मोत्ती 18

स्वर्गे राज़ा दी सोभी का बडअ

(मार्कुस 9:33-37; लूका 9:46-48)

1एता बाद डेऊऐ च़ेल्‍लै ईशू सेटा लै पुछ़दै, “स्वर्ग राज़ा दी सोभी का बडअ कुंण आसा?”

2ऐहा गल्‍ला शूणीं ईशू एक होछ़अ ज़िहअ लान्हअ आप्पू सेटा शादी करै तिन्‍नां मांझ़ै खल़अ किअ संघा बोलअ, 3“हुंह खोज़ा तम्हां का सत्त कि, ज़ै तम्हैं आपणीं ज़िन्दगी नांईं बदल़े अर लान्हैं ज़िहै भोल़ै नांईं बणें, तै निं तम्हैं स्वर्ग राज़ा दी डेऊई सकदै। 4ज़ुंण बी आप्पू एऊ लान्हैं ज़िहअ भोल़अ बणें, सह हणअ स्वर्ग राज़ा दी बडअ।

5“ज़ुंण बी मेरै नाओंऐं एक इहै लान्हें कदर करे, सह करा मेरी कदर।

पाप करने परिक्षा

(मार्कुस 9:42-48; लूका 17:1,2)

6“ज़ुंण मुंह दी विश्वास करनै आल़ै इना लान्हैं ज़िहै भोल़ै मणछा का पाप कराऊआ, तेऊ लै दैणीं परमेशरा सज़ा। तेऊ लै हणअ त इहअ भलअ कि तेऊए गल़ै बडअ थरेट बान्हीं पाणअ त सह समुंदरै डबेऊई।

7“तिन्‍नां लै हणीं घोर आफ़त! ज़ुंण होरी का पाप कराऊआ। खरी रहा संसारै एछदी लागी पर तेऊ मणछा लै हणीं घोर आफ़त ज़ुंण होरी का बी पाप कराऊआ।

8“ज़ै तूह आपणैं हाथा खूरा करै पाप करा, तिन्‍नां कर आप्पू का दूर च़ाऐ ताह तिंयां काटणै किल्है निं पल़े। लाट्टअ-टुंडअ हई सदा रहणैं आल़ी ज़िन्दगी लै डेऊणअ आसा ताल्है एता का भलअ कि दुही हाथा अर दुही खूरा संघै तूह जम्परीए आगी दी पल़े।

9“ज़ै तेरी आछी का भाल़ी तेरै भलै पाप हआ, तिन्‍नां पापा दी पाणै आल़ी गल्‍ला भाल़णैं छ़ाड। च़ाऐ ताह सह आछ ई किल्है निं पल़े ताह पोर्ही काढणीं। कांणै हई सदा रहणैं आल़ी ज़िन्दगी लै डेऊणअ आसा एता का भलअ कि दुही आछी रहंदी तूह जम्परीए आगी दी पल़े।

लुक्‍की दी भेडे कथ्या

(लूका 15:3-7)

10“धैन डाहै तम्हैं निं इना होछ़ै लान्हैं मांझ़ै कोही बी बृथा समझ़ी। किल्हैकि हुंह बोला तम्हां लै इहअ कि इने हेर-सभाल़ करनै आल़ै स्वर्ग दूत रहा स्वर्गै हर बगत मेरै बाब परमेशरा सेटा। 11किल्हैकि हुंह मणछो पूत आसा शोठुऐ दै बच़ाऊंदअ आअ द।

12“तम्हैं किज़ै समझ़ा? ज़ै कहा मणछे शौ भेडा होए, अर तिन्‍नां मांझ़ै एक भेड़ कबाता पेठे, तै कै नडिनुंऐं भेडा छ़ाडी सह नाल़ै-धारा हर ज़ैगा तैहा लुक्‍की दी भेडा लोल़अ निं डेऊणअ?

13“ज़ांऊं सह भेड़ भेटी जाए, हुंह खोज़ा तम्हां का सत्त कि सह निं तिन्‍नां नडिनुंऐं भेडा लै ज़ुंण तेऊ ई सेटा ती, तेतरी खुशी निं तेऊ हणीं, ज़ेतरअ कि ऐहा भेडा लै खुश हुअ। 14इहअ ई थारै बाबे ज़ुंण स्वर्गै भेडा आसा, सह निं इहअ च़ाहंदअ कि इना होछ़ै मांझ़ै एक बी बरैबाद होए।

ज़ुल्म करनै आल़ै संघै बर्ताअ

15“ज़ै तेरअ साथी-भाई ताल्है ज़ुल्म करे, कांगनरांगै डेऊई तेऊ संघै गल्‍ला, संघा दैऐ तेऊ समझ़ाऊंणी। ज़ै सह तेरी शुणें, तै गअ ताह आपणअ भाई भेटी। 16ज़ै सह नांईं शुणें, तै निंऊं दूई मणछ आप्पू संघै होर किल्हैकि बधाने साबै लोल़ी हरेक गल्‍ला दूई या चिई शाजते सम्हनै हुई।

17“ज़ै सह तिन्‍नें बी नांईं शुणें, तै खोज़ ऐहा गल्‍ला विश्वासीए टोली मांझ़ै। पर ज़ै सह तिन्‍नें बी नांईं शुणें, तै समझ़ै तेऊ तूह होरी ज़ातीओ अर कारै मांगणै आल़ै मणछा ज़िहअ ज़ुंण परमेशर।

