Lukasi 10

Yesus diemiasa siniotu verausari pa sembe siniotu toru e sura

1Manau na jana pa Syen disatuir siniotu viombesiei verausari pa sembe siniotu toru e sura, avori diemiasa sia e sembe muandu-muandu sepaponi so bendar pasi tutir uta dio ria soa pasi. 2Kievo maso sia e diojo, “Aibuo vio verosu pai ma piau, vape siniotu venanaripi pa sepau va. Toapa jana pavo suau so Tuan vene romi aibuo pai, ave dienatu siniotu venanaripi pesia e sendosu aibuo jasi. 3Menda, vevata mo jemiasa mia airiri domba atu, ria so rabua warasiriwai pasi. 4Kasa menggor karawa va, piva pisia va, piva ae vasor va, kasa memanau eta e menggavo so esia va nana aja menda rami pa. 5Masisi mesua so anio pesi mamo, menggavo papo e metojo, ‘Mari ma vesie pai maso anio ninei.’ 6Masisi na jana siniotu pesi sane vesie mari ma vesie pai, amamo nomu mari ma vesie jani nari nia tutiri; masisi pivai, amamo suerap sovera nomu mari ma vesie jani. 7Memasoi na anio pa siri vea, metapi e metunu pi vitosi siniotu dionasi maso au pa, aso siniotu venanaripi pai ma, nari siemuai nie vaiti pai. Membavu vavera anio vape moja. 8E masisi mesua so aniose baba pa raropa e senda vedior mia na jana, metapi vitosi setonasi maso mia pa. 9E kaiwasa vepota vena aniose baba pasia ma metonae sepanam, e metopa so sia na jana, ‘Allah nari sawawara e riama ave vie pareta ariri Raja na rabua mia.’ 10Vape masisi mesua pui so bendar pesi e senggavo pidiara mia na jana, mendara so ria pai e metumi, e menggavo tonine, 11‘Wabu vena mene aniose baba pa vetetiai nana amandaemi nesi kota, amandora upisasi na mendaromi pasi ave sive sanepaja maso mia. Vape menduina toapa Allah deriasi riama ave vie pareta ariri Raja na rabua mia.’ 12Ikavo maso mia e jojo: na raria jani Sodom nari tiepisa rawai marabat venanapa aniose baba jani.”

Aniose baba vesanemitiar Yesus pasi va

(Mat. 11:20-24)

13“Kariria pai maso mia venana Khorazim! Ma kariria maso mia kota venana Betsaida! Inanari pitandor ninesi na kasau mia to manau, vape mia ma memanau mene tatar pasi va. Masisi pitandor ninesi inanarisi nana Tirus tutir Sidon, amamo kaiwasa venana pasia semanau sene tatar pasi to manau, e sesasun sia na sasu vemandat avori sepiri wabu na sendumi pa vavopa. 14Vape nari nana raria vemanau wai, mesamuai marabat pa rawai vesiri, nanapi kaiwasa vena Tirus tutir Sidon pasia. 15E Kapernaum pa mia! Apavo nari Allah siasana mia so rora wa e? Pivai, sovera ea mamo Allah nari viar mia e kie mia so uta adia vevoru moja va pai.”

16Avori Yesus kievo so nie verausara pasia e diojo, “Siniotu teini diediawa mia, i ma diediawa Jau; siniotu teini tiawa pidiar mia, tiawa pidiara Jau; e siniotu teini tiawa pidiar Jau, tiawa pidiari, viamiasa Ja pai kota.”

Siniotu toru e sura verausari pa sesovera

17Janama siniotu verausari pa sembe siniotu toru e sura sesovera tutir sesanemi vesie, e senggavo, “Syen, wainunu vekariria pasi kota sitatuan maso ama na Syen sano mu pa!”

18Avori Yesus kievo maso sia e diojo, “I Isajo Bilis pai tiawa masisi verevera na rora wa. 19Vevata mo jono paja maso mia to manau, ave metitara korou e karewai rubasu, ma paja ave metinggarotu Bilis nie paja pai, e kariria pesa itere mia va. 20Vape toapa jana, mesanemi vesie aso wainunu vekariria jasi sitatuan maso mia pa vape moja, vape vesie pa mesanemi vesie to rawai aso mesanomi pasi sivui na rora wa.”

