Lukasi 9

Yesus diemiasa nie siniotu sura e muandu verausari pasia

(Mat. 10:5-15; Mrk. 6:7-13)

1Yesus siau nie siniotu sura e muandu verausari pasia, avori diono karakuai e paja so sia ave amamo setatavara wainunu vekariria e setono panam so siniotu vepota. 2E diemiasa sia ave senda e setopa sasara Allah vie pareta ariri Raja pa, e setonae siniotu vepota pa sepanam. 3Yesus kievo maso sia e diojo, “Kasa menggor pi nana mene rara pai va, kasa menggor aitato va, rota sua va, pisia va, pipi va, sasu pa muandu va. 4Mae sia senggor mia mesua so anio pesi mamo, menana jana veito mesuvi na jana ea. 5Mae masisi senggavo pidiara mia, mesuvi vurusu sene aniose pa, e mendora wabu venana mendaemi pasi, ave sive pi reu maso sia.” 6Avori senda wawariri aniose pasi vura e setopanusara Kavo Vesie pai ma setitonae vepota pasia sepanam.

Herodesi tutir Yesus.

(Mat. 14:1-12; Mrk. 6:14-29)

7Herodesi Antipas1, raja veve pareta na Galilea pai, diediawa pi borai veveruana pasi pa mietitiai, aso esia setojo, Yohanesi viono kambu masi pai tienam riwanea na rabua siniotu vevoru pasia. 8Esia kota setojo nabi Eliai andi vieruani riwanea, ma esia kota setojo nabi vepapo pesini siobatai pa. 9Vape Herodesi kievo e diojo, “Yohanesi ma jemias verut pimamuna pasia setaratu ru pai to manau, teini nine ne, andi setojo tiopana vava ninesi pa?” Avori siesera ria, ave siemuai Yesus.

Yesus diono pisia maso siniotu pa sembe siaran rim

(Mat. 14:13-21; Mrk. 6:30-44; Yoh. 6:1-14)

10Yesus nie rasul pasia sesovera e setopanusara pi senanari to manau pasi vura maso Yesus. Janama Yesus tuva sia, avori senda mesari so aniose Betsaida. 11Vape veito siniotu pasia sendui ariri vava pa, apa senda usara Yesus. Apa kior sia, avori kievo so sia nana pa Allah vie pareta ariri raja pa. E I kota dionae vepota pasia sepanam na rabua sia. 12Veito diru pai riama, nie siniotu sura e muandu verausari pasia sendama so Yesus e setojo, “buemiasa kaiwasa nine sia senda so aniose vederiasi, ave sesasera uta vienana tutir pisia aso uta nine ma seja.” 13Vape Yesus kievo so sia e diojo, “Mia nari metono pisia so sia.”

Apa nie verausari pasia setojo, “Pi vena amane mamami ne rim e dia ne muandu to. Apavo ave amamo amanda amambori pisia so kaiwasa borai nine sia e?” 14Na jana mua vea, sepau pa vare sembe siaran rim.

Yesus kievo so verausari pasia e diojo, “Metamiasa sia e semasoi e sembe kuaruvi. Apa kuaruvi pa siri ma sembe siniotu muandu e sura.” 15Apa nie verausari pasia setono ariri Yesus kievo pa. 16Janama Yesus kior mamami rim pasi tutir dia muandu pasi, avori siejo sasana so rora wa e tiopana vesie maso Allah. Manau na jana piosasavu mamami pasi tutir dia pa muandu sandu, e dionasi so nie verausari pasia ave sembovosi usara kaiwasa pasia vura. 17Kaiwasa pasia vura setapi to semosir. Avori Yesus nie verausari pasia senduiri tamua verawai pasi pa kondiomi pa sura e muandu.

Petrusi ruara maso Yesus

(Mat. 16:13-19; Mrk. 8:27-29)

18Nana raria pesi pa, rabua Yesus dio vie nadi mesari, apa nie verausari pasia sendama so i, avori duta sia, “Ariri kaiwasa pai senggavo pa, teini jau?” 19Apa senduar so i e setojo, “Esia setojo Yohanesi viono kambu masi paina. Esia kota setojo Elia, esi pasia setojo, nabi vepapo pa esi ni tienam riwanea nine.” 20Yesus duta sia riwanea e diojo, “Vape ariri mia mamo, teini Yau?” Apa Petrusi ruar e diojo, “Au ma Raja vekor vesie nana Allah.” 21Avori Yesus dierandu sia to karakuai, ave amamo setopanusari maso esia.

