मार्कुस

मार्कुस

मार्कुसै लिखअ द खुशीओ समाद

भेत

लिखणैं आल़अ: मार्कुस

पहल़णैं आल़ै: रोम देशै रहणैं आल़ै विश्वासी

सन: 67-69

मार्कुसै लिखअ द अह खुशीओ समाद हआ इहअ बोली शुरू, “अह खुशीओ समाद आसा ईशू मसीहे बारै ज़ुंण परमेशरो पूत आसा।” एथ आसा ईशू एक सोभी च़िज़ा प्रैंदै हक डाहणैं आल़अ मालक अर च़ाकरी करनै आल़ै मणछे रुपै रहैऊअ द। तेऊओ हक आसा प्रगट हुअ तेऊए शिक्षा दी, बूरी आत्मां काढणैं अर सोभी लोगे पाप माफी करना लै। एथ बोला ईशू आप्पू लै, “हुंह मणछो पूत।” सह आअ एते तैणीं कि सोभी लोगा पापा का आज़ाद करना लै आपणैं प्राण दैए।

मार्कुस निं ईशूए बैण अर शिक्षा दी ज़ोर दैंदअ पर सह दैआ तेऊए कामें बारै ज़ोर। तैही खोज़ा सह तेऊए कथ्या सुंबल़ी, सान अर असर करनै आल़ै साबै। जोहन्‍ना डुबकी दैणैं आल़अ, ईशूए पाणीं दी डुबकी अर तेऊए परिक्षा हणें बारै थोल़ी ज़ेही भेत दैणैं का बाद लागा लिखणैं आल़अ तेभी ईशूए लोग रोगी नरोगै करने च़ाकरीए बारै खोज़दअ। ज़िहअ-ज़िहअ बगत बितदअ लागा तिहै-तिहै लागै तेऊए च़ेल्‍लै तेऊ राम्बल़ै करै समझ़दै, पर ईशूए बरोधी हुऐ होर बी खास्सै दुशमण। खिरी खोज़ा ईशूए संसारे ज़िन्दगीए खिरीए धैल़ै हुई-बिति दी गल्‍ला, ज़ेता मांझ़ै खास तेऊओ क्रूसा दी मरनअ अर मरी करै ज़िऊंदै हणअ आसा।

ईशू मसीहे च़ेल्‍लै मांझ़ै ज़ुंणीं सह घोर रित्ती भाल़ी ज़ेता भितरी ईशू क्रूसा दी मारनै का बाद त डाहअ द, तिंयां ती चअन बेटल़ी। स्वर्ग दूतै बोलअ तिन्‍नां लै:

“तम्हैं किल्है हुई रहैन! तम्हैं ईशू नासरी लोल़ी आसा लागी दी ज़ुंण क्रूसा दी छ़ड़ाऊअ त? भाल़ा, सह हुअ ज़िऊंदअ अर सह निं इधी आथी। भाल़ा, अह आसा सह ई ज़ैगा, ज़िधी तेऊए ल्हास ती डाही दी।”

(16:6)

कताबे बांड

खुशीए समादे शुरूआत 1:1-13

गलील मुल्खै ईशूए च़ाकरी 1:14—9:50

गलील मुल्खा का एरुशलेम तैणीं हांढ 10:1-52

एरुशलेम नगरी खिरीओ हबतअ 11:1—15:47

ईशूओ ज़िऊंदै हणअ 16:1-8

ज़िऊंदै हई ईशू शुझणअ अर स्वर्गा लै डेऊणअ 16:9-20