Lukasi 8

Vavi pasia senanaripi Yesus

1Woroi pesa va mana, Yesus ria wawariri so aniose vebaba pasi, e aniose katu pasi, e tiopanusara kavo vesie nana Allah vie pareta ariri Raja pa. Nie verausari pa sembe sura e muandu senda tutiri. 2E vavi pa esia kota senda usara Yesus. Dionae sepanam na pota pai e dietavar wainunu vekariria pasi vurusu sia. Ariri Maria sesauwa ve Magdalenai, andi Yesus suviri wainunu vekariria pa rim e muandu venana pasi, 3kota Yohanai, Khusai bendahara Herodesi vinie paina; kota Susanai ma vavi vevesiei pa esia sepau. Vavi nine sia senggor matau sene pi vepau pa e setinanaripi so Yesus tutir Nie verausara pasia.

Kavo tarawa na siniotu vetotapa pi mor

(Mat. 13:1-9; Mrk. 4:1-9)

4Kaiwasa pa ria vei vea maso Yesus nana bendar vura, nana rabua kaiwasa vepau pasia senduir to manau pa, Yesus kievo so sia nana kavo sora tarawa tonine, 5“Siniotu viono romi pesi suvi ria ave dio tiotapa pi mor, ria tiotapa pi mor pasi, apa esasi sitawa na ria derepa, siniotu sitapatatasi ma aja pa sirama e siasi to sikai mo. 6Esasi ma sitawa nana uta veve rovuki. Nana raria sitipu pa mana simaninu aso kakopa pai sienaja pana. 7Esasi ma sitawa ea na uta veve samue waititi veve sinia pasi e sitipu, avori sisop kepana tuba pasi veito sivoru. 8E pi mor pa esasi sitawa na kakopa viate pai, apa sitipu e sisuvir buo sipau pa utin siri e rawai.”

Yesus kievo kavo sora tarawa pai to manau pa, e diojo, “Teini vie taradiau mamo, diediawa!”

Aso vitopi Yesus kievo na kavo sora tarawa pa

(Mat. 13:10-17; Mrk. 4:10-12)

9Yesus nie verausari pa setutani nanapi kavo sora tarawa pai, nie tarai pa. 10Yesus ruar so sia e diojo, “Mesamuai vesie ave amamo menduin vianiwara nana Allah vie pareta ariri Raja pa. Vape maso siniotu vevesiei pasia ma jeniniau sia tutiri kavo sora tarawa vea, setaduata vape sesajo va; e setadiawa vape senduin va.”

Yesus tiopan sasara kavo sora tarawa ninei nana siniotu vetotapa pi mor

(Mat. 13:18-23; Mrk. 4:13-20)

11Kavo sora tarawa ninei nie umaja pa nine: Pi mor jani ma Allah nie kavo pai na. 12Pi mor vetau na ria dere pai ma, siniotu viadiawa Allah nie kavo to manau pasia na. Avori Bilis pai riama e diewara kavo pai vurusu sia na sesanemi raro pasi ave setisanemitiar e sesamuai vesie pai vape moja. 13Pi mor vetawa na uta veve rovuki pai ma miesi ariri siniotu viadiawa Allah nie kavo pai, kiori tutiri sane vesasie. Vape kavo nei ma vie war na sesanemi raro pasi va, setadiawa ma sesanemitiar katu vea, e nanapi raria sotoura pai riama mana, semanau sene sanetiar pai. 14Pi mor vetawa na uta veve samue veve sinia ma miesi ariri siniotu viadiawa kavo nei to manau, vape sesanemi sasera sia nanapi sene tenam pai, e seto sesamuai pi vepau, e sane vesie na dunia nei. Jasi vura sisop kepana sia veito sisuvir buo viate va. 15Mae pi mor vetawa na kakopa tarai pai miesi ariri siniotu viadiawa kavo nei, ma vepiri ariria na vesanemi raropa to vesie ma tindija. Senggarakuai veito sesuviri buo.

Kavo tarawa nana padamara

(Mrk. 4:21-25)

16“Sa esi kiair padamara pesi e kukuv tawani tutir kabesu va, pivai piri nana patar sanevava pa va, vape nari piri padamara pai nana nie uta vetariai, ave amamo siniotu vesua so anio pasia, sesajo nie vesasaar pai.

