Kulvi Outer Seraji Bible
मोत्ती 27
राज़पाल पिलातुसे दरबारै ईशू
(मार्कुस 15:1; लूका 23:1,2; जोहन्ना 18:28-32)
दोत्ती-दोत्थी हुऐ सोभी बडै प्रोहत, सैणैं, शास्त्री कठा अर तैहा माहा सभा बेठै दै हुऐ सोभ ईशू लै मौते सज़ा दैणा लै सैहमत। तेखअ निंयं ईशू तिन्नैं बान्हीं करै राज़पाल पिलातुसा सेटा लै।
यहूदा करेतीए मौत
(शधाणूं 1:18,19)
ज़ांऊं करेती गराऊंए यहूदा का थोघ लागअ कि ईशू लै लाअ तिन्नैं झ़ुठअ दोश अर तिंयां च़ाहा तेऊ लै मौते सज़ा दैणीं। सह पछ़ताअ तेखअ खास्सअ अर तेऊ दैनै तिंयां तिह च़ंदीए सिक्कै बडै प्रोहता अर सैणैं लै बापस। तेखअ बोलअ तेऊ तिन्नां लै इहअ बी,
“मंऐं किअ अह पाप कि नर्दोश मणछ दैनअ थारै तम्हां का मारना लै?” तिन्नैं बोलअ इहअ, “एते हाम्हां कै फाही? एता ज़ाण तूह!”
तेखअ शोटै तेऊ तिंयां सिक्कै परमेशरे भबने खोल़ै अर आप्पू लै दैनी फांसी।
बडै प्रोहतै च़कै तिंयां सिक्कै संघा बोलअ, “बधाने साबै निं इना सिक्कै हाम्हैं भबने भढारै डाही सकदै। किल्हैकि ईंयां ढब्बै दैनै तै हाम्हैं कहा मणछा मारना लै किम्मत।” तिन्नैं किअ आप्पू मांझ़ै जोग अर तिन्नां सिक्कै करै लअ तेता लै एकी खमारा का तेऊओ खेच मोलै, ताकि ज़ुंण परदेसी मणछ नगरी दी मरे, तिन्नें ल्हासा डाहणीं तेथ दाबी। इहअ करै आसा तेऊ खेचा नाअं आझ़ तैणीं लोहूओ खेच पल़अ द। इहअ करै हुअ परमेशरे गूर जेरमयाह बोलअ द बैण पूरअ,
“तिन्नैं च़कै तिंयां तिह च़ंदीए सिक्कै,
सह ई मोल डाहअ इज़राईले आद-लुआदै तेऊ नमोल मणछो।
ज़िहअ प्रभू मुल्है हुकम किअ त,
तिहअ ई दैनअ तिन्नैं खमारा लै तेऊए खेचो मोल।”
राज़पाल पिलातुसे सुआल
(मार्कुस 15:2-5; लूका 23:3-5; जोहन्ना 18:33-38)
ज़ांऊं ईशू राज़पाल पिलातुस सेटा खल़अ थिअ, तेऊ पुछ़अ ईशू का, “तूह कै यहूदीओ राज़अ आसा?”
