Kulvi Outer Seraji Bible
मार्कुस 6
नासरत नगरी ईशूओ अदर नांईं करनअ
(मोत्ती 13:53-58; लूका 4:16-30)
कफरनहूम नगरी का डेऊअ ईशू आपणैं घअर नासरत नगरी लै अर तेऊए च़ेल्लै बी डेऊऐ तेऊ संघा। तिधी लागअ बशैघे धैल़ी ईशू सभागृहा शिक्षा दैंदअ।
खास्सै मणछ हुऐ तेऊए गल्ला शूणीं रहैन, तिंयां लागै इहअ बोल्दै,
“एऊ ईंयां गल्ला किधा का शिखल़ी? अह कुंण ज़िहअ ज्ञैन आसा ज़ुंण सिधअ एऊ लै आसा दैनअ द? हेरे, अह भाल़ किहै-किहै च़मत्कारे काम करा! एऊ बछ़ैणा हाम्हैं सोभै! अह कै सह ई मिस्त्री निं आथी ज़ुंण मरिअमो शोहरू आसा? याकब, जोसेस, यहूदा, अर शमौनो आसा अह ज़ेठअ भाई अर एऊए बैहणी कै हाम्हां मांझ़ै निं रहंदी?” इना गल्ला पिछ़ू निं तिन्नैं सह मनअ आथी।
ईशू बोलअ तिन्नां लै, “परमेशरे गूरो हआ होरी सोभी ज़ैगा अदर पर आपणीं नगरी, रिश्तैदारा अर टबरा मांझ़ै निं तेऊओ अदर हंदअ।” ईशू निं तिधी किछ़ै खास्सै च़मत्कारे काम किऐ, तेऊ किऐ तिधी सिधै धख ज़िहै बमारा दी आपणैं हाथा करै छ़ुंहीं नरोगै।
ईशू हुई ऐहा गल्ले रहैनी कि तिन्नैं निं विश्वास किअ! ईशू रहअ आपणैं च़ेल्लै संघै नगरी अर गराऊंऐं हांढी शिक्षा दैंदअ लागी।
बारा च़ेल्लै छ़ाडणैं
(मोत्ती 10:5-15; लूका 9:1-6)
तेखअ शादै एकी धैल़ी ईशू आपणैं बारा च़ेल्लै आप्पू सेटा अर तेऊ छ़ाडै तिंयां दूई-दूई करै नगरी गराऊंऐं अर तिन्नां लै दैनअ भूता काढणेंओ हक।
संघा दैनअ तिन्नां लै इहअ हुकम, “बाता हांढणा लै शोठै का सुआई निं आप्पू संघा किछ़ पाई, नां रोटी, नां झ़ोल़ी नां ढबैओ थैल्लू। खूरै बान्हां पोलल़ै अर दूई कुर्तै बी निं संघा निंईं।”
होर बोलअ ईशू तिन्नां लै इहअ, “ज़ै तम्हां कुंण आपणैं घअरा लै प्राहुंणैं शादे, तम्हैं डेओऐ तेऊ घअरा लै अर रोटी खाई सुत्तै तेऊ ई घअरै ज़ेभै तैणीं तम्हैं तैहा नगरी का बागै निं डेओए।
“ज़िधी लोग तम्हां नांईं मने अर थारी गल्ला नांईं शुणें, तैहा ज़ैगा ठुल़्हकै आपणैं खूरा का धूल़अ पोर्ही, ताकि तिन्नां लै शाजत होए कि तिन्नैं निं थारअ सुआगत किअ।”
ईशूए च़ेल्लै बी डेऊऐ अर तिन्नैं बी किअ इहअ प्रच़ार कि आपणैं पापो प्राश्त करा, अर परमेशरा सेटा एछा फिरी। संघा काढै तिन्नैं कई मणछा का भूत पोर्ही अर खास्सै रोगी मणछा लै मल़अ प्राथणां करी तेल संघा किऐ नरोगै।
