Kulvi Outer Seraji Bible
सैणीं गल्ला 23
6
ज़ै केभै तम्हैं राज़ै संघै रोटी खांदै बेशे,
तेभै डाहणअ धैन कि तम्हां संघै कुंण आसा बेठअ द।
ज़ै तम्हैं खास्सअ खाणेंओ भैस्स बी किल्है निं होए,
पर तिधी करनअ धख सबर।
तिन्नें भांती-भांतीए भोज़नो मांण निं करी,
हई सका कि तिंयां ताह ई भाल़ै होए लागै दै कि अह किहअ करा!
7
मैन्थ निं सेठ हणां लै करनी,
अक्ली करै डाहणअ सबर।
थारी माया सका एकी घल़ी भितरी खतम हई,
ढब्बै डेओआ हेरा-हेरी मुक्षरलै ज़िहै डैअ बाही दूर।
8
कमिन्नै मणछे घअरै निं छ़ांदअ भेटी बी खांदअ डेऊई,
च़ाऐ तेऊ बधिया का बधिया भोज़ किल्है निं होए बणाअं द, तेतो मांण निं करी।
किल्हैकि इहअ मणछ बोला खाखा का, “होर खाआ, थोल़अ ज़िहअ, खाआ होर,”
पर असली दी हआ सह रोटी गणदअ लागअ द कि केतरी खास्सी लाई खाई।
तम्हां लागणअ हेरे बादा का सह खाअ पिअ पोर्ही हुकरनअ अर
थारै मिठै बोल बी हणैं बृथा।
9
ऐडै मणछा लै बोली निं बैण बृथा पाई,
तिन्नां करनअ तेरी अक्लीए सलाहो सुहांग ई।
10
सिऊंआं दी लागै दै पराणैं ओडै निं ओर्ही-पोर्ही सकैऊई
अर नां छ़ुटै-मुक्कै दै लान्हें खेचा गिम्मी।
किल्हैकि तिन्नां छ़ड़ैऊंणैं आल़अ आसा बिधाता आप्पै ज़हा का सारअ बल आसा,
सह लल़ा तिन्नों मकदमअ आप्पै अर तम्हैं निं तेऊ का ज़िती सकदै।
11
आपणैं गूरूए गल्ला दी दैणअ धैन,
तेऊ का लणअ ज़ेतरअ हई सके तेतरअ खास्सअ ज्ञैन।
12
लान्हैं नैरना लै निं कसर छ़ाडी।
तिंयां निं नैरी-समझ़ाऊई करै मरी च़ाल्लै,
छिहुंटी बाही सका तम्हैं तिन्नें
ज़िन्दगी बच़ाऊई।
13
लान्हैंओ, ज़ै तम्हैं सोर-समझ़ करे,
तै हणीं मुंह खुशी।
मुंह हणअ तैहा गल्लो घमंड,
ज़ै तम्हैं अक्ली आल़ी गल्ला करे।
14
पापी मणछो मांण निं करी,
हर बगत रहणअ आपणीं ज़िन्दगी बिधाते डरा हेठै।
एतो पुआज़अ जाणअ तम्हां आजू भेटी
अर तै हेरनी बिधाता थारी आशा पूरी करी।
15
लान्हैंओ, मेरी गल्ला शूणां, अक्ल करा,
आप्पू डाहणअ भली ज़िन्दगी ज़िऊंणेंओ खैल।
नां तम्हैं शूरी-शराबीए संगत करी
अर नां तिन्नें ज़ुंण शिखा खाणैं पिछ़ू मरी एछा।
किल्हैकि शूरी-शराबी अर छ़ाक्कू मणछा पल़ा दाल़ज।
ज़ै तम्हैं बी ज़ै सिधै खांदै अर सुत्ती रहे, तम्हां लागणै घेरी बी लैऊल़ै बान्हणैं।
16
आपणैं बाबे गल्ला दी दैणअ धैन, ज़ै सह निं हंदअ, तै निं तम्हैं बी हणैं तै,
ज़ेभै थारी ईज प्रोढी होए, तेभै करनी तेसे होर बी खास्सी कदर।
सत्त, अक्ल, शिक्षा अर सुंबल़ी सोर, एता लै करनअ खर्च़ बी,
ईंयां आसा बेच़णां लै बी खास्सी किम्मती।
धर्मीं मणछे ईजा-बाबा भेटा खुशी,
ज़ै लान्हैं अक्ली आल़ै हुऐ, तेता पोर्ही निं घमंड करना लै किज़ै होर आथी।
थारै ईजा-बाबा लोल़ी तम्हां प्रैंदै घमंड हुअ,
खासकर लोल़ी अह खुशी थारी ईजा हुई।
17
लान्हैंओ, आपणअ धैन डाहै,
थारअ च़ाल-च़लण लोल़ी मुंह ज़िहअ हुअ।
कंज़री अर पराई बेटल़ी हआ डुघै कुहै ज़िहअ
ज़िऊआ लै ज़ज़ाल़ ज़ेथ पल़ी कुंण उझै निं निखल़ी सकदअ।
तिंयां हआ ताखुई रही दी अर च़ोरा ज़ेही न्हैल़ी लागी दी,
ताकि तिंयां मणछा मांझ़ै खास्सै मर्धा विश्वास घाती बणांए।
18
कहा आसा कबल्ली आफ़त पल़ी दी?
कुंण आसा हठल़दअ अर झ़घल़दअ लागा द?
कहा आसा खाढ-खोत्तै पल़ै दै?
कसरी आछी आसा लाल हुई दी?
ईंयां आसा तिंयां ज़ुंण आधा राची तैणीं
शूर-शराबा झुटदै रहा लागी।
शराबा भाल़ै निं लागी कि अह भाल़ केही लाल आसा,
गलासा दी भाल़ अह केही च़मक दैआ अर एते भाल़ केही आसा लागी दी।
पर तेतो थोघ लागा दुजै धैल़ै दोत्ती कि
तम्हां लै आसा ज़िहअ शपैल़ै डांग बाहअ द!
आछी का हणीं थारी नुआहरी गल्ला शुझदी लागी दी,
नां तम्हैं राम्बल़अ सोठी सकदै अर नां थारै राम्बल़ै करै गल्ला च़ाल्ली कर्हुई।
तम्हां का ज़ाण्हनअ इहअ कि तम्हैं आसा समुंदरै ज़हाज़े च़ुंडी सुत्ती
राश्शी दी झ़ुलदै लागै दै।
तम्हां बोल़णअ तेखअ इहअ, “मुल्है बाही कुंणी,
पर मुखा निं तेतो थोघ ई लागअ!
हुंह च़िक्कअ कुंणी! पर मुंह निं आद रही!
राच केभै च़ाल्ली भैई, मुंह झुटणीं ती होर शराब?”
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.