ईशू बोलअ, “तंऐं हेरअ आप्पै बोली।”
ज़ेभै बडै प्रोहत अर सैणैं ईशू लै दोशा लांदै तै लागै दै, तेभै निं ईशू तिन्नां लै किछ़ बी ज़बाब दैनअ। एता लै बोलअ पिलातुसै, “ताखा कै शुण्हदअ निं आथी कि ईंयां मणछ ताल्है किहै-किहै दोश लांदै आसा लागै दै?” पर ईशू निं तेऊए गल्लो बी किछ़ै ज़बाब दैनअ, इधी तैणीं कि पिलातुस बी हुअ रहैन।
मौते सज़ा दैणैंओ हुकम
(मार्कुस 15:6-15; लूका 23:13-25; जोहन्ना 18:39—19:16)
पिलातुसो त इहअ रबाज़ कि सह करा त तेऊ ऊवार्णे थैरे धैल़ी कैदखाने कैदी मांझ़ै एकी कैदी आज़ाद, ज़हा लै लोग बोले कि तेऊ करा आज़ाद। तेऊ ज़मानैं त बरोबा नाओं एक मशूर कैदी कैद खानै बंद किअ द। ज़ांऊं तिंयां कठा हुऐ, पिलातुसै बोलअ तिन्नां लै, “तम्हैं कहा च़ाहा कि हुंह छ़ाडूं तम्हां लै? बरोबा छ़ाडूं, कि ईशू, ज़हा लै मसीहा बोला?” तेऊ का थिअ थोघ कि यहूदी आसा ईशू सिधअ ज़िदा लै ढाकअ द अर आसा ईशू नर्दोश।
पिलातुस त पांच़े गाद्दी दी बेठअ द, तेऊए लाल़ी दैनअ तेऊ लै समाद, “तूह निं एऊ धर्मीं मणछा लै किछ़ै करी। अह आसा नर्दोश, हिझ़ राची हुअ मुंह एऊए बारै सुपनअ अर तेता करै आसा मेरै मन्नैं खास्सअ झाख पल़अ द।”
बडै प्रोहतै अर सैणैं शकाऊऐ होर लोग इहै कि तम्हैं मांगै बरोबा अर ईशू लै बोलै इहअ कि एऊ पाआ मारी। पिलातुसै ज़ांऊं इहअ पुछ़अ कि इना दूई मांझ़ै तम्हां कुंण लोल़ी कि तम्हां लै हुंह छ़ाडूं?
तिन्नैं सोभी बोलअ इहअ, “हाम्हां लै छ़ाड बरोबा।”
पिलातुसै पुछ़अ तिन्नां का, “तै ईशूओ ज़हा लै मसीहा बोला, एऊओ कै करूं?”
तिन्नैं सोभी बोलअ इहअ कि एऊ पाआ क्रूसा दी मारी।
पिलातुसै बोलअ तिन्नां लै, “किल्है, एऊ किज़ै ज़ुल्म किअ?”
पर तिन्नैं लाई होर बी खास्सी भिई ज़ोरै-ज़ोरै लैल़ा, “एऊ छ़ड़ाऊआ क्रूसा दी।”
ज़ांऊं पिलातुसै भाल़अ कि अह गल्ल निं हणैं आल़ी आथी अर इनै लाअ ऐबै होर बी उपद्रभ करी, तेऊ मांगअ पाणींओ प्रिहअ संघा धोऐ तिन्नां नदरी आपणैं हाथ, तेखअ बोलअ तिन्नां लै, “हुंह आसा एऊ धर्मीं मणछे लोहू का नर्दोश, अर एता ज़ाणा ऐबै तम्हैं ई।”
तेखअ दैनअ तिन्नैं सोभी लोगै ज़बाब, “एऊ मारनैओ दोश लोल़ी हाम्हां अर म्हारै शोहरू लै लागअ।”
इहअ शूणीं किअ पिलातुसै लोगा खुश करनै तैणीं बरोबा कैद खानै का आज़ाद, अर ईशू दैनअ कोल़ै करै च़िक्की क्रूसा दी छ़ड़ाऊंणा लै।
सपाही किअ ईशू संघै बूरअ बभार
(मार्कुस 15:16-20; जोहन्ना 19:2,3)