Yesus sane pa vesie

(Mat. 11:25-27, 13:16-17)

21Na raria jani kota Yesus sane pa vesie nana Wainunu Sren pai e kievo e diojo, “Isom isanandik Au, Jai, Syen nana rora e kakopa nei, aso jasi vura Au bueniwarasi so siniotu veruin usara pi vura, vape vueruanasi maso siniotu vemadia. Jai, jasi sionae sanemu pa vesie.

22Pi jasi vura ma Jai dionasi maso Jau to manau. E esi ruini Atuma jani va, vape Jai au muesari vea. E kota esi ruini Jai au va, vape atu pai miesari vea e siniotu teini Allah diri pa mamo iveruana Jai au masoi.”

23Manau na jana, Yesus mienawer maso nie verausari pasia mesari e kievo e diojo, “Vesie maso veremi vesajo vitopi mesajora pa. 24Ikavo maso mia e jojo: Aso Nabi ma Raja pa sepau, seto sesajo vitosi mesajora si pa, vape sesajo va, e seto setadiawa vitosi metadiawa si pa, vape setadiawa va.”

Siniotu Samaria vene sanepaja viate

25Nana raria pesi pa, siniotu veruin sasavu kavo aniau na Torat pesi riama dio siotour Yesus, kievo e diojo, “Guru viate panau, ja ma nari inanari vitoi ave isamuai tenam viaworoi pai?”

26Yesus ruar so i e diojo, “Avo vitoni vui nana hukum Torat pai pa? Buosanemi paja pa toane?”

27Siniotu nei kievo e diojo, “Sanepai Syen andina nomu Allah tutir sanemu raro vetutira, ma nomu wainunu pai vetutira, ma nomu paja pai vetutira, ma nomu sanepaja vetutira, sanepai siniotu vevesiei pasia masi ariri mesanemipai mene tarai pasi mesari pa.”

28Yesus kievo so i e diojo, “Vevata mo ariri kuevo pa, e buono ariria, amamo tuenam.”

29Vape siniotu pai kievo e diojo ave nie pa tindija. Apa dutana Yesus, “Ine maneta pai ma teinina?”

30Yesus kievo so i e diojo, “Siniotu pesi viar nana Yerusalem so Yerikho. Na ria pai rabua pa siniotu viawara pi pa setapuri, e setawara nie pi kior pasi to sikai, avori sendorai veito vare vioru e sembavuri. 31Avori siniotu Imam pesi ria kota nana ria jani, siejori, avori ria tariri e dinda. 32Toapa jana kota siniotu Lewi 1pesi riama so uta nia na pa; siejor siniotu nei, e ria irari. 33Avori siniotu Samaria pesi diondama, ria na jana kota, siejoro siniotu nei veito sane pa manawar aso sanepai. 34Apa ria dieriasi siniotu pai, avori siara mani e anggur so kapor pai, avori piatasi. Manau pa, siasani ajai so matau nie keledai ria nana pai, janama kiori raso anio aniniena pai e diono ariri. 35Raria kausapa pa diono dinar2 pa muandu so vene anio pai, kievo e diojo ‘Buono ariri, vuori pi to rawai pa, nari isoverasi, na raria isovera wa.’ 36Nanapi nomu sanepaja pai mamo, siniotu nine setoru, teini vie maneta maso siniotu setawara vene pi pai?” 37Amana siniotu nei diojo, “Siniotu vioisara sanepaja pai ja pai.” Apa Yesus kievo e diojo, “Rua e nuenari ariria!”

Yesus riama so Maria tutir Martai

38Janama Yesus andia tutir nie siniotu verausari pasia nana rara pai raropa, avori sendara so aniose pesa. Na jana vavi pesi na jana sano pa Martai, siau Yesus ria so nie anio pai. 39Martai neta katu pai, sano pa Maria. Maria miesoi deriasi Syen Yesus ave diediawa nie kavo aniau pasi. 40Vape Martai ma dio nienaripi vea so nie nanaripi vena anio raro pasi. Apavo ria so Yesus kievo e diojo, “Syen, apavo suejo usara Maria tierir vei jau e inanaripi mesari vea e? Buemiasi ve riama kioto jau.” 41Vape Syen ruar so i e diojo, “Marta, Marta! Sane sasera au e buono marabat maso matau au tutiri pi vepau; 42vape pi pa siri to andi riewai mo. E Maria andi diri viate mo pai to manau, e kasa vekor vurusui va.”