Kulvi Outer Seraji Bible
सैणीं गल्ला 19
सबर डाहणअ हआ अक्लीए गल्ल
मानदार रही गरीबी दी ज़िऊंणअ आसा
तेऊ मणछा का भलअ ज़ुंण ऐडअ झ़ुठअ बोला।
अक्ली बाझ़ी शौक निं ठीक हंदअ,
ज़ुंण तुआखुई करै ठुर्हा, तेऊ पल़ा आफ़त।
मणछ बगाल़ा आपणैं ई ऐडै कामां करै आपणीं गल्ल
तेखअ लाआ बिधाता लै गलती कि अह किअ तेऊ।
सेठ मणछे हआ कई साथी-संघी,
पर गरीबी भाल़ी डेओआ साथी बी आपणीं बाता।
ज़ुंण झ़ुठी शाजत दैआ सह आसा दोशी,
इहअ मणछ निं सज़ा का बच़ी सकदअ।
ज़ुंण खुल्है हाथै बांडा तेऊ संघै च़ाहा हर कोई साथ-संगत डाहणीं,
खास मणछा लै च़ाहा सोभै कि अह लोल़ी त मुंह ई संघै रहअ।
गरीब मणछो साथ छ़ाडा तेऊए नातै-रिश्तैदार बी,
ज़ेभै असली दी गरज़ पल़ी तेभै च़ोरा साथी-संघी बी मुंह,
तेभै डेओआ तिंयां हाथ ज़ोल़ी अरज़ करी बी दूर।
ज़ुंण असली दी आप्पू अक्ली लै झ़ूरा, तेऊ रहणअ शिखल़दै लागी,
ज़ुंण तेता समझ़ी आद डाहा, सह हआ सफल।
झ़ुठी शाजत दैणैं आल़अ निं सज़ा का बच़ी सकदअ,
ज़ुंण झ़ुठअ बोला, सह हआ बरैबाद ई।
ज़िहअ ऐडै मणछो ठाहठा दी रहणअ निं ढबदअ,
तेही ई हआ गलाम मणछो कार-करिंदै प्रैंदै राज़ करनअ नुआहरी गल्ल।
ज़हा मणछा अक्ल हआ सह करा सबर,
होरीए गलती माफ करी खटा सह आप्पू लै इज़त।
राज़े रोश्श हआ सिहे क्रुंगा ज़ेही,
पर ज़ै राज़अ खुश होए, सह हआ घाह प्रैंदै पल़ी दी ओशा ज़ेही।
ऐडी लुआद करा आपणैं ईजा-बाबा बरैबाद,
झ़गल़ै करनै आल़ी बेटल़ी हआ छ़ाप्परा का पांडा भितरी लागी दी च़ोई ज़ेही।
घअर अर ज़ैदात जाआ आपणैं ईजा-बाबा का भेटी,
पर अक्ली आल़ी बेटल़ी दैआ बिधाता ई।
ज़ैऊंकर मणछा नींज ता जाआ एछी,
पर कामां लै ज़ैंईं लाआ तेऊ भुखै ब्रत।
ज़ुंण बिधातो बधान मना, सह ज़िऊआ खास्सअ,
पर ज़ुंण लापरबाही करा, सह मरा छ़ेक्कै।
गरीबा लै दैनअ द दान हआ बिधाता लै ऋण दैणैं ज़िहअ,
अर बिधाता करा तेऊ तम्हां लै बापस।
आपणैं लान्हैं डाहणैं होछ़ी उझै नैरी,
इहअ नांईं करनअ हआ तिंयां ज़ाणीं-भुझ़ी बरैबाद करनै।
ज़ुंण रोश्शा आल़अ आसा, तेऊ दैणअ तेते सज़ा आप्पै भुगतणै,
किल्है तम्हैं एकी बारी बच़ाऊए, तेखअ हणैं तम्हैं कबल्लै तेऊ बच़ाऊंदै।
ज़ुंण सलाह मना अर शिखल़णअ च़ाहा,
सह हणअ एकी धैल़ै अक्ली आल़अ मणछ।
मणछ सोठा आपणैं दिलै कई गल्ला,
पर सफल हआ सह ई गल्ल ज़ुंण बिधाता सोठा।
मानदार मणछ मोहा होरी लोगा बी,
गरीब मणछ हआ शल़ैघा घल़णै आल़ै का भलअ।
बिधाते डरा हेठै रही हआ मणछे अमर खास्सी,
सुखी ज़िन्दगी अर आफ़ता का बी रहा सह दूर।
कई मणछा हआ एतरी ज़ैंईं कि
तिन्नां लागा थाल़ू का खाखा लै रोटीए म्हारा पाणा लै बी ज़ैंईं।
सुहांगा करनै आल़ै लै लणी सज़ा दैई, ताकि कबुधी अर ऐडै बी समझ़ एछे,
ज़ुंण अक्ली आल़अ हुअ, सह जाआ तेभै शिखल़ी ज़ेभै तेऊ नैरा-समझ़ाऊआ।
ज़ुंण आपणैं बाबा नकदरै करा अर आपणीं ईजा घअरा का पोर्ही काढा,
इहअ मणछ हआ शर्मिंदअ अर तेऊए निं किधी इज़त हंदी।
लान्हैंओ, ज़ै तम्हैं शिक्षा शुणनी छ़ाडे,
तम्हैं बिस्सर्नै तिन्नां गल्ला बी ज़ुंण तम्हां का थोघ बी थिअ।
झ़ुठ बोल़णैं आल़अ समझ़ा दालता बी बृथा,
कदुष्ट मणछा लागा ज़ुल्म करना लै सुआद।
सुहांगा करनै आल़ै भेटणीं ज़रूर सज़ा
अर ऐडै मणछा भेटा मार ई।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.