Lukasi 6

Yesus nie siniotu verausari pasia sendosu gandum buo pasi nana raria Sabat

(Mat. 12:1-8; Mrk. 2:23-28)

1Nana raria Sabat pesi pa, Yesus ria tutir nie siniotu verausari pasia senda nana romi gandum pesi, apa nie siniotu verausari pasia setema gandum buo pasi. Setasa gandum pasi nana sembarami pasi avori setasi. 2Avori siniotu Farisi pasia senggavo so Yesus e setojo, “Aso vitopi mendawai tane hukum agama pasi e menanaripi viaranduna nana raria Sabat pa?” 3Avori Yesus ruar so sia e diojo, “Aja metap vitopi Dauti nienari pa varami e? Na rabua ria tutir nie siniotu verausari pasia e sembavisi pa? 4Suapui so Anio Syen pai raropa e kior mamami veve pi som pasi, avori diasi e dionasi so nie verausari pasia. Vape mamami jasi ma sa setani jasi va, ave imam pasia reto.”

5Avori Yesus kievo e diojo, “Atuma Siniotu paini piaja, so raria Sabat pai!”

Siniotu vevarami marera rawa siri pai pa

(Mat. 12:9-14; Mrk. 3:1-6)

6Nana raria Sabat vevesiei pesi pa, Yesus sua e dieniniau na anio ari agama Yahudi pai. Siniotu vevarami marera rawa siri pesi andia niana jana. 7Siniotu veruin sasavu kavo aniau na Torat pasia tutir siniotu Farisi pesia seto sesasera sasara na Yesus ave amamo sembe karaki. Apa sesajo vedior vea so nari dionae siniotu pa pienam nana raria Sabat pe. 8Vape Yesus ruin sene sanepaja pasi. Apa kievo so siniotu vevarami marera pai e diojo, “Ruama buosa na dopo nine!” Apa siniotu pai biatai, avori diosa na jana. 9Avori Yesus duta maso siniotu venana jasia e diojo, “Ariri tane agama pai, vitoini diadi so tananari nana raria Sabat pai? Tananari viate pai te, tananari kariria e? Tatono vesie so siniotu te, viono kariria pai e?” 10Yesus siejo wawariri sia vura, avori kievo maso siniotu jani, “Buora varamu pai.” Apa Siniotu pai diorai vara pa ra, amana vara pa pienam.

11Guru agama pasia tutir siniotu Farisi pasia senggasiou vesiri, Apa setato kavo ave vava vitopi nari senanari maso Yesus pa.

Yesus diri Rasul sura e muandu pasia

(Mat. 10:1-4; Mrk. 3:13-19)

12Nana raria jani Yesus siajai so suovavo pesa ave vie nadi. Na jana vie nadi maso Allah na diru woroi pai. 13Rabua sasaar to manau pa, siau nie verausari pasia, avori diri siniotu pa sembe sura e muandu nana rabua sia, e siau sia ve rasul. 14Simoni (vesau ve Petrus kota), e Andreasi tutir neta pa, Yakobusi e Yohanesi, tutir Philipus e Bartolomeusi, 15Matiusi e Tomasi, Yakobusi Alpeusi atu pai, e Simoni siniotu Zelot1 pai, 16Yudasi Yakobusi atu pai, e Yudas Iskarioti andi vepui viovo Yesus pa.

Yesus dieniniau e diono panam maso kaiwasa pa

(Mat. 4:23-25)

17Manau na jana pa, Yesus viar nana suovavo pai, tutir rasul pasia, janama semanau eta e setosa na uta vebara pesa. Na jana kota Nie verausari pa esia sepau, e kaiwasa na verama nana uta vura senda nana Yudea e Yerusalem, ma aniose vena sasidere Tirus tutir Sidon. 18Sendama ave seto setadiawa kavo na Yesus e setisamuai panam na sene pota pasi. Vetere wainunu vekariria pasia sendama kota ave dionae sepanam. 19Siniotu vura seto sasera ave setakara sendut Yesus, aso paja vesuvi na nie tarai pai ave amamo dionae sia vura sepanam.

Sane vesasien ma sane vekariria

(Mat. 5:1-12)

20Yesus siejo raso nie verausari pasia avori kievo e diojo,

“Vesie maso kaiwasa vevaro pi pa mia,

aso mia nari membe usapui nana raria Allah riama vie pareta ariri Raja pa!

21Vesie maso siniotu vevavisi na raria nine mia;

aso mia ma nari memosir!

Vesie maso siniotu vesai nana raria nine mia;

aso mia ma nari memari!

22Vesie pai maso mia, masisi siniotu pesia semadidi mia e sesisiajar mia ma setawairara mia, e senggavo kavo vekariria maso mia, aso mia ma menda usara Atuma Siniotu pai pana. 23Mesanemi pa siete e memajai tutiri sane vesasie nana raria jani, aso vevata mo mene vait vena rora wai bieba; Toapa jana kota metapumi pasia senanari vava jana maso nabi pasia to manau.

24Vape kariria pai maso siniotu vesamuai pi vepau na raria nine mia;

aso mia ma mesamuai sane vesie pai to manau!

25Kariria pai maso siniotu vemosir na raria nine mia;

aso mia ma nari membavisi!

Kariria pai maso siniotu vemari na raria nine mia;

aso nari mesanemi pa sive sai e nari mesai!

26Kariria pai maso mia, masisi siniotu vura sesanandik mia; aso toapa jana kota setapumi pasia sesanandik nabi vetindija va nana raria vepapo pasi.”

