Kulvi Outer Seraji Bible
मोत्ती 20
दाखे बागा काम करनै आल़ै मणछे कथ्या
“स्वर्गो राज़ आसा एकी इहै घअर मालका ज़िहअ, सह डेऊअ दोत्ती-दोत्थी नगरीए च़फै कि सह आपणैं दाखे बागा दी कामां लै मज़दूर लाए। मालके हुई मज़दूरा संघै सैहमती कि तेऊ दैणीं मज़दूरा लै एक च़ंदीओ सिक्कअ तैहा सारी धैल़ीए मज़दूरी। संघा छ़ाडै तिंयां मज़दूर आपणैं दाखे बागा लै कामां करदै।
“तेखअ शुझुऐ तेऊ मालका का एकी पहरा बाद च़फै होर मणछ खल़्हुऐ दै ज़हा किछ़ै काम निं भेटअ त। तेऊ बोलअ तिन्नां लै बी, ‘डेओआ, तम्हैं बी करा मेरै दाखे बागा दी काम। ज़ुंण मुंह भलअ लागे तेऊ साबै दैंऊं हुंह तम्हां धैल़ीए मज़दूरी। तिंयां बी डेऊऐ दाखे बागा दी कामां करदै।’ तेखअ दुजै अर चिऊथै पहरै बी भेटै तेऊ च़फै इहै मणछ ज़हा तैहा धैल़ी किछ़ै काम निं भेटअ त, तिंयां बी छ़ाडै तेऊ आपणैं बागा लै कामां करदै।
“खिरी च़ाल्ली ती सान्ह पल़ी, तेऊ का शुझुऐ होर मज़दूर ज़हा तैहा धैल़ी किछ़ै काम निं भेटअ त! तेऊ बोलअ तिन्नां लै बी, ‘तम्हैं किल्है आसा इधी सारी धैल़ी रित्तै खल़्हुऐ दै?’ तिन्नैं बोलअ इहअ, ‘हाम्हां निस्सी किधी बी मज़दूरी खटणा लै भेटी।’
“तेऊ बोलअ, ‘तम्हैं बी करा मेरै दाखे बागा दी काम।’
“धैल़अ उडी बोलअ तेखअ आपणैं भढारी लै इहअ, ‘सोभी कामां करनै आल़ै शाद अर पिछ़लै का पैहलै तैणीं दैऐ सोभी लै बराबर मज़दूरी।’ ज़ांऊं तिंयां सोभ कामां आल़ै आऐ, खिरी ज़ुंण उडै बी कामां करदै आऐ तै, तिन्नां बी भेटी पूरी धैल़ीए होरी बराबर मज़दूरी। ज़ुंण दोत्ती पैहलै आऐ तै, तिन्नैं ज़ाणअ इहअ कि हाम्हां भेटणीं इना होरी का खास्सी धैल़ी पर तिन्नां बी भेटी पूरी धैल़ीए तेतरी ई मज़दूरी ज़ुंण तिन्नां संघै बाहिदअ त हुअ द।
“ज़ांऊं तिन्नां मज़दूरी भेटी, तिंयां हुऐ तेऊ मालका का नराज़ अर तेऊ लै लागै इहअ बोल्दै, ‘ज़ुंण ईंयां खिरी उडै आऐ तै इनै ता सिधअ एकी कहरै किअ काम! पर तंऐं दैनी इना लै हाम्हां बराबर मज़दूरी! ज़ुंणी सारी धैल़ी बोझ़अ च़कअ अर चटाक धुप्पैओ जाम्ह ज़िरअ?’
“तेऊ दैनअ तिन्नां मांझ़ै एकी लै ज़बाब, ‘भाल़ भाई, मंऐं निं ताह संघै किछ़ै ज़ुल्म किअ, ज़ेऊ साबै तूह दोत्ती कामां करना लै राज्ज़ी हुअ त तेतरी मज़दूरी ता ताल्है पूरी दैनी? ज़ुंण तेरअ आसा तेऊ च़क, संघा लाग हांढदअ। अह आसा मेरी मरज़ी कि ज़ेतरअ मंऐं ताल्है दैनअ तेतरअ दैणअ मुंह इना होरी लै बी ज़ुंण ताखा पिछ़ू आसा आऐ दै। अह आसा मेरी मरज़ी कि हुंह आपणैं ढब्बै संघै ज़िहअ च़ाहूं तिहअ करूं? ज़ै हुंह भलअ आसा, तै तंऐं किल्है आसा तेथ टेरी आछ डाही दी लाई?’
