine, aso kaiwasa Niniwe pasia ma semanau sene tatar pasi nana rabua setadiawa topanusara nanapa Yunus pa, e vevata mo venana pa ninesi ma sirawai mo nana Yunus!”

Sasar ma kumuar

(Mat. 5:15, 6:22-23)

33“Sa esi kiair padamara pesi vori dieniwari e kukuv tawani tutir kabesu va, vape nari pir sasana padamara pai na uta vetariai, ave siniotu vesua pasia vura sesajor nie vesasaar pai. 34Remu pasi ma padamara vena nomu tarai pai na. Apavo remu pa siete, tarai pai vura nia na ve sasaar pai, vape masisi remu pasi sikariria, tarai pai nia na ve kumuar pai. 35Aso toapa jana pavo, sane pai ariria, ave sasaar vena au pai kumuar vape moja. 36Masisi nomu tarai pai vura siesaar e rabua esa kumuar vape moja, apa pi vura nari siesaar, ariri padamara veveiar e disambiar au.”

Yesus kiesiou siniotu Farisi pasia tutir guru agama pasia

(Mat. 23:1-36; Mrk. 12:38-40)

37Yesus dieniau to manau pa, siniotu Farisi pesi siawi ave ria diapi na nie anio pai. Apa Yesus sua na anio pai, avori miesoi diapi. 38Siniotu Farisi pai siejo Yesus diapi pa pa kievo usara aso ruasa vara pasi papo va, ariri buai vena agama Yahudi pai. 39Vape Syen kievo maso i e diojo, “Siniotu Farisi pa mia ma, menduasa rurana toki e paruasi pasi sine rawa vorira pa vea, vape rawa raro pasi ma sionu nana awara pai e kariria pai. 40Ei mia ma menduin va, Allah nienari rawa vorira pai ma, Allah nienari rawa raro pai kota, te piva e? 41Venana nomu toki pai ma paruasi pai raropa, jasi si nari metonasi so siniotu vevaro pi pasia. Toapa jana mamo, vura ma nari sivaro rariai maso mia.

42Vape kariria pai maso siniotu Farisi pa mia, aso metono vait sura pai2 nana mene pi tatana pasi ariri sapui, kao e nginggua e rau saserai pasi vura, vape menanari vetindija pai e mesanemipai maso Allah va. I ma pi nari menanari ariri mo pa esi nina, e meparo esi pasi vape moja.

43Kariria pai maso siniotu Farisi pa mia, aso nana anio ari agama Yahudi pasi mamo, meto memasoi na dopo mo pa vea, ma nana uta vevovopi pasi mamo mesanemi vesie siniotu sesanandiki mia. 44Kariria pai maso mia, aso meti masisi tutir papi vevaro reu apavo siniotu vera na vavo pasia, senduin va3.”

45Siniotu pesi na rabua siniotu veruin sasavu kavo aniau na Torat pasia esi ruar so Yesus e diojo, “Guru, kuevo vetoapa jasi ma, suesiajara ama kota.”

46Vape Yesus ruar e diojo, “Kariria pai maso mia kota, siniotu veruin sasavu kavo aniau na Torat pa mia, aso metono pi vemarabat mesariowa va maso siniotu vevesiei, vape mia mesari mo kasa mesorebasa marabat nine esa na mene varakia pesi va. 47Kariria pai maso mia, aso membaun papi so nabi pasia, vape metapumi pasia semu sia to manau. 48Toapa jana apavo metopa sasara to tindi mo ariri vitopi metapumi pasia pi senanari pa, aso sia semu Nabi pasia to manau e mia membaun sene papi pasi. 49Aso Allah nie sanepaja vetindija pai diojo, ‘Nari jemias nabi pesia tutir siniotu atapua pesia maso sia, e rawa esi ma nari semuni e sesisiajar sia.’ 50Ave nana usapui ninei, vesau sovera nabi pasia vura sene veria vetavuvu nana dunia nei retena mo vieva ma pa, 51veria retena mo na Habel veito maso veria na Zakhariai, semuni na wavusom pai tutir Anio Syen pai kasau rabua pa pa, kota ikavo so mia e jojo pi jasi: Allah nari siau soverasi vura nana usapui ninei.

52Kariria pai maso siniotu veruin sasavu kavo aniau na Torat pa mia, aso menggor aisuori veruin sasavu aniau pai, vape mataun mia menggambarai mesu apui ve mesasera veruina jani. Sovera ea e, memu vediora siniotu viosasera ave vesua pui pasia.”

53Manau na Yesus ria vurusu uta jana pa, siniotu veruin sasavu kavo aniau na Torat pasia tutir siniotu Farisi pasia senggasiowi. E sesasera ria ave setonae tiawa e setutan usari nanapi kavo saserai vepau. 54Ave amamo setadiawa ariri kavo kievora pasi to vesie mo, ave sesasera kavo nari kievo sara pesa ave amamo ve ria so setitapuri.