तेखअ निंयं पिलातुसे सपाही ईशू गहल़ा भितरी राज़ भबनै अर फेर डाही सपाहीए पल़टण खल़ी करी। तेखअ खोल्हअ तिन्नैं ईशूओ च़ोल़अ पोर्ही संघा बन्हैऊंअ बैंज़णीं रांगो च़ोल़अ। तेखअ बणाअं झ़रीलै कांडैओ मुगट संघा डाहअ ईशूए मुंडै, हाथै दैनी एक शोठी। संघा लागै तेऊ आजू ज़ान्हूं दी बेशी इहै सुहांगा करदै, “हे यहूदीए राज़ैआ, नमस्ते।” तिन्नैं पाअ ईशूए मुंहैं थुक्की अर तेऊ का सह शोठअ छ़ड़ैऊई लागै तेता करै तेऊ लै बाहंदै। ज़ांऊं तिंयां सुहांग करी मुक्कै, तेखअ खोल्हअ तिन्नैं तेऊ का बैंज़णीं रांगो च़ोल़अ पोर्ही संघा बन्हैऊंऐं ईशू का तेऊओ ई च़ोल़अ। तेखअ निंयं तिन्नैं ईशू क्रूसा दी मारना लै नगरी बागै।
ईशू छ़ड़ाऊअ क्रूसा दी
(मार्कुस 15:21-32; लूका 23:26-43; जोहन्ना 19:17-27)
नगरी बागै डेऊंदी बारी भेटअ तिन्नां एक शमौन नाओं कुरेन नगरी का आअ द मणछ अर तिन्नैं ढाकअ सह नभैऊशै अर सह निंयं तिन्नैं तिधा पोर्ही ज़ोरा-ज़ोरी क्रूसा बगारू। तेखअ तैहा ज़ैगा ज़हा लै गुलगुता बोला, मतलब खोपल़ीए ज़ैगा, पुजी दैनअ तिन्नैं मुर्र नाओंए दुआई राल़अ द दाखो मिल्लअ रस झुटणा लै पर ईशू निं तेता च़ाखणअ च़ाहंदअ त।
तेखअ छ़ड़ाऊअ तिन्नैं ईशू क्रूसा दी अर तिन्नैं सपाही बांडै आप्पू मांझ़ै परच़ी पाई तेऊए झिकल़ै। संघा रहै तिंयां तिधी पहरी बेशी। पिलातुसै लिखअ एकी तगती दी ईशूओ दोश अर सह टोक्की क्रूसे च़ुंडी, तेथ त लिखअ द, “ईशू नासरी यहूदीओ राज़अ।” तिन्नैं छ़ड़ाऊऐ ईशूए क्रूसा नेल़ दूई डाकू बी एक ईशूए दैहणीं बाखा अर एक बाऊंईं बाखा क्रूसा।
तेस्सी बाती एछदै-डेऊंदै करा तै आपणैं मूंड झ़ल़ाऊई करै तिन्नें निंदा, संघा करा तै तिंयां इहअ बोली, “परमेशरे भबना ढोल़ी चिऐ धैल़ै बणाणैं आल़ैआ, तूह आप्पू ता बच़, ज़ै तूह परमेशरो पूत आसा, तै होथ क्रूसा का धरनीं।”
इहअ ई लागै बडै प्रोहत, शास्त्री, सैणैं बी सोभ सुहांगा करदै अर इहअ बोल्दै, “होर हेरै एऊ बच़ाऊई पर आप्पू निं अह बच़ी सकदअ! अह ता इज़राईलो राज़अ आसा। ऐबै ज़ै अह क्रूसा का धरनीं होथे, तै करनअ हाम्हां बी एऊ दी विश्वास।” अह ता परमेशरे आसरै रहा, ज़ै परमेशर एऊ का खुश होए, तै छ़ड़ैऊए एऊ सह ई, अह ता इहअ बोला त, “हुंह आसा परमेशरो पूत!” इहअ ई ज़ुंण तिंयां ईशू संघै डाकू क्रूसा दी थिऐ छ़ड़ाऊऐ दै, तिंयां बी लागै ईशूए निंदा करदै।
ईशूए प्राण शोटणै
(मार्कुस 15:33-41; लूका 23:44-49; जोहन्ना 19:28-30)
दपहरा पोर्ही चिऊथै पहरै तैणीं रहअ तेऊ सारी धरती घणअ नटिप्प न्हैरअ हई अर उडै तैणीं रही ज़ेही राच पल़ी। चिऊथै पहरा नेल़ बोलअ ईशू आपणीं बोली दी ज़ोरै-ज़ोरै इहअ, “इलोई, इलोई, लम्मा शबक्तनी?” मतलब “हे मेरै परमेशर, हे मेरै परमेशर, तंऐं किल्है छ़ाडअ हुंह?” ज़ुंण तिधी थिऐ खल़्हुऐ दै, तिन्नां मांझ़ै बोलअ कई इहअ, “अह आसा एलियाह लै हाक्का लांदअ लागअ द।” एक आअ ठुर्ही संघा डबेऊअ मिल्लै दाखे रसा दी शाट्टअ, अर नगाल़ीए च़ुंडी दी चैल़ी करै दैनअ तेऊ ईशूए खाखा च़ाखणा लै। होरी बोलअ इहअ, “खल़्हिया, भाल़ा हैनूं कि एलियाह एछा बी एऊ बच़ाऊंदअ।”
