Lukasi 7

Yesus diono panam so veveru nana verut pimamuna viosa usari Roma pesi nie womi pai

(Mat. 8:5-13)

1Yesus kievo so kaiwasa vepau pasia to manau pa, Yesus ria so Kapernaum. 2Nana jana veveru nana verut pimamuna viosa usari Roma pesi nie womi sanepai mo pai. Womi jani piota e vare vioru. 3Ma na jana pa veveru nana verut pimamuna viosa usari nei diediawa topanusara nana Yesus, apa diemiasa veveru na siniotu Yahudi pa sembe toi e senda so Yesus e sesau ave riama diono panam so nie womi pai. 4Sendama so Yesus e sesau maso i, senggavo e setojo, “I ma ave amamo sane pai mo, 5aso i ma andi sane pai tane kaiwasa nei e andi viaun tane anio ari agama Yahudi pai so tata.”

6Janama Yesus ria tutiri sia. Na jana Yesus vare deriasi anio pai, veveru nana verut pimamuna viosa usari pai diemiasa nie maneta pasia sendama so Yesus ave setopa e setojo, “Jai, rukakarau e rua so ine anio wai vape moja, aso ipaja va so ikor Jai au maso ine anio raro ne. 7Apa ja ma matau iruin toapa diadi so irama so au va pa, ave irama so Au. Vape kuevo kavo sope pesa vea, amamo nari ine womi ninei pienam. 8Aso ja kota ma siniotu ve na dou ni jau, e viona dou na ja pasia kota ma siniotu verut pimamuna siana. Apavo masisi ikavo maso ine womi pesi e jojo, ‘Rua!’ amamo ria, e masis ikavo maso esi kota, ‘Ruama!’ amamo riama, toapa jana kota ikavo maso ine womi pesi, ‘Nuenari pi nine!’ amamo nari nienari.”

9Yesus diediawa kavo jana pa. Tiendor e kievo usara, avori mienawer maso siniotu ve pau verausari pasia, e diojo, “Ikavo maso mia e jojo, sanetiar ve baba veito nine ma aja isamuai esa va, kota nana rabua siniotu Israel pa mia!”

10E avori siniotu diemiasa pasia, sesovera so anio wa, sesamuai womi vepota pai pienam to manau.

Yesus dionae atuma vavoru vevoru na Nain pai biatai

11Avori Yesus ria so aniose vesanomi na Nain. Verausari pesia e kaiwasa pesia senda usari. 12Janama Yesus ria ma dieriaisi rature baba aniose pai, senggor siniotu vevoru pesi e sesuvi tutiri. Wominggo nei ma inar pesi nie atuma mua siri paina, apa kaiwasa venana aniose pa esia senda usara inar pai. 13Na jana Syen siejora so inar nei pa, Syen sanepai veja, avori kievo so i e diojo, “Suai vape moja!” 14Janama Yesus riama dieriaisi wominggo pai e piri vara pa ajai so i . Apa vesariowa pasia semanau eta. Avori kievo e diojo, “Eh katiei panau, itopa so au, buatau!” 15Apa siniotu pai biatai e miesoi e kievavo, avori Yesus dionia so siniani.

16Siniotu pasia vura sematai e sesanandik Allah. Ma senggavo e setojo, “Siniotu nabi baba pa esini suvi na rabua tata ne! ma Allah riama to manau so nie kaiwasa nei!”

17Apa topanusara nana Yesus ninei imasiepara usara so Yudea ma uta ve nana pasi vura.

Yesus tutir Yohanesi viono kambu masi pai

(Mat. 11:2-19)

18Yohanesi nie siniotu verausari pasia setopa maso Yohanesi, so vava borai jasi. 19Apa Yohanesi siau siniotu verausari pa sumbe muandu. Avori diemiasa sandu e suruta maso Yesus tonine, surojo, “Jai Au nari Ruama ne te, amatanota siniotu vevesie e?”

20Na jana siniotu ne sandu sundara so Yesus, sunggavo e surojo, “Yohanesi viono kambu masi pai diemiasa nandu ma amuruta Au, avo au nari ruama ne te Amatanota siniotu vevesiei pesi e?”

21Nana rabua jana Yesus diono panam so kaiwasa vepau pasia na pota saserai, e dietavar wainunu vekariria e ditona e veremi kaber pa sepau sesajo. 22Apa Yesus ruar maso sandu e diojo, “Munda e mutopa so Yohanesi vitopi musajora e muradiawa pa: veremi kaber pa sesajo, veraemi marera pa senda, vetere pado pa sepanam, siniotu viadiawa va pasia setadiawa, siniotu vevoru pa sesobata sia e maso siniotu vevaro pi pasia sesamuai Kavo Vesie. 23E vesie maso siniotu vesanemi sasera maso jau va, ma vetawa irara jau va.”

24Yohanesi nie siniotu diemiasa ne sandu sunda to manau pa, janama Yesus kievo maso siniotu borai pasia nana pi Yohanesi, e diojo, “Aso vitopi meto menda so mapar kurumi wa pa, ave mesajo vitoi? Samue wana sio riria nina e? 25Vitoni menda mesajori pa? Siniotu viavavara sasu viate te? Siniotu viavavara sasu vesie pa sia ma setenam nanapa pi vepau e semasoi na anio baba masasoija na raja! 26Apa mesuvi ve mesajo vitoi? Mesajo nabi nina e? Tindija, e ikavo maso mia, Yohanesi ma nie Masasoija pai riewai mo kota nanapa nabi pesi. 27Aso Yohanesi ninei andi setopani nana Repo pai pa.