रोक्‍कणअ अर मोक्‍कअ दैणअ

18“हुंह खोज़ा तम्हां का सत्त कि ज़ुंण बी तूह पृथूई दी तिन्‍नां मणछा लै रोक्‍के, सह रोक्‍कणअ स्वर्गै अर ज़ुंण बी तूह पृथूई दी ज़ाज़त दैए, तेता लै भेटणीं स्वर्गै ज़ाज़त।

19“तेखअ बोला हुंह तम्हां लै इहअ बी, ‘ज़ै तम्हां मांझ़ै दूई ज़ण्हैं पृथूई दी किछ़ी बी गल्‍ला मांगणा लै एक मन्‍न होए, तिंयां गल्‍ला हेरनी स्वर्गै रहणैं आल़ै तिन्‍नें बाब परमेशरा तिन्‍नां लै दैई। 20किल्हैकि ज़िधी दूई या चअन ज़ण्हैं मेरै नाओंऐं कठा हआ, तिधी हआ हुंह आप्पू तिन्‍नां संघै।’”

नर्दैई दासे कथ्या

21तेखअ बोलअ पतरासै, “हे प्रभू, ज़ै मेरअ साथी-संघी मुल्है ज़ुल्म करे, तै हुंह केतरी बारी छ़ाडूं तेऊ लै माफी? साता बारी छ़ाडूं तेऊ लै माफी?” 22ईशू दैनअ तेऊ लै ज़बाब, “हुंह निं ताल्है बोल्दअ कि सिधअ साता बारी कर तेऊ माफ। पर साता बारीए सत्तर गुणा करी छ़ाडै तेऊ लै माफी।

23“तैही आसा स्वर्गो राज़ इहै राज़ै ज़िहअ, ज़ुंणी आपणैं दासा का साब-कताब करनअ च़ाहअ। 24ज़ांऊं सह साबा-कताब लंदअ लागअ, एक मणछ आअ तेऊ सेटा लै इहअ, तेऊ त राज़ैओ दसा हज़ार सुन्‍नें सिक्‍कैओ ऋण। 25पर तेऊ का नांईं त ऋण भरना लै एक धेल्‍लअ बी आथी! तेखअ बोलअ तेऊए मालकै तेऊ लै इहअ, ‘अह अर एऊए बेटल़ी अर एऊए सारी ज़ैदात पाआ बेच़ी अर तेता करै करा एऊओ ऋण पूरअ।’”

26“इहअ शूणीं किई तेऊ दासै आपणैं मालके पैरै पल़ी एही अरज़, ‘हे मालक, सबर कर, हुंह भरूं तेरअ सारअ ऋण।’ 27तेखअ फिरी तेऊ मालका तेऊ दासे झींण अर तेऊओ ऋण माफ करी छ़ाडअ सह तिधा का घअरा लै।

28“पर ज़ांऊं सह दास बागै निखल़अ, तेऊ भेटअ आपणअ साथी दासा मांझ़ै एक ज़ण्हअ। तेऊ तै तेऊ लै शौ च़ंदीए सिक्‍कै ऋण दैनअ द, अर तेऊ ढाकअ सह गल़ा का संघा बोलअ तेऊ लै इहअ, ‘ज़ेतरअ बी ताह मेरअ ऋण आसा, तेऊ दै एभी मुल्है बापस।’

29“ऐहा गल्‍ला शूणीं लागअ तेऊओ साथी दास तेऊए पैरै पल़ी लेरा लाई अरज़ करदअ, ‘सबर कर, हुंह भरूं तेरअ सारअ ऋण।’ 30पर तेऊ निं तेऊए गल्‍ला मनी अर सह किअ तेऊ इहअ बोली कैद खानै बंद, ‘ज़ेभै तैणीं तूह मेरअ ऋण नांईं भरे, तेभै तैणीं रहणअ तूह इधी बंद।’

31“तेऊए होरी साथी दासै ज़ुंण तेऊ संघै हुअ त, तिंयां हुऐ तेता भाल़ी खास्सै दुखी अर तिन्‍नैं खोज़ी ईंयां सारी गल्‍ला आपणैं मालका का। 32तेखअ शादअ सह दास तेऊए मालकै संघा बोलअ तेऊ लै, ‘ओ कदुष्ट मणछा, तंऐं ज़ेभै मुखा मेरै पैरै पल़ी अरज़ किई, मंऐं ता तेभै तेरअ सारअ ऋण माफ किअ! 33ज़ेही मंऐं ताल्है झींण किई, ताह बी लागा ती आपणैं साथी लै तेही ई झींण करनी!’

34“मालका आई तेऊ लै बेघै खास्सी रोश्शै अर सह सभाल़अ तेऊ कैद खानै सज़ा दैणैं आल़ै का। संघा डाहअ तिन्‍नां लै इहअ बोली, ‘ज़ेभै तैणीं अह मेरअ सारअ ऋण भरी निं मुक्‍के, तेभै तैणीं निं एऊ बागै छ़ाडी।’

35“ठीक इहअ ई करा तम्हैं बी आपणैं साथी-संघी लै आपणैं तत्त-दिला का पाप माफ। ज़ुंण तत्त-दिला का माफ नां करे, मेरअ बाब परमेशर ज़ुंण स्वर्गै आसा, तै निं तेऊ बी तम्हैं माफ करनै।”