तेखअ शोटै ईशू ज़ोरै लैल़ पाई प्राण। तै हेरा, परमेशरे भबनै लाअ द पल्दअ धेल़्हुअ प्रैंदा का थाल्लै तैणीं दूई बाखा लै अर सारी पृथूई हुई ज़ाज़री अर भिल़ी दी लागै पात्थर चटकारदै। घोरी खुल्ही अर मूंऐं दै पबित्र मणछे ल्हासा हुई ज़िऊंदी भिई ज़िऊंदै हई डेऊऐ तिंयां पबित्र एरुशलेम नगरी लै, तिंयां शुझुऐ तिधी खास्सै मणछा का।
तेखअ ज़ुंण सुबैदार तिधी ईशू नेल़ पहरी थिअ, सह डरअ तिधी तैहा ज़ाज़री भाल़ी संघा लागअ इहअ बोल्दअ, “अह आसा सच्च़ी परमेशरो पूत।” तिधी ती गलील मुल्खा का ईशूए च़ाकरी लै खास्सी बेटल़ी बी आई दी अर तिंयां ती लागी दी इना सोभी गल्ला भाल़ी। तिन्नां मांझ़ै ती मगदल़ गराऊंए मरिअम, याकब अर युसुफे ईज मरिअम अर जबदीए शोहरूए ईज बी।
ईशूए ल्हास दाबी डाहणीं
(मार्कुस 15:42-47; लूका 23:50-56; जोहन्ना 19:38-42)
ज़ांऊं सान्ह च़ाल्ली ती पल़ी, राज़पाल पिलातुसा सेटा आअ एक युसुफ नाओं अरमतियाह गराऊंओ सेठ मणछ, सह थिअ आप्पू बी ईशूओ च़ेल्लअ। तेऊ मांगी पिलातुसा का ईशूए ल्हास। राज़पाल पिलातुसै दैनी तेऊ लै ईशूए ल्हासा निंणे ज़ाज़त। युसुफै निंईं ल्हास बाछे कोरै शेतै झिकल़ै दी पल़ेटी, संघा डाही तेऊ सह ल्हास नऊंईं घोरी दी ज़ुंण तेऊ शाफल़ा दी मज़दूरा लाई ती कोती दी। तेखअ डाही तैहा घोरीए मोहरै एक बडी टोल्ह बदल़ी, संघा डेऊअ आपणैं घअरा लै। तिधी ती मगदल़ गराऊंए मरिअम अर दुजी मरिअम घोरी सम्हनै बेठी भाल़ी लागी दी।
घोरी दी पहरअ
दुजै धैल़ै हुऐ बशैघे धैल़ी बडै प्रोहत अर फरीसी मणछ राज़पाल पिलातुसा सेटा कठा, संघा बोलअ तिन्नैं राज़पाला लै, “जनाब, हाम्हां का आसा थोघ कि तेऊ झ़ुठै मणछै बोलअ त आपणीं ज़िऊंदी ज़िता इहअ, ‘मेरै मरनै का बाद हणअ मुंह चिई धैल़ै बाद भिई ज़िऊंदै।’ तूह दै इहअ हुकम कि चिई धैल़ै तैणीं डाहणअ हाम्हां तैहा घोरी बागै राची-धैल़ी पहरअ पाई ज़िधी सह दाबी आसा डाहअ द। इहअ निं हआ कि तेऊए च़ेल्लै तेऊए ल्हास च़ोरी पाए अर लोगा का लागे इहअ बोल्दै कि सह हुअ मरी करै ज़िऊंदअ। अह हणअ हाम्हां लै पिछ़लै धोखै का बी खास्सअ बूरअ।”
राज़पाल पिलातुसै बोलअ तिन्नां लै, “तम्हां का पहरी ता बतेर्है आसा, तम्हैं डेओआ, संघा पाआ आपणैं साबै तिधी पहरअ।” तिंयां डेऊऐ संघा डाही घोरी बागै टोल्हा दी लाई रोम राज़ैए मोहर ताकि सरकारी मोहरा लाई दी टोल्हा पोर्ही नां काढे। तेखअ डाहअ तिधी सपाही करै पहरअ पाई।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.