Kulvi Outer Seraji Bible
मार्कुस 10
बैईदाऊअ दैणें बारै ईशूए शिक्षा
(मोत्ती 19:1-12; लूका 16:18)
ईशू लागअ कफरनहूम नगरी का आपणैं च़ेल्लै संघी हांढदअ, संघा पुजै तिंयां यहूदा मुल्खै बाती हांढदी जरदण नदी पारा बाखा। ईशू फेर हुऐ भिई खास्सै मणछ कठा। ईशू लागअ आपणैं साबै तिन्नां लै शिक्षा दैंदअ।
फरीसी मणछ आऐ ईशू सेटा संघा लागै तेऊ इहअ पुछ़ी परखदै, “अह गल्ल ठीक आसा कि मर्ध सका आपणीं बेटल़ी छ़ाडी?”
ईशू दैनअ इहअ सुआल पुछ़ी तिन्नां लै ज़बाब, “परमेशरे गूर मोसा तम्हां लै एते बारै किज़ै आसा लिखअ द?”
तिन्नैं बोलअ, “मोसा आसा बैईदाऊअ लिखी करै छ़ाडी दैणा लै बोलअ द।”1
ईशू बोलअ तिन्नां लै, “मोसा पल़अ एते तैणीं इहअ हुकम लिखणअ कि थारै मन्न तै काठै हुऐ दै। मणछ आसा पैहलै ई का परमेशरै मर्ध अर बेटल़ी ई बणाऐं दै।2 तैही बोला परमेशर कि मर्ध रहणअ आपणैं ईजा-बाबा छ़ाडी आपणीं लाल़ी संघै एक। एही ता थिऐ बैह करनै आल़ै पैहलै दूई ज़ुदै-ज़ुदै मणछ, परमेशर मना तिन्नां दुही ऐबै एक मणछे रुपै, तैही च़ाहा सह कि तिंयां लोल़ी बैहा बाद सदा कठा रहै।
“तैही निं तिंयां ऐबै दूई देही आथी पर तिंयां रहा एक देही बणी।3 एतो मतलब आसा इहअ कि ज़ुंण परमेशरै ज़ोल़ै दै आसा, तिन्नां ज़ुदै करदै निं तम्हैं लागा।”
च़ेल्लै लागै घअरै पुजी इना गल्ले बारै पुछ़दै। ईशू बोलअ तिन्नां का, “ज़ुंण आपणीं बेटल़ी छ़ाडी दुजी संघै बैह करा, सह करा तैहा छ़ाडी दी बेटल़ीए खलाफ कंज़रैई। ठीक इहअ ई ज़ै कुंण बेटल़ी आपणैं मर्धा छ़ाडी कहा होरी संघै बैह करे, सह बी करा कंज़रैई।”
लान्हैं लै बर्गत
(मोत्ती 19:13-15; लूका 18:15-17)
तेखअ लागै तिंयां लोग ईशू सेटा लै लान्हैं आणदै कि सह तिन्नां दी छ़ुंहीं करै बर्गत दैए पर च़ेल्लै लागै तिन्नां लै इहअ बोल्दै कि गूरू निं तंग करा।
इहअ भाल़ी आई ईशू तिन्नां च़ेल्लै लै रोश्शै संघा बोलअ तिन्नां लै, “इना लान्हैं दैआ मुंह सेटा लै एछणैं इना निं रोक्का! किल्हैकि परमेशरो राज़ आसा इना लान्हैं ज़िहै मणछो ई। हुंह खोज़ा तम्हां का सत्त कि ज़ुंण बी परमेशरे राज़ा इना शोहरू ज़िहअ निं मने, सह निं तेथ कधि डेऊई सकदअ।” ईशू बशैल़ै तिंयां लान्हैं आपणैं भोसल़ै अर तिन्नें मुंडै हाथ फेरी करै दैनी तिन्नां लै बर्गत।
सेठ ज़ुआन मणछ
(मोत्ती 19:16-30; लूका 18:18-30)
तेखअ ज़ांऊं ईशू बाता हांढदअ त लागअ द, एक मणछ आअ ठुर्ही अर तेऊ टेक्कै ईशू सेटा ज़ान्हूं संघा लागअ इहअ पुछ़दअ, “हे भलै गूरू, सदा रहणैं आल़ी ज़िन्दगी लै हुंह किज़ै करूं?”
ईशू बोलअ तेऊ लै, “तूह मुल्है भलअ किल्है बोला? परमेशरा सुआई निं होर कोहै बी भलअ आथी। ताखा परमेशरे इना हुकमो ता हणअ थोघ कि हत्या निं करनी, कंज़रै निं हणअ, च़ोरी निं करनी, झ़ुठी शाजत निं दैणीं, धोखअ निं दैणअ अर आपणैं ईजा-बाबे करनी च़ाकरी।”4
तेऊ मणछै बोलअ ईशू लै, “हे गूरू, इना गल्ला मना हुंह होछ़ी उझै!”