17Pi borai vianiwara pasi ma nari siveruana, e pi senduini varami pesi, nari siveruana, e senduinasi.

18Toapa jana mesanemipai to vesie mo vitopi metadiawa pa. Aso teini siemuai to manau pai, nari siemuai to pau rawai; vape teini siemuai va pa, katu venana i rami pa, nari vekor vurusui kota.”

Yesus siniani tutir raruo pasia

(Mat. 12:46-50; Mrk. 3:31-35)

19Yesus siniani tutir neta pasia sendama so I, vape sendama so Yesus va, aso kaiwasa pai piau. 20Apa siniotu pesi riama tiopa so Yesus, “Jai siniamui tutir nemetapi sia, senana vorira wa. Sesanemi pai seto sendama so Au.”

21Vape Yesus kievo so sia e diojo, “Siniotu viadiawa Allah nie kavo e venanari ariria pasia na, sinia e neta pa siana.”

Yesus suara diobara pai

(Mat. 8:23-27; Mrk. 4:35-41)

22Nana raria pesi pa Yesus siajai so wa pai tutir nie verausari pasia, kievo so sia e diojo, “Mendama ve tatapai avaru so ruru ne rawesi wa.” Apa setapai arau.

23Nana kasau setapai pa, Yesus diena, worabua pesa va, amana diobara pai viar na ruru pai. Apa bata pasi sisua nana wa pai, sia vura senana kariria pai. 24Nie verausari pa sembauni e setojo, “Guru, Guru, tanggariria!”

Apa Yesus biatai, avori kievo suara wana pai tutir bata pasi. Apa wana pai tutir bata pasi si manau avori rawana pai mieri. 25Avori kievo so sia e diojo, “Mene sanetiar pasi topina?”

Apa setandor veito sematai e senggavo e setutan sia vavera, “Siniotu ninei ma teini nine mone veito kievo e wana e bata pasi sunggorusari!”

Yesus diono panam so siniotu veter wainunu vekariria pai

(Mat. 8:28-34; Mrk. 5:1-20)

26Yesus tutir nie verausari pasia setapai avaru so uta Gerasa na ruru Galilea rawesi pa. 27-29Na uta Gerasa, siniotu pesi tier wainunu vekariria. Siniotu jani ma ria na aniose baba. Woroi vesiri i ma dievavara sasu va e kiembarai miesoi na anio. Dio miesoi na papi1 pasi vea. Esa mamo wainunu vekariria pa siepairi vavera, apavo setavit tawana vara ma ae pasi tutir wai rante avori setaramani, vape piotu wasi, e wainunu vekariria pai kiori so uta veseja.

Na jana siejo Yesus viar nana wa pai, siniotu veter wainunu vekariria pai ria ma ave siemuai Yesus. Dienanar to baba vesiri avori disana aebu na Yesus aropo pa. Avori Yesus diemiasa wainunu vekariria pasi sisuvi, vape siniotu pai kievo e dumi, “Yesus, Atuma Allah vetariai mo panau! Vitoni buo buoni maso jau pa? Isau so au, buono marior so jau vape moja!”

30Yesus dutana siniotu jani e diojo, “Sanomu pa teina?”

“Sano pa Legion2,” siniotu jani ruar so I, aso wainunu vekariria pa sipau sisua na nie tarai raro pai. 31Wainunu vekariria3 pasi sisau so Yesus ave dietavar sia so uta kurumi voru4 pai raropa vape moja.

32Deriasi uta jana pimuna tau pimasa pesi asija sira e sisasera pisia na dere wisi pa. Wainunu vekariria pasi sisau so Yesus, ave diemiasa sisua so pimuna tau pasi. Apa Yesus miajar. 33Apa wainunu vekariria pasi sisuvi na siniotu pai e sisua na pimuna pasi. Avori pimuna tau pasi siepai e sikopa na derewisi pa so ruru pai raropa, avori simarutu e sivoru.

