Kulvi Outer Seraji Bible
सैणीं गल्ला 22
भलै नाओं मोल
भलअ नाअं अर इज़त हआ
सुन्नैं-च़ंदी का बी खास्सअ किम्मती।
एकी गल्ला लै आसा साहुकार अर गरीब बराबर कि
तिन्नां दुही बणाणैं आल़अ आसा बिधाता।
ज़हा सोर-समझ़ हुई सह मणछ हेरा ज़ाणीं कि आफ़त च़ाल्ली पल़ी अर सह जाआ चतैन हई अर सह हटा पिछ़ू,
पर ऐडअ मणछ डेओआ आजू तैहा ई आफ़ता जैंदरी तेते सज़ा भुगतदअ।
मानदारी दी रहणअ बिधाते डरा हेठै,
बिधाता दैणीं तम्हां लै लाम्मी अमर, माया अर अदर पुआज़अ।
कदुष्ट हांढा तैहा बाता ज़ेथ कांडै अर ज़ुंण ज़िऊआ लै ज़ज़ाल हआ,
ज़ै तम्हैं आपणीं ज़िन्दगी लै झ़ूरा, तै रहणअ एही बाता का दूर।
आपणैं लान्हैं लै डाहणीं होछ़ी उझै बुध खोज़ी कि तिन्नां केही ज़िन्दगी लोल़ी ज़िऊई,
सह रहणीं तिन्नां सारी अमरा आद।
गरीब मणछ हआ सेठो गलाम,
ऋण काढणैं आल़अ हआ साहुकारो गलाम।
ज़ुंण बूराई बऊआ तेऊ भेटा लऊंणा लै आफ़त,
तेखअ हआ तिन्नें रोश्शे मुसल़ी खतम।
खुल्है दिलै दैणअ गरीबा लै नाज़ पाणीं बांडी,
इहै मणछा लै दैआ बिधाता आप्पै बर्गत।
हंकारी मणछा का छ़ड़ैऊ आपणअ पिछ़अ, तै हणअ झ़गल़अ,
हठ अर सुहांग करनै खतम।
ज़सरअ दिल शुचअ आसा अर मोहणैं आल़ी गल्ला ज़ाणा करी,
तेऊ संघै डाहा राज़अ बी संगत।
ज़हा सुंबल़ी सोर हुई, बिधाता करा तिन्नें फाज़त,
पर शल़ैघी अर विश्वास घात करनै आल़ै मणछे सोठ निं सह सफल दैंदअ हणैं।
ज़ैऊंकर मणछ काढा घअरै पल़ी रहणा लै भान्नअ अर सह बोला इहअ,
“ज़ै हुंह बागै डेऊए, तेथ सका मुंह सिह खाई!”
कंज़री बेटल़ीए बोल हआ डुघी खाई ज़िहै,
तेथ पल़ा सह ई मणछ ज़हा का बिधाता नराज़ होए।
लान्हैं हआ सोभै ऐडै ई,
पर नैरी-समझ़ाऊई करै जाआ तिंयां समझ़ी कि किहअ बभार लागा करनअ।
आपणैं नफै लै गरीब ठगी अर सेठा लै भैंट दैई,
इना दुही गल्ला करै हणैं तम्हैं आप्पू ई एक धैल़ै दाल़जी।
तिह सैणीं गल्ला
अक्ली आल़ै मणछै आसा ईंयां सैणीं गल्ला खोज़ी दी,
तेते शिक्षा लाई मंऐं तम्हां लै दैई, एता शूणैं धैन दैई।
ज़ै तम्हैं इना गल्ला आपणैं दिलै डाहे अर इना होरी का बी खोज़े,
सह हणीं दिल खुश करनै आल़ी गल्ल।
हुंह च़ाहा इहअ कि तम्हां लोल़ी बिधाता दी होर बी खास्सअ भरोस्सअ हुअ,
तैही लाई आझ़ मंऐं तम्हां का ईंयां सैणीं गल्ला डाही खोज़ी।
हुंह आसा खास्सै धैल़ै ओर्ही थारी भलाईए गल्ला लिखदअ लागअ द,
मंऐं लिखी तिह एही सैणीं गल्ला, ज़ेता का तम्हां राम्बल़ी सलाह भेटी सके।
इहअ करै लागणअ तम्हां का थोघ कि असली दी सत्त किज़ै आसा,
तेखअ सका तम्हैं तिन्नां सेटा लै राम्बल़अ ज़बाब निंईं ज़ुंणी तम्हैं छ़ाडै दै आसा।
1
इहअ भाल़ी निं गरीबा लै ऐब करी कि सह आसा गरीब,
अर ज़सरी मज़त करदअ कोहै निं होए, दालता दी निं तेऊओ नसाफ मारी।
किल्हैकि तिन्नों पक्ष लणैं आल़अ हणअ बिधाता आप्पै,
अर तेखअ ज़ुंण तिन्नां मारने धमकी दैनी, बिधाता निं तिन्नां मारनै बाझ़ी छ़ाडी गअ।
2
रोश्शा आल़ै मणछे संगत निं करी,
ज़ुंण धखी प्राचदअ शाचा।
इहअ निं हआ कि तेऊ का तूह बी इहअ ई शिखल़े
अर तेरी ज़िन्दगी बी हणीं फाही।
3
होरीए ऋणा भरने ज़मानती निं लई।
बादा का ज़ै सह ऋण नांईं भर्हुअ,
साहुकारा निंणअ ताह हेठा का तेरअ च़ैन बी झाल़ी।
4
सिऊंआं दी दादा-बाबा ओर्ही ज़ुंण ओडै आसा लागै दै,
तिंयां निं ओर्ही-पोर्ही सकैऊंणै।
5
ज़ुंण मणछ कामां-काज़ा लै सज़ाण अर छ़ल़ैघ आसा,
सह करा राज़ै सेटा काम,
इहअ मणछ निं गलाम हंदअ।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.