“ठीक इहै ई ज़ुंण आजू थिऐ, तिंयां हणैं पिछ़ू अर ज़ुंण पिछ़ू थिऐ, तिंयां हणैं आजू।”
मौत अर ज़िऊंदै हणें बारै चिऊथी बारी खोज़णअ
(मार्कुस 10:32-34; लूका 18:31-34)
तेखअ निंयैं ईशू एरुशलेम नगरी लै डेऊंदी बारी आपणैं बारा च़ेल्लै कांगनरांगै अर बाता बोलअ तेऊ तिन्नां लै इहअ, “भाल़ा, हाम्हैं च़ाल्लै ऐबै एरुशलेम नगरी लै अर हुंह मणछो पूत बझ़ैल़णअ बडै प्रोहत अर यहूदी शास्त्री का कैद करनै। तिन्नां बणाणअं मौते सज़ा दैणैं जोगी दोशी। तेखअ दैणअ हुंह तिन्नां होरी ज़ातीए हाथै ताकि तिंयां मेरअ सुहांग-मखौल करे, कोल़ै करै च़िक्के अर क्रूसा दी मारी पाऐ। पर चिऊथै धैल़ै हणअ हुंह भिई ज़िऊंदअ।”
एकी माए अरज़
(मार्कुस 10:35-45)
ज़ांऊं जबदीए शोहरू याकब अर जोहन्ने ईज आई अर ईशू सेटा एछी माथअ टेक्कअ, सह लागी ईशू का किज़ू मांगदी। तेऊ बोलअ तैहा लै, “तूह किज़ै च़ाहा?” तैहा बोलअ इहअ, “मेरै ईंयां दूई शोहरू लोल़ी तेरै राज़ा दी तेरी दैहणीं अर बाऊंईं कुछी बेठै।”
ईशू दैनअ तैहा लै ज़बाब, “तम्हां का निं थोघै कि तम्हैं किज़ै मांगा? ज़ुंण दुखो घुप्पू मुंह झुटणअ तेता कै तम्हैं झुटी सका?” तिन्नैं दैनअ ईशू लै तेभी ज़बाब, “हाँ, हाम्हैं सका इहअ करी।”
ईशू बोलअ तिन्नां लै, “हाँ, अह आसा सच्च़ी कि तम्हां हेरनअ मुंह ई ज़िहअ दुखो घुप्पू बी झुटी, पर आपणैं दैहणै-बाऊंऐं बशैल़णअ निं मेरअ काम आथी। पर ज़हा लै मेरै बाब परमेशरै ज़ुंण ज़ैगा बणाईं आसा हेरी दी, सह आसा तिन्नां लै।”
इहअ शूणीं आई तिन्नां होरी च़ेल्लै तिन्नां दूई भाई लै रोश्शै। ईशू शादै तिंयां आप्पू सेटा लै संघा बोलअ तिन्नां लै, “तम्हां का आसा ऐहा गल्लो थोघ कि ज़ुंण होरी ज़ातीए सैणैं हआ, तिंयां करा तिन्नां दी राज़ अर तिन्नां मांझ़ै ज़ुंण बडै हआ तिंयां डाहा तिन्नां दी हक।
“पर तम्हां मांझ़ै निं इहअ हणअ, पर ज़ुंण बी तम्हां मांझ़ै बडअ हणअ च़ाहे, सह लोल़ी थारअ दासा ज़िहअ बणअ। ज़ुंण तम्हां मांझ़ै सोभिओ सैणअ बणनअ च़ाहे, सह लोल़ी पैहलै सोभी लै गलामा ज़िहअ मैन्थ करनै आल़अ हुअ। ज़िहअ कि हुंह मणछो पूत निं एते तैणीं आथी आअ द किई कुंण मेरी च़ाकरी करे। पर हुंह आसा एते तैणीं आअ द कि हुंह होरीए च़ाकरी करूं अर सोभिए छ़ुटकारै लै आपणीं ज़ान दैंऊं।”
दूई कांणै मणछ ठीक करनै
(मार्कुस 10:46-52; लूका 18:35-43)
ज़ांऊं तिंयां जेरिहो नगरी का बागै निखल़दै ई तै लागै दै, तिधी आऐ खास्सै मणछ ईशू पिछ़ू। दूई कांणै तै बाते बाढै बेठै दै। तिन्नैं शूणअ इहअ कि ईशू एसी बाती आसा ईशू डेऊंदअ लागअ द, तिंयां लागै हाक्का लाई बोल्दै, “हे प्रभू, दाबेदे लुआद ईशू, हाम्हां लै कर झींण।”
लोग लागै तिन्नां इहअ बोली नैरदै, “च़ुप्पी रहा।”
पर तिंयां लागै होर बी खास्सै लैल़ा लांदै अर बोल्दै, “हे प्रभू, दाबेदे लुआद ईशू, हाम्हां लै कर झींण।”
ईशू उझ़ुअ खल़अ संघा शादै तिंयां कांणै मणछ आप्पू सेटा लै। तेखअ बोलअ तिन्नां लै, “तम्हैं इहअ किज़ै च़ाहा कि हुंह तम्हां लै करूं?”
तिन्नैं बोलअ ईशू लै, “हे प्रभू, हाम्हैं च़ाहा इहअ कि तूह कर हाम्हां नरोगै ताकि म्हारी आछी का शुझदअ लागे।” ईशू फिरी तिन्नें झींण संघा छ़ुंहीं तिन्नें आछी अर तिन्नां का लागअ तेभी शुझदअ अर तिंयां बी लागै ईशू पिछ़ू हांढदै।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.