Kulvi Outer Seraji Bible
सैणीं गल्ला 21
सोभै गल्ला करा बिधाता आप्पै
बिधाता फरेऊआ राज़ैओ मन्न
ज़िहअ सह च़ाहा तिहअ गाडा-नाल़ी ज़िहअ ओर्ही-पोर्ही।
मणछ सका आप्पू लै इहअ सोठी कि ज़ुंण तेऊ किअ सह आसा ठीक,
पर बिधाता का हआ थोघ कि तेऊए दिलै किज़ै आसा।
काम करनअ सह ज़ुंण ठीक अर भलअ आसा,
तेता करै हआ बिधाता बल़ीदाना का बी खास्सअ राज्ज़ी।
कदुष्ट मणछ हआ तिन्नें घमंड अर रोभे बशै पल़ै दै,
इहअ ई हआ पाप।
ज़ै तम्हैं मैन्थ करना लै थही करै बच़ार करे, तम्हां का हणीं सोभै गल्ला बतेर्ही,
पर ज़ुंण पुंआरा ज़िहअ काम करे तेऊ पल़ा निऊल़।
ज़ुंण माया छ़ल़-कपट करी खटी, सह उडा धूँईं ज़िहअ,
इहअ करनअ हआ आपणैं ज़िऊआ लै ज़ज़ाल़।
कदुष्ट मणछ हआ आपणैं ई उपद्रभा करै बरैबाद,
किल्हैकि तिंयां भलअ करनअ ई च़ाहंदै।
दोशी मणछ हांढा बूरी बाता,
नर्दोश मणछ करा भलै काम।
कबल्ली झ़घल़दी बेटल़ी संघै बडै घअरा भितरी रहणैं का आसा
काशे कशूहल़ी दी रहणअ बित्तअ।
कदुष्ट मणछा हआ किज़ै नां किज़ै कबध खटणें लागी दी,
तिंयां निं तेता लै आपणीं साथी-संघी लै बी झींण करदै।
ज़ांऊं सुहांगा करनै आल़ै मणछा सज़ा भेटा, तेता भाल़ी एछा ऐडै बी समझ़,
अक्ली आल़ै मणछा एछा नैरी समझ़ाऊई करै होर बी अक्ल।
बिधाता आसा शुचअ अर धर्मीं, तेऊ का हआ थोघ कि कदुष्ट मणछ किज़ै करा
अर सह निं तिन्नां सज़ा दैणैं बाझ़ी हटदअ।
ज़ुंण रैनै-गरीबे लेर-पकार शूणीं मज़त नांईं करदअ,
तेऊ लै हणअ तिहअ ई ज़ेभै सह तेऊ आप्पू गरज़ पल़े।
ज़ै तम्हां का कुंण नराज़ होए,
तेऊ लै लागा गुप्त भैंट दैणीं, संघा जाआ सह राज्ज़ी हई।
शुचअ पक्ष लई करै हआ धर्मीं मणछा खुशी,
पर कदुष्टा का ज़ाण्हिंआं सह बरैबादी।
ज़ुंण मणछ सोर-समझ़ निं डाहे,
तेऊ न्हैल़ी हआ मौत लागी दी।
ज़ुंण खास्सै ठाहठ-बाठा लै झ़ूरा तिन्नां लै पल़ा दाल़ज,
ज़ुंण शूर-शराबा लै झ़ूरा तिंयां निं कधि सेठ हई सकदै।
कदुष्ट मणछा भेटणीं धर्मीं मणछे ज़ैगा सज़ा अर
धोखै दैणैं आल़ै भेटणीं भोल़ै मणछे ज़ैगा सज़ा!
झ़गल़खोर अर रुश्शणै आल़ी बेटल़ी संघै रहणैं का आसा
दूर रेगीस्तानै रहणअ भलअ।
अक्ली आल़अ मणछ ज़िऊआ आपणीं ज़िन्दगी ठाहठ-बाठा दी,
पर ऐडै मणछा ज़ेतरी ढब्बै भेटा निं तेतरी हेरा तिंयां छेभी।
मानदार अर झणैल़ू मणछे अमर हआ खास्सी,
इहै मणछा संघै करा होर बी राम्बल़अ बभार अर अदर।
अक्ली आल़अ सपाही सका
बडै-बडै जोधै आल़ी नगरी बी कबज़अ करी।
ज़ै तम्हैं आफ़ता का बच़णअ च़ाहा,
तै करनअ गल्ला करनै का आजी बच़ार।
ज़ुंण घमंड अर हंकार डाही काम करा,
तेऊ लै बोला सोभै, “अह आसा शरेरअ।”
दल़िदरी मणछ करा आपणीं हत्या,
किल्हैकि तिन्नां हआ कामां खटणें ज़ैंईं लागी दी।
कई मणछ हआ कबल्लै सोठदै लागै दै, “मुखा लोल़ी ती एही, एही गल्ला हुई!”
पर धर्मीं मणछ रहा खुल्है हाथै बांडदअ लागी।
बिधाता करा कदुष्ट मणछे बल़ीदाना लै बी नफरत,
खासकर तेभै, ज़ेभै तिंयां होरीओ बूरअ करना लै कारी बाहा।
झ़ुठी शाजत दैणैं आल़अ करनअ दूर,
पर असली शाजते गल्ला हेरनी शूणीं।
कदुष्ट मणछ करा आपणीं बाता डेऊणे हठ,
पर धर्मीं मणछ करा आजू गंईं डाहणैं का आजी बच़ार।
च़ाऐ तम्हैं केतरै बी अक्ली आल़ै, छ़ल़ैघ अर समझ़कार किल्है निं होए,
पर ईंयां गल्ला निं तेभै किछ़ू कामें हंदी ज़ै बिधाता तम्हां लै पिठ होए फरेऊई दी!
जुधा लै बधिया का बधिया घोल़ै आल़ी सैना किल्है निं होए,
पर ज़ीत भेटा सदा बिधाता करै।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.