ईशू भाल़अ तेऊ बाखा लै संघा बोलअ तेऊ लै, बडी झ़ूरी करै, “ताह दी आसा एकी गल्ले कामीं, डेऊ, ज़ुंण तेरअ आसा, तेऊ बांड गरीब मणछा लै अर ताल्है भेटणअ तेरअ धन स्वर्गै, अर तेखअ च़ाल्ल मुंह संघै।”
ज़ांऊं ईशू तेऊ लै ईंयां गल्ला बोली, तेऊ हुअ तेतो खास्सअ दुख, अर सह लागअ तिधा का हांढदअ किल्हैकि सह थिअ खास्सअ सेठ।
ईशू भाल़अ फेर संघा बोलअ आपणैं च़ेल्लै लै, “सेठा मणछो परमेशरे राज़ा दी डेऊणअ आसा बेघै कठण।” च़ेल्लै हुऐ ईशूए गल्ला शूणीं रहैन। ईशू बोलअ तिन्नां लै भिई, “मेरै लान्हैंओ, ज़ुंण धन-माया दी विश्वास डाहा, तिन्नां आसा परमेशरे राज़ा दी डेऊणअ कठण।
“ऊँट सका सिऊंणीए पाशी बाती निखल़ी पर सेठ मणछ निं परमेशरे राज़ा दी डेऊई सकदअ।”
च़ेल्लै हुऐ खास्सै रहैन अर तिंयां लागै आप्पू मांझ़ै गल्ला करदै, “ज़ै इहअ आसा, तै कुंण सका स्वर्गै डेऊई?” ईशू बोलअ तिन्नां बाखा भाल़ी करै, “ज़ुंण मणछे भलै नांईं हई सकदअ, सह सका परमेशरे भलै हई।”5
पतरासै बोलअ ईशू लै, “भाल़, हाम्हैं ता आसा सोभ गल्ला छ़ाडी ताह पिछ़ू आऐ दै।”
ईशू बोलअ तिन्नां लै, “हुंह खोज़ा तम्हां का सत्त कि तिंयां सोभ ज़ुंणी मेरै अर खुशीए समादे तैणीं आपणैं भाई-बैहणी, आपणैं ईज-बाब, लान्हैं-सुन्हैं अर आपणैं घअर, खेचा-खहल़ा छ़ाडी मुंह पिछ़ू आअ द होए
“तिन्नां भेटणअ ऐहा ज़िन्दगी दी तेता का बी खास्सअ फल ज़ुंण तिन्नां का संसारै पिछ़ू छ़ुटअ। ज़ुंण तिन्नैं मुंह पिछ़ू टबर, भाई-बैहणी, ईज-बाब, शोहरू-माठै आल़ै अर खेचा-खहल़ा दी मुंह पिछ़ू दाह-दुख ज़िरे, काल्ला धैल़ी भेटणीं तिन्नां सदा रहणैं आल़ी ज़िन्दगी।
“पर ज़ुंण एभै आप्पू बडै समझ़ा तिंयां हणैं काल्ला धैल़ी होछ़ै अर ज़ुंण एभै होछ़ै नकदरै आसा तिंयां करनै काल्ला धैल़ी बडै।”
आपणीं मौते बारै ईशूए चिऊथी बारी खोज़णअ
(मोत्ती 20:17-19; लूका 18:31-34)
एरुशलेम नगरी लै डेऊंदी त बाता ईशू तिन्नां का आजू हांढदअ लागअ द। तेऊए च़ेल्लै तै रहैन हुऐ दै। ज़ुंण तेऊ संघै होर तै हांढदै लागै दै तिंयां थिऐ डरै दै। तेखअ निंयैं तेऊ आपणैं तिंयां बारा च़ेल्लै आप्पू संघै। तेऊ खोज़ी तिन्नां का तिंयां गल्ला ज़ुंण आजू ती हणैं आल़ी,
“शूणां, हाम्हैं आसा च़ाल्लै दै एरुशलेम नगरी लै। हुंह मणछो पूत ढाकणअ बडै प्रोहता अर शास्त्री लोगे हाथै। तिन्नां लाणअ मुल्है मारी पाणै जोगी दोश अर तेखअ दैणअ तिन्नां होरी ज़ातीए हाथै। तिन्नां करनअ मेरअ सुहांग-मखौल। मुल्है पाणअ तिन्नां थुक्की अर तेखअ च़िक्कणअ कोल़ै करै। खिरी पाणअ तिन्नां हुंह मारी। पर हुंह हणअ चिऊथै धैल़ै मरी करै ज़िऊंदअ।”
याकब अर जोहन्ने अरज़
(मोत्ती 20:20-28)
तेखअ आऐ जबदीए शोहरू याकब अर जोहन्ना तेऊ सेटा संघा लागै इहअ बोल्दै, “हे गूरू हाम्हैं च़ाहा तै इहअ कि ज़ुंण हाम्हैं ताखा मांगे तूह करै तेता हाम्हां लै।”
ईशू बोलअ तिन्नां लै, “तम्हैं किज़ै च़ाहा, हुंह तम्हां लै कै करूं?”