Yesus kievavo nanapi nie marior pai tutir voru pai

(Mat. 16:21-28; Mrk. 8:31—9:1)

22Avori Yesus kievo riwanea, “Atuma Siniotu pai nari siemuai marior vepau e veveru pasia, imam baba pasia, siniotu veruin sasavu kavo aniau na torat pasia nari senggavo pidiari. Nari semuni vape nana raria veve toru pai tienam riwanea.” 23Avori Yesus kievo so siniotu venana jasia vura, “Siniotu teini dio ria usara Jau, mamo nari piorasa riwani e sieriou nie aitabat pai raria vura e ria usara Jau. 24Aso teini dio rut tawana nie tenam pai, nari nie tenam pai niai. Vape teini nie tenam pai niai aso ria usara Jau e tiopana Kavo Vesie pai, amamo nari siemuai tenam viaworoi pai. 25Vitopi vesie maso siniotu pa esi siemuai dunia nei vetutira, vape nari kieriria e nie tenam pai niai pa? 26Masisi teini miemaja tiopa sasara jau tutir ine kavo nei, amamo Atuma Siniotu pai nari miemaja tiopa sasari nana raria riama tutir nie sasaar pimasa visanggapara pai, ma tamani nie sasaar pimasa pai kota tutiri siniotu rora veve sren pasia. 27Vevata mo, ikavo maso mia e jojo: toapa rabua mia na nine esia semboru e, esia ma setenam veito sesajo Allah vie pareta ariri Raja pa.”

Yesus vieruani nana sasaar pimasa pai na wi pa vavo pa

(Mat. 17:1-8; Mrk. 9:2-8)

28Vare raria rim e toru kiara, janama Yesus dieniniau vava jasi vura, Yesus kior Petrusi, Yohanesi tutir Yakobusi e setauta ajai so wi vavopa ave vie nadi. 29Yesus andia vie nadi na jana pa, rurawa pa ombesiei e nie sasu pasi simamara veito sisanggapara. 30Worabua va siniotu pa e sandu, sumberuana e sunggavo tutiri. Sandu ma Musai tutir Eliai. 31Sandu sumberuana nana sasaar pimasa visanggapara nana rora pai. Sunggavo tutiri Yesus nanapi Nie voru pai nana Yerusalem ariri Allah Nie sanepaja . 32Na jana Petrusi tutir nie maneta pasia setena, sesobata sia aso sesajor Yesus vieruani nanapi rurawa sasaar pimasa visanggapara pai, e siniotu pa muandu surosa tutiri pa. 33Na jana siniotu ne sandu suro sumbavuru Yesus pa, Petrusi kievo maso I e diojo, “Guru, vesie vesiri so amanana uta nine pa. Vesie mamo amananari java pa toru, siri so Au, siri so Musai e siri ea so Eliai.” Vape Petrusi tietara ariri kavo vitopi kievora pa.

34Aja Petrusi kievo rami, arepa pesi riama e tievun sia. Na jana senana arepa pa raro pai, apa sematai. 35Apa setadiawa raupui pesi kievo nana arepa pa raropa e diojo, “Ine atuma jiri to manau pai nine. Ariria mamo metadiawi!”

36Raupui nine setadiawa to manau, sesajo Yesus miesari na jana. Nie verausari pasia setaniwara vava jana e setopanusara pi sesajora nesi so esi ea va.

Yesus dietavar wainunu vekariria nana atuma vepota pai

(Mat. 17:14-21; Mrk. 9:14-29)

37Raria kausapa pai ma sembiar nana wi pa, kaiwasa pa sepau e sendama ave sesamuai Yesus. 38Siniotu pa esi nana kaiwasa pai dienanar e diojo, “Guru, isau so Au ave amamo suejo ine atuma wai, aso i ma ine atuma siria pai na. 39Esa mamo wainunu vekariria pai sua nana pa, amamo tiendor dienanar e nie tarai pai ririojar veito sore pai vie wopapus. Wainunu ninei dionae mierior vea e kiembarai vievuri. 40E isau to manau so nomu verausari au pasia, ave setatavar wainunu vekariria jani, vape diadi va.”