34Avori siniotu viarama pimuna pasia sesajo vitopi veruana to manau pa, setapai e setopanusara vava jana so bendar pai e aniose vederiaisi pasi. 35E kaiwasa pasia sesuvi ave sesajo vitopi veruana pa. Sendama so Yesus, apa sesamuai siniotu vetere wainunu vekariria pasi sivavuri e miesoi deriasi na Yesus ae pasi. Dievavar to manau e nie sanepaja pai tindija to manau. Apa sematai. 36Siniotu vesajo vava jana mesari pasia, setopanusara so siniotu verama pasia, toane toi tutir siniotu veter wainunu vekariria pai pienam pa. 37Avori kaiwasa vura venana Gerasa pa sesau so Yesus, ave vievu vurusu sia, aso sematai pana. Apa Yesus siajai so wa pa, avori setapai riwanea. 38E siniotu veter wainunu vekariria pa sivavura to manau pai siau so Yesus ave amamo diadi so dioti.

Vape Yesus diemiasi e diojo, 39“Vuevu so nomu anio pai e tuopanusara vura vitopi Allah nienari maso au to manau pa.”

Siniotu jani ria wawariri so bendar pasi vura e tiopanusara vava vitopi Yesus nienari maso i pa.

Yesus dionae Yairusi atu pai biatai e vavi veter pota samir pai pienam.

(Mat. 9:18-26; Mrk. 5:21-43)

40Janamari Yesus siovera ea avaru so ruru pai rawesi wa, kaiwasa pai diosa vediori tutir sane pa vesasie aso setanotai pana. 41Apa siniotu pesi diondama sano pa Yairusi. I ma veveru na anio ari agama Yahudi. Disa aebu na Yesus aropo pa e siau so I ave amamo Yesus ria so nie anio wai, 42aso atu vavi siria pai nie tenam pa taun sura e muandu, vare vioru. Nana rara pai raro pa kaiwasa pai siorum kobar Yesus. 43Na rabua sia pa vavi pesi kota ma tier pota veria vavi pa veito taun sura e muandu. Suvir nie pi vepau pa vura to kai ave dinggo airawi na dokter pai, vape varo viona e pienam. 44Vavi ninei, ria dieriaisi Yesus nana karu pa, e diekara rut nana sasu viaroi pai sope pa. Oras jani kota, apa nie veria pai sioeta. 45Avori Yesus duta, “Teini diekama rut ja pa?” Amana esi dinggavo va. Avori Petrusi kievo e diojo, “Guru, kaiwasa pai piau e sesorum au e sesobabuasa au.” 46Yesus kievo e diojo, “Vape siniotu pesi ni dieka ma rut ja pa, aso iruina paja venana ja pesa suvi pa.” 47Vavi pai ruin so nie vava nienari pa veruana. Apa mietai veito titiat apa disa aebu nana Yesus aropo pa. E tiopa sasara so kaiwasa borai pasia aso vitopi vediajara e ruti pa, e nana oras jani kota pienam. 48Apa Yesus kievo maso vavi pai e diojo, “Ine atuma panau, aso sanetiar maso jau, puenam! Apavo vuevu tutir vesie pai.” 49Yesus andija kievo rami, siniotu pa esia sendama nana Yairusi nie anio pai, veveru na anio ari agama Yahudi pai. Senggavo e setojo, “Nomu atuma vavi pai vioru to manau, buo vaveri Gurui ea vape moja!” 50Vape Yesus diediawa pa, kievo so Yairusi e diojo, “Muetai va, sanetiar vea nari atumui pienam.” 51Nana rabua Yesus riama so Yairus nie anio pai pa, dierandu e, kasa esi ria usari rapui va, vape Petrusi, Yohanesi tutir Yakobusi e atuma nei siniani tamani sandu vea. 52Kaiwasa pasia sesai e senggavavo. Vape Yesus kievo e diojo, “Mesai vape moja. Vioru va vape diena vea. 53Kaiwasa pasia semari Yesus, aso senduin atuma nei vioru to manau.” 54Avori Yesus dieka rut atuma pai vara pa e siau e diojo, “Kavi suobata au.” 55Apa atuma nei nie wainunu pai siovera maso i, janama atuma vavi pai biatai e diosa. Avori Yesus diemiasa sia e setona e diapi. 56Atuma nei nie baba pasia sesajo pa setandor. Vape Yesus suara sia ave setopa so esia va kota.