तिन्नैं बोलअ ईशू लै, “हाम्हैं च़ाहा तेरै राज़ा दी तेरी महान राज़गाद्दी दी तेरी दैहणीं अर बाऊंईं कुछी बेशणअ।”
ईशू बोलअ तिन्नां लै, “तम्हां का निं थोघै कि तम्हैं किज़ै मांगा? ज़ुंण दुखो घुप्पू मुंह लागणअ झुटणअ तेता कै तम्हैं झुटी सका? तम्हां कै होरीए हाथै आपणीं मौत हणें डुबकी दैई सका ज़िहअ तिन्नां हुंह पाणअ मारी?”
तिन्नैं बोलअ ईशू लै, “हाम्हैं सका इहअ करी।”
ईशू बोलअ तिन्नां लै, “हाँ, अह आसा सच्च़ी कि तम्हां हेरनअ मुंह ज़िहअ दुखो घुप्पू बी झुटी अर होरीए हाथै मौत हणें डुबकी बी हेरनी तम्हां दैई। पर ज़ुंण तैहा ज़ैगा लै परमेशरै आसा छ़ांटै दै, तिन्नां छ़ाडी निं होरी आपणैं दैहणै अर बाऊंऐं अदरे ज़ैगा बशैल़णअ मेरअ काम आथी।”
इहअ शूणीं आई तिन्नां होरी दस च़ेल्लै याकब अर जोहन्ना लै रोश्शै।
ईशू शादै तिंयां आप्पू सेटा लै संघा बोलअ तिन्नां लै, “तम्हां का आसा ऐहा गल्लो थोघ कि ज़ुंण होरी ज़ातीए सैणैं हआ, तिंयां करा तिन्नां दी राज़ अर तिन्नां मांझ़ै ज़ुंण बडै हआ तिंयां डाहा तिन्नां दी हक। पर तम्हां मांझ़ै निं इहअ आथी, ज़ै तम्हां मांझ़ै कुंण बडअ हणअ च़ाहे, सह बणें पैहलै थारअ दास। ज़ुंण तम्हां मांझ़ै प्रधान हणअ च़ाहे, सह लोल़ी पैहलै सोभिओ दास बणअ।
“हुंह मणछो पूत निं एते तैणीं आथी आअ द कि कुंण मेरी च़ाकरी करे पर हुंह आसा एते तैणीं आअ द कि हुंह होरीए च़ाकरी करे अर सोभी लोगे छ़ुटकारै लै आपणैं प्राण दैए।”
बरतिमांई नाओं कांणअ मणछ किअ नरोगअ
(मोत्ती 20:29-34; लूका 18:35-43)
एरुशलेम नगरी लै डेऊंदी पुजै ईशू अर तेऊए च़ेल्लै जेरिहो नगरी। ईशू अर तेऊए च़ेल्लै लागै जेरिहो का आजू हांढदै। तिधी आऐ खास्सै मणछ।
तिमांई नाओंए मणछो शोहरू बरतिमांई त एक कांणअ भिख मांगणै आल़अ बाते बाढै बेठअ द। ज़ांऊं तेऊ कांणै मणछै शूणअ कि अह आसा नासरत नगरीओ ईशू, तेऊ बोलअ, “हे राज़ै दाबेदे लुआद ईशू, मुल्है कर झींण।”
सोभ लागै तेऊ कांणै मणछा लै नैरदै कि च़ुप्पी रह।
पर सह रहअ तेतरअ खास्सअ बोल्दअ ई लागी, “हे राज़ै दाबेदे लुआद, ईशू मुल्है कर झींण।”
तेखअ खल़्हुअ ईशू संघा बोलअ लै, “एऊ कांणै मणछा आणा ओर्ही मुंह सेटा लै।”
तिन्नैं लोगै शादअ सह कांणअ मणछ संघा लागै इहअ बोल्दै, “हिम्मत डाह, खल़अ उझ़ू, ईशू शादा ताह आप्पू सेटा लै।” तेऊ शोटै आपणैं झिकल़ै तिधी अर सह आअ तेभी ईशू सेटा लै।
ईशू बोलअ तेऊ लै, “तूह किज़ै च़ाहा कि हुंह ताल्है करूं?”
कांणै बोलअ ईशू लै, “हे गूरू, मेरी आछी कर ठीक मुखा लोल़ी शुझुअ।”
ईशू बोलअ तेऊ लै, “डेऊ, तेरै विश्वासै किअ तूह नरोगअ।” तेऊ का लागअ तेभी शुझदअ अर सह लागअ बातै ईशू पिछ़ू हांढदअ।
Source notes (5)
- Cross-reference बधा. 24:1-3
- Footnote मूल. 1:27; मोत्त. 19:4
- Footnote मूल. 2:24
- Footnote लुआ. 20:12-16; रोम. 13:9
- Footnote आयू. 42:2; लूक. 1:37
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.