41Apa Yesus kievo e diojo, “Hei, Siniotu nine mia, mia ma vevata mo siniotu vesanemitiar va e venganggau pa mia na. Ja ma inana tutir mia e jenota mia veito nari raria to nina ea? Kuor atumui maso nine!”

42Janama atuma pai riama deriasi Yesus, amana wainunu vekariria pai biari avav so kakopa pa e tienandor. Amana Yesus kievo masa wainunu vekariria jani suvi e atuma jani pienam, avori diosoverai so tamani. 43aApa kaiwasa vura setandor sesajo paja vebaba na Allah.

Yesus kievo nanapi Nie voru pai

(Mat. 17:22-23; Mrk. 9:30-32)

43bNa jana kaiwasa pasia, setandor to senggavo usara so vava borai nienari pasi rami e, Yesus kievo maso nie verausari pasia e diojo. 44“Metadiawa e meparo va so vitopi ikavora ne: Atuma Siniotu pai, nari sesiwi maso siniotu vene paja pasia.” 45Nie verausari pasia setapu kavo jana va, aso ve aniwara maso sia, ave senduin ariri va. Ma sematai setutana vava jana maso I.

Teini bieba mo na nie verausari pasia.

(Mat. 18:1-5; Mrk. 9:33-37)

46Apa Yesus nie verausari pasia sembaririwi aso teini bieba mo na rabua sia pa. 47Vape Yesus ruin sene sanepaja pasi. Toapa jana kior atuma katu pesi e dionae diosa siwari. 48Avori kievo maso sia, “Teini dio kior atuma katu ninei nana sano ne, amamo i ma kior Jau, E teini kior Jau, mamo kiori Allah viamiasa Ja wai. Aso siniotu ve madia mo na kasau mia, Andi bieba mo.”

Teini dierandu mia va, i ma niavori mia

(Mrk. 9:38-40)

49Yohanesi kievo, “Guru, amasajo siniotu pesi dietavar wainunu vekariria nanapi sanomu pa, apa amataranduni, aso i ma ria usara tata va.”

50Yesus kievo maso i e diojo, “Mesuari vape moja, aso teini kievo vavera tutir mia va mamo, i ma nia vori mia.”

Yesus tutiri siniotu Samaria pai

51Nanapa vare deriasi so raria Yesus dio sia so rora pa, diara nie sanepaja pai, ave dio ria so Yerusalem. 52Apa diemiasa siniotu pa sembe toi sepaponi. Senda sesua so siniotu Samaria pa sene aniose pesa ave sembe masis pi borai maso Yesus. 53Vape kaiwasa Samaria ne sia senggambarai, aso nie rara pai ma ria so Yerusalem. 54Apa na jana nie verausari pa sumbe muandu, Yakobusi tutir Yohanesi, susajo vava nine pa, sunggavo e surojo, “Syen, muajar mamo amuramiasa adia pesi e viar na rora wa mesu ave diana tutir kaiwasa nei e?”

55Vape Yesus mienawer e kiesiou sia. 56Avori senda so aniose pesa ea.

Kaiwasa vio verausara Yesus

(Mat. 8:19-22)

57Na rabua Yesus ria tutir nie verausari pasia pa, siniotu pesi kievo so Yesus e diojo, “Jai, jo ira usara Au, so topina vea!”

58Apa Yesus kievo so i e diojo, “Warasiriwai pai ma dionie kamberei, e Aja pai dionie karai, vape Atuma Siniotu pai ma viero uta dipiri ru pa.” 59Avori Yesus kievo so siniotu pesi ja e diojo, “Rua usara Jau!”

Vape siniotu pai diojo, “Buono kasau e ira ive kubir jai papori.”

60Vape Yesus kievo so i e diojo, “Piesa va siniotu vevoru pai kubir nie siniotu vevoru pai.2 Vape au ma rua so topina vea ave tuopanusara Allah vie pareta ariri Raja pa.”

61Siniotu vevesiei pesi kota dionggavo e diojo, “Ja ma nari ira usara Au, vape buonae ira itopan sasara so ine anio rarowa papori.”

62Vape Yesus kievo so siniotu jani e diojo, “Siniotu pesi dio vie bajak, e mienawer tara karu pa, amamo sa sua e vie kuaruvi nana Allah va.”