Sanepai siniotu vio vemun au pasia

(Mat. 5:38-48, 7:12a)

27“Vape maso mia viadiawa Ja pa mia nana raria ninei, Ikavo maso mia e jojo: mesanemipai vio vemu mia pasia, e menanari vesie maso siniotu vemadidi mia pasia; 28Mesau ave Allah vie berkat siniotu vesoramo maso mia pasia, e membe nadi maso siniotu venanari kariria maso mia pasia. 29Masisi esi biasar tararei rawesi pa, amamo buono tararei rawesi pa kota, e masisi esi diewara nomu sasu viaroi pai amamo buono nomu sasu pai kota. 30Masisi siniotu pesi siau piesa nana au, amamo buono so i; e masisi diewara vitopi nomu pa, suau sovera vape moja. 31E menanari vesie maso siniotu vevesiei, ariri mesanemi vesie siniotu vevesiei sinanari maso mia kota pa.

32Masisi mesanemipai siniotu vesanemipai mia pasia mamo, apavo metojo nari Allah vie berkat mia e? Siniotu veve tatar pasia kota sesanemi pai kaiwasa vesanemipai sia pa sia kota! 33E masisi menanari vesie maso kaiwasa venanari vesie maso mia vea, apavo metojo nari Allah vie berkat mia e? Siniotu vetatar pasia kota senanari toapa jana! 34E masisi metono niaki pipi vei maso kaiwasa nari vesovera pasia, membaro sanepaja. Siniotu veve tatar pasia kota setono niaki pipi maso siniotu veve tatar, ave sesamuai soverasi! 35Vape mia, mesanemipai sovera so vemu mia pasia e menanari vesie maso sia e metono niaki maso sia tutir mesanemipai so nari mesamuai sovera vape moja. Masisi toapa jana, mene sanepaja pai nari bieba e mia nari memasi tutir atuma Allah vetariai mo. Aso Allah diete maso siniotu veruin vesovera sanepaja va, e maso venganggau pasia kota. 36Vesie pa membe ruana sanepaja pai ariri Tamamui kota vieruana sanepaja pai pa!”

Siniotu vekutu kavo

(Mat. 7:1-5)

37“Menggutu kavo maso siniotu vevesiei vape moja, ave Allah kutu kavo maso mia kota va, e metono hukuman maso siniotu pesi vape moja, amamo Allah kota nari diono hukuman maso mia va. Membe ampun tatar na siniotu vevesiei ave Allah vie ampun mene tatar pasi kota. 38Buono maso siniotu vevesiei, amamo Allah nari diono maso mia kota; nari mesamuai nana pi vepau riwan ea to dionu mo so mia. Aso aitato metona maso siniotu vevesiei pai, nari Allah dionasi so mia kota.”

39Avori Yesus tiopana kavo sora tarawa pesi maso sia, “Masisi siniotu veremi kaber pesi kioro veremi kaber vevesiei pesi, amamo sandu vura nari sutau susa kamberei pa raropa. 40Varo atuma vianiau nari vebaba rawai nanapa guru pai. Vape atuma vianiau pai mienau nana nie aniau pai, nari miesi vaveri ariri guru pai.

41Buotopi suejo kaina venana nomu maneta pai re pai pa, vape ruin moja ai sope venana matau remu pa raropai va? 42Toane toi avori kuevo maso nomu maneta pai e buojo, ‘Manetai, ruama, isuviri kaina venana remu pai,’ vape ai sope vena matau remu pai raropa, i ma suejori va e? Hei, Siniotu viove vetindija pa mia, vape venganggau pa mia! Suviri ai sope vena remu pai papori, manau na jana amamo nari suejo veruana kaina vena nemetapi re pai, avori suviri.”

Airavo pai tutiri buo pai

(Mat. 7:16-20, 12:33-35)

43“Airavo ve tipu e viate pai ma nari suviri buo viate, toapa jana kota airavo vetipu e viate va pai nari suviri buo viate va. 44Aso airavo pa siri-siri tasajo riruini nana nie buo pai, e airavo veve waititi pai kasa suviri buo ara va, e samue veve waititi pai kasa suviri buo anggur va. 45Siniotu viate pai ma suviri vava viate, aso sane raropai dionu tutir ate pai e siniotu vekariria pai ma suviri pi vekariria. Aso vitopi kievora nana sore pa, jana suvi na sane raropa.”

Siniotu veruin pai tutiri siniotu vengganggau pai sumbaun anio pa

(Mat. 7:24-27)

46“Metotopi mesau Jau, ‘Syen, Syen,’ vape venanari ariri vitopi ikavora maso mia pa va pa? 47Siniotu verama so Jau, e viadiawa Ine kavo nesi, avori nienari aririasi pa – Vesie mamo nari iveruana maso mia toapa nine, 48siniotu jani ma miesisi siniotu vevaun anio, sieriai kamberei veito vie raro, avori pir rovuki pai na dou pa e viaun anio pai na rovuki pa vavopa, nana rabua ve posar e maria pai vie posar to tiere anio jani, vape anio pai mienawar va, aso anio jani diosa to karakuai nana rovuki pa vavopa. 49Vape teini diediawa ine kavo nesi e nienari aririasi va, miesisi siniotu vevaun anio vevaro sama dou vekarakuai nana kakopa pa. Na rabua nari posar pai riama riewai anio pai, anio jani tiebari e vekariria pai bieba vesiri.”