Allah kievo e diojo, ‘Suejo, Ine amias pai nine,’

‘Jemiasi e piepo nana Au,

ave amamo sieva ria pai maso Au!’”

28Ikavo maso mia e jojo, “Nana dunia nei ma varo siniotu vebaba rawai mo nanapa Yohanesi. Vape siniotu vemadia mo na rabua kaiwasa vesanemitiar maso Yesus Kristus, ma bieba rawai nanapa Yohanesi viono kambu masi pai.”

29Kaiwasa vura, kota maso siniotu vesau pajak pasia, setadiawa Yesus kavo kievora pasi; sia ma siniotu vekor usara Allah nie kavo to manau pasia na, ma sesamuai kambu masi na Yohanesi to manau. 30Vape siniotu Farisi pasia e siniotu veruin sasavu kavo aniau na Torat pasia ma setawa pidiara Allah nie sanepaja maso sia, aso sia ma senggambarai sesamuai kambu masi na Yohanesi.

31Yesus kievo e diojo, “Tutir vitoi, nari jonae jitato usapui nine sia pa? Semasi vaveri tutir vitoi ne? 32Sia ma semasi tutiri atuma vemasoi na uta vevovopi e kuaruvi esi pa sienanar so esi pai e diojo, ‘Amambuvu songger maso mia, vape menggambarai memajai, amandoi ranu sai so mia, vape mesai va.’ 33Aso Yohanesi viono kambu masi pai riama, i ma dian mamami va e ditunu anggur va, e mia menggavo e metojo, ‘I ma tiere wainunu vekariria.’ 34Janama Atuma Siniotu nei riama, diapi e ditunu, avori mia menggavo e metojo, ‘Mesajora, siniotu wani! Dianggutu e dunu bari, vie maneta tutiri siniotu vesau pajak e siniotu veve tatar.’ 35Vape Allah nie sanepaja vetindija pai vie ruana na tenam siniotu vekor usari pa sia.”

Yesus nia na Simoni nie anio pai

36Siniotu Farisi pesi siau Yesus ave ria miesoi e diapi nana nie anio pai. Yesus ria so siniotu Farisi pai nie anio pai, avori miesoi diapi. 37Na aniose baba jana vavi pa siri ma vie sano ariri vavi veve tatar. Na rabua vavi jani diediawa so Yesus andija diapi na siniotu Farisi pai nie anio pai, riama tutir kior mani vesairara nana pani senanari nanapi rovuki viate nina. 38Diosa na Yesus karu pa deriasi ae pasi e siai, e rerukaru pasi sitatura so Yesus ae pasi. Avori kirurana Yesus ae pasi na rurandau pasi, avori sum na ae pasi e dimbuvu mani vesairara pai. 39Janama siniotu Farisi vesau Yesus nei siejo vava jana, apa kievo na sane raropa, “Masisi nabi nina mamo nari ruini vavi viakara veruti pai ma teinina, aso vavi ninei ma vie tatar pana!”

40Avori Yesus kievo maso i e diojo, “Simoni, piesa nari jo ikavora maso au ne!”

Simoni ruar e diojo, “Guru, kuevo vea.”

41Yesus kievo e diojo, “Siniotu pa sumbe muandu sune niaki nana siniotu viono pipi pesi. Esi pai vie niaki pipi dinar pa utin rim, mae esi pai nie siniotu muandu e sura. 42Aso diadi so susovera niaki ninesi va, apa rura sune niaki ninesi. Apavo nana rabua siniotu nine sandu, teini sanepai siniotu viono niaki pai to rawai mo?”

43Simoni ruar maso i e diojo, “Na ja mamo, siniotu vene niaki vepau rawai rura pai.” Yesus kievo maso i e diojo,

“Nomu sanepaja pai tindija.” 44Avori mienawer maso vavi jani e kievo maso Simoni e diojo, “Suejo vavi ninei? Isua so nomu anio nei, vape buono kambu pesa so Ja ave iruasa ae nesi va, vape i ma ruasa ae nesi na rerukaru pasi, e kiruranasi nana rurandau pasi. 45Au ma sumu Ja va, vape nana Isua pa i ma dimanau sumu ae nesi va. 46Au ma vuvu mani vesairara na ru nei va, vape vavi ninei ma vuvu mani vesairara nana ae nesi. 47Aso toapa jana, ikavo maso au e jojo: Nienari vava vesie pa pau aso Syen vie ampun nomu tatar vepau jasi to manau! Masisi siniotu pesi ruin mo Syen vie ampun nie tatar pasi katu vea, amamo nari sane pai Syen katu vea.”

48Avori kievo maso vavi jani e diojo, “Syen vie ampun nomu tatar pasi to manau.”

49E kaiwasa vemasoi e viapi tutir I pasia, sesanempai usara nana sesanemi raropa, “Teini nine ne, apa veito diadi vie ampun tatar pasi pa?”

50Vape Yesus kievo maso vavi pai, e diojo, “Nomu sanetiar pai, kior vesie maso au to manau. Rua tutir vesie pai!”