Kulvi Outer Seraji Bible
सैणीं गल्ला 20
अक्लीए बोल हआ सुन्नैं का बी भलै
नशिल्लै दाखे रसा झुटी हआ झ़गल़ै ई,
एता झुटा ज़ुंण भूल करा सह मणछ हआ कबुधी ई।
राज़े रोश्शे डअर हआ सिहे क्रुंगा ज़ेही,
ज़ुंण तेऊ लै रोश्शै ठैऊआ, सह शादा आप्पू लै मौत।
ऐडअ मणछ ई निखल़ा झ़गल़ै लै आजू,
समझ़कार मणछ रहा एही गल्ला का दूर।
ज़ैऊंकर मणछा हआ बऊंणे ऋता हल़ा लाणें ज़ैंईं लागी दी, तेता लै काढा सह ठांढै-शेल़ैओ भान्नअ,
लऊंणींए बगती निं तेखअ घअरै-घअरै टुकरै मांगी बी किछ़ै भेटदअ।
मणछे सोठ हआ डुघै कुहै ज़ेही,
पर ज़हा सोर समझ़ हुई, सह काढा तिन्नां गल्ला बागै।
कई मणछ फिरा आपणैं बारै इहअ खोज़दै कि तिंयां आसा शुचै-पाक्कै,
पर इहअ थोघ कुंण सका लाई कि कुंण आसा शुचअ-पाक्कअ?
तिंयां लान्हैं आसा भागा आल़ै,
ज़सरै ईज-बाब मानदार आसा अर ज़ुंण भलअ करा।
राज़अ ज़ेभै नसाफ करदअ राज़गाद्दी दी बेठा,
सह हेरा भाल़ी अर तेऊ का जाआ बूराईओ थोघ लागी।
इहअ निं कोहै बोली सकदअ,
“हुंह सोठा भलअ ई अर हुंह आसा शुचअ अर पापा का छ़ुटी गअ द!”
बाट अर तराकल़ी करै हेर-फेर करनी,
इना दूई गल्ला का करा बिधाता नफरत।
लान्हैं भलै आसा कि बूरै,
भलै-बूरै बछ़ैणियां तिन्नें कामां का।
बिधाता आसा हाम्हां शुणना लै कान अर
भाल़णा लै आछी दैनी दी।
ज़ुंण निंजा लै खास्सअ झ़ूरा, तेऊ पल़ा दाल़ज,
ज़ुंण कामां दी रहा लागी, तेऊ निं खाणां लै निऊल़ हंदी।
मोलै लंदी बारी बोला गाहक सदा कि एतो मोल गअ धख खास्सअ,
पर ज़ांऊं च़ीज़ लई डेऊई गअ, तेखअ करा तेते बड़ैई।
अक्ली आल़ै बोल हआ किम्मती रत्न,
सुन्नैं-च़ंदी का बी खास्सै किम्मती।
ज़ुंण मणछ पाखलै मणछे ज़मानती लआ,
तेऊ लागा किज़ै नां किज़ै च़ीज़ बांधै ज़रूर लणी।
छ़ल़-कपट करी खटी दी रोटी ज़ाण्हिंआं मिठी,
पर बादा हआ तिंयां खाखा भर्हुई दी शाकरी ज़ेही।
ज़ै तम्हैं राम्बल़ी सलाह लए, तै हणैं तम्हैं सफल,
जोग करी अर बच़ार किऐ बाझ़ी निं जुधा लै डेऊणअ।
फुआह निं गुप्त रही सकदी,
तैही रहणअ गप्पा मारनै आल़ै मणछा का दूर ई।
ज़ुंण आपणैं ईजा-बाबा लै फिटक दैआ,
तिन्नों लाटू जाआ छ़ेक्कै हिठी, संघा हआ तिन्नां लै बी न्हैरअ।
ज़ुंण ज़ैदात छ़ेक्कै जाआ भेटी,
तेथ निं खिरी किछ़ै बर्गत हंदी।
बूराईओ बदल़अ निं आप्पै लणअ,
बिधाता दी लागा भरोस्सअ डाहणअ, भाल़ा आप्पै।
बाट अर तराकल़ी करै हेर-फेर करनी,
इना दूई गल्ला का करा बिधाता नफरत।
बिधाता खोज़ा हाम्हां का आप्पै बात,
तै किहअ करै सका मणछा का थोघ लागी कि केस्सी डेऊणअ?
बिधाता लै मानत मनी निं तम्हैं मणछ आप्पू लै फाही पाई,
तेता का आजी लणअ राम्बल़ै करै बच़ार करी।
ज़हा राज़ै अक्ल हुई, सह भाल़ा राम्बल़ै करै कि कुंण आसा बूरअ,
तेखअ निं सह सज़ा दैणा लै झींण करदअ।
बिधाता आसा हाम्हां मणछा लै मन्न अर सोर दैनी दी,
तेता करै जाआ म्हारी गुप्त गल्लो थोघ लागी।
ज़ुंण राज़अ मानदारी अर सत्ता दी रही राज़ करा,
तेऊओ राज़ रहा सदा बणी।
खारकै मणछे बड़ैई हआ तेऊए बला का,
पर प्रोढै मणछे शोभा हआ तेऊए पल़ू करै।
ज़खम पल़ी हआ बूराई दूर
अर मार खाई हआ दिल साफ।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.