मोत्ती

मोत्ती

मोत्ती लिखअ द खुशीओ समाद

भेत

लिखणैं आल़अ: मोत्ती

पहल़णैं आल़ै: यहूदी

सन: 50

मोत्ती लिखअ द खुशीओ समाद खोज़ा हाम्हां ऐहा गल्‍ला कि ईशू ई आसा सह उद्धार करनै आल़अ ज़सरै बारै परमेशरै पैहलै ई त बोली हेरअ द। परमेशरै पराणैं बधाना दी हज़ारो साला पैहलै आपणैं लोगा संघै ज़ुंण करार किई ती सह किई तेऊ ई उद्धार करनै आल़ै करै पूरी। अह खुशीओ समाद निं सिधअ तिन्‍नां यहूदी मणछा लै आथी, ज़हा मांझ़ै ईशू धाची-पाल़ी होछ़ै का बडअ हुअ, पर अह आसा सारै संसारा लै।

मोत्ती आसा एऊ खुशीए समादे बारै धैन डाही लिखअ द। अह हआ ईशूए ज़ल्म हणें पूरी गल्‍ला खोज़णैं का शुरू, तेखअ आसा तेऊए डुबकी अर परिक्षा हणें बारै खोज़अ द। तेखअ आसा गलील मुल्खै प्रच़ार करनअ, शिक्षा दैणीं अर रोगी नरोगै करने च़ाकरी करने बारै खोज़अ द। तेखअ आसा एऊ खुशीए समादा दी ईशूए गलील मुल्खा का एरुशलेम तैणीं हांढ अर ईशूए ज़िन्दगीए खिरीए धैल़ै हुई-बिति दी इना गल्‍ले बारै लिखअ द, ज़ेते महान झींण तेऊए क्रूसा दी छ़ड़ाऊंणअ अर मरी करै ज़िऊंदै हणअ।

एऊ खुशीए समादा दी आसा ईशू महान गूरूए रुपै रहैऊअ द। तेऊ आसा परमेशरे बधाने बारै खोज़णेंओ हक अर सह दैआ परमेशरे राज़े बारै शिक्षा। तेऊए शिक्षा आसा पांज़ा बाखा बांडी दी:

1. धारा प्रैंदै शिक्षा आसा, ज़ुंण स्वर्ग राज़ा दी रहणैं आल़ै लोगे च़ाल-च़लण, फर्ज़, खास हक, अर खिरी ज़ुंण आशा आसा (5-7)

2. बारा च़ेल्‍लै च़ाकरी लै सखाऊंणै (10)

3. स्वर्ग राज़े बारै कथ्या (13)

4. च़ेल्‍लै हणें बारै शिक्षा (18) अर

5. स्वर्ग राज़ा एछणैं अर एऊ जुगे बनाश हणें बारै शिक्षा। (24-25)

मोत्ती करा आपणीं गल्‍ला ईशूए इना गल्‍ला खोज़ी खतम ज़ुंण ईशू आपणैं च़ेल्‍लै का खोज़अ कि तिन्‍नां तेऊए डेऊणैं बाद किज़ै लागणअ करनअ:

“स्वर्ग अर पृथूईओ सारअ हक दैनअ मुल्है। एता लै डेओआ तम्हैं संसारे सोभी ज़ातीए लोगा सेटा लै अर तिन्‍नां बणाआं मेरै च़ेल्‍लै। संघा दैआ तिन्‍नां लै बाब परमेशर, परमेशर शोहरू अर परमेशर पबित्र आत्में नाओंऐं डुबकी। तिन्‍नां का सखाऊआ तम्हैं तिन्‍नां सोभी गल्‍ला मनणी ज़ुंण मंऐं तम्हां का आसा खोज़ी दी। ऐहा गल्‍ला लै रहै तम्हैं निहंचै, हुंह आसा संसार खतम हणैं तैणीं सदा तम्हां संघै।”

(28:18-20)

कताबे बांड

खिंब अर ईशूओ ज़ल्म 1:1—2:23

जोहन्‍ना डुबकी दैणैं आल़ेए च़ाकरी 3:1-12

ईशूए पाणीं दी डुबकी अर परिक्षा 3:13—4:11

गलील मुल्खै ईशूए च़ाकरी 4:12—18:28

गलील मुल्खा का एरुशलेम नगरी तैणीं हांढ 19:1—20:34

एरुशलेम नगरी खिरीए सात धैल़ै 21:1—27:66

ईशूओ मरी करै ज़िऊंदै हणअ अर शुझणअ 28:1-20