जोहन्ना डुबकी दैणैं आल़ेए हत्या
(मोत्ती 14:1-12; लूका 9:7-9)
ईशूए बारै लागअ हर ज़ैगा थोघ अर ईंयां गल्ला पुजी हेरोदेस राज़ै सेटा बी कई लोग बोला तै इहअ, “जोहन्ना डुबकी दैणैं आल़अ हुअ मरी करै ज़िऊंदअ, तैही हआ तेऊ का ईंयां शगती अर च़मत्कारे काम प्रगट।”
कई होरी लोगै बोलअ इहअ बी, “अह आसा एलियाह।” पर कोई लोगै बोलअ इहअ, “अह आसा गूर, या पैहलकै ज़मानें गूरा मांझ़ै कुंण एक।”
हेरोदेस राज़ै बोलअ इना गल्ला शूणीं इहअ, “ज़ुंण जोहन्ना डुबकी दैणैं आल़अ मंऐं मारी पाअ त, मेरै खैलै हुअ सह ई ज़िऊंदअ।”
ईंयां गल्ला हुई ती एही कि ज़धू जोहन्ना ज़िऊंदअ थिअ, हेरोदेस राज़ै किअ आपणैं भाई फलिप्पे ज़िऊंदी ज़िता तेऊए लाल़ी हेरोदियासा संघै नज़ायज़ बैह।
जोहन्ना बोलअ त हेरोदेस राज़ै लै इहअ, “आपणैं भाईए ज़िऊंदी ज़िता तेऊए लाल़ी डाही करै किअ तंऐं पाप।” हेरोदेस राज़ै छ़ाडै जोहन्ना ढाकणा लै सपाही अर सह पाअ कैद खानै दी।1 एता पिछ़ू डाहा ती हेरोदियास जोहन्ना संघै ज़ीद अर सह च़ाहा ती तेऊ किहअ करै मारनअ, पर इहअ निं हई सकअ।
किल्हैकि हेरोदेस राज़ै लागा ती जोहन्ना का डअर किल्हैकि तेऊ का थिअ थोघ कि जोहन्ना आसा धर्मीं अर पबित्र मर्ध। सह करा त तेऊए हेर-सभाल़ बी अर तेऊ लागा ती तेऊए गल्ला शूणीं डअर पर तैबी बी हआ त सह तेऊए गल्ला शुणना लै खुशी।
ज़ेऊ मोक्कै लोल़ी हेरोदियास लागी दी थिई, सह मोक्कअ भेटअ तैहा तेभै ज़ांऊं हेरोदेस राज़ै आपणीं ज़ल्म धैल़ी दी आपणैं प्रधाना, सैनापति अर गलील मुल्खे बडै-बडै लोगा लै भोज़ दैनअ।
हेरोदियासे शोहरी आई भितरा लै, अर आपणअ नाच़ रहैऊई करै किऐ हेरोदेस अर तेऊ संघै बेठै दै सोभ खुश, तैहा का खुश हई बोलअ राज़ै तैहा शोहरी लै, “तूह ज़ुंण बी मुखा मांगे, मुंह दैणअ ताल्है खुशी-खुशी।” होर ता होर राज़ै दैनी सोभी नदरी तैहा लै ज़बान, “ज़ुंण बी तूह मुखा मांगे सह लाअ मंऐं ताल्है दैई, इधी तैणीं कि, ज़ै तूह मुखा आधअ राज़ बी मांगे, तेता बी दैंऊं हुंह ताल्है।”2
सह शोहरी डेऊई बागै आपणीं ईजा सेटा पुछ़दी, “हुंह किज़ै मांगूं?”
तेसे ईजा बोलअ तैहा लै, “जोहन्ना डुबकी दैणैं आल़ैओ मूंड मांग।”
सह आई तेभी राज़ै सेटा भितरा लै अर तैहा बोलअ राज़ै लै, “हुंह च़ाहा कि तूह दै मुल्है एभी जोहन्ना डुबकी दैणैं आल़ैओ मूंड काटी थाल़ा भितरी आणी।”
ऐहा गल्ला शूणीं हुअ राज़अ खास्सअ दुखी पर तिधी बेठै दै सोभी प्राहुंणैं बी शूणीं तेऊए तिंयां गल्ला अर तेता लै निं सह हुधणअ च़ाहंदअ त। इहअ करै दैनअ राज़ै बी तेभी आपणैं सपाही लै हुकम, “कैद खानै लै डेओआ संघा आणा तेऊओ मूंड एभी काटी।”
सपाही बी डेऊऐ अर थाल़ा भितरी दैनअ जोहन्ना डुबकी दैणैं आल़ैओ मूंड काटी तैहा शोहरी लै आणी अर तैहा शोहरी निंयं सह आपणीं ईजा सेटा लै। इहअ शूणीं आऐ जोहन्ने च़ेल्लै अर तेऊए ल्हास निंईं करै डाही तिन्नैं सह घोरी दाबी।
ईशूए च़ेल्लेओ बापस फिरनअ अर ईशूओ कांगनरांगै डेऊणअ
(मोत्ती 14:13,14; लूका 9:10)
बारा शधाणूं हुऐ सोभ ईशू सेटा कठा अर ज़िहअ-ज़िहअ तिन्नैं किअ अर ज़िहअ लोगा का सखाऊअ थिअ, तिन्नैं खोज़ी तेऊ सेटा पुजी तिंयां सारी गल्ला बाढै।
ईशू बोलअ तिन्नां लै, “हाम्हां डेऊणअ किधी कांगनरांगी ज़ैगा लै थोल़ी घल़ी करनअ राम।” किल्हैकि तिधी रहा तै खास्सै मणछ एछदै लागी अर तिन्नां निं रोटी खाणेंओ बगत बी भेटदअ त।
तेखअ डेऊऐ तिंयां किश्ती दी बेशी एकी कांगनरांगी ज़ैगा लै।
पांज़ा हज़ारा मर्धा का रोटी खैऊंणी
(मोत्ती 14:15-21; लूका 9:11-17; जोहन्ना 6:1-14)
लोगै हेरै तिंयां डेऊंदै भाल़ी अर बछ़ैणीं, लोग ठुर्है पिछ़ू आपणीं ज़ांघा हांढी अर तिंयां गऐ तैहा ज़ैगा पैहलै पुजी ज़िधा लै ईशू अर तेऊए च़ेल्लै पुजै। ईशू तिधी पुजी किश्ती का होथअ अर तिधी आऐ खास्सै मणछ अर ईशू फिरी तिन्नां भाल़ी झींण। किल्हैकि तिंयां थिऐ एही भेडा ज़िहै ज़हा फुआल कोहै निं हंदअ। तेखअ लागअ ईशू कई गल्ले शिक्षा दैंदअ।3
ज़ांऊं सान्ह च़ाल्ली पल़ी, तेऊए च़ेल्लै आऐ तेऊ सेटा लै अर तिंयां लागै इहअ बोल्दै, “अह आसा बडी कराहणीं ज़ैगा, धैल़अ बी गअ उडी। इना लोगा लै बोल घअरा डेऊणा लै ताकि ओरी-पोरी गराऊंऐं डेऊई ईंयां आप्पू लै खाणैं-पिणैंओ इंतज़ाम करी सके।”
पर ईशू बोलअ तिन्नां लै, “तम्हैं दैआ इना लै खाणां लै।”
तिन्नैं बोलअ ईशू लै, “हाम्हां कै इना सोभी लै दूई शौआ च़ंदीए सिक्कै दैई लाई रोटी आणी लई अर तेखअ खैऊंणी?”
ईशू बोलअ तिन्नां लै, “डेओआ, अर भाल़णीं दैआ हेरुं तम्हां सेटा केतरी रोटी आसा?”
तिन्नैं भाल़ी बोलअ, “हाम्हां का आसा सिधी पांज़ रोटी, अर दूई म्हाछ़ली।”
तेखअ बोलअ ईशू तिन्नां लै, “सोभी बशैल़ा धरनीं हरी घाहा प्रैंदै घेहल़ी दी।” तिंयां सोभ बेठै शौ-शौ अर पज़ाह-पज़ाह करै एकी-एकी घेहल़ी दी।
ईशू ढाकी तिंयां पांज़ रोटी अर दूई म्हाछ़ली हाथै अर सरगा बाखा लै भाल़ी किअ परमेशरो शूकर। तेखअ लागअ रोटी चोल़ी-चोल़ी करै च़ेल्लै का दैंदअ अर तिंयां लागै लोगा लै बांडदै, अर तिंयां दूई म्हाछ़ली बी दैनी सोभी लै बांडी करै।
इहअ करै खैऊई सोभी लोगा का रोटी अर तिंयां सोभ लोग रज्ज़ै। बारा च़ठै भर्हुऐ तिन्नां रोटीए ज़ुंण पिछ़ू बच़ी अर म्हाछ़लीए बी बच़ै कई च़ठै। ज़ेतरै ज़ण्हैं रोटी खाई, तिंयां थिऐ गणी करै कोई पांज़ हज़ार मर्ध ई मर्ध। बेटल़ी अर माठै निं तिन्नैं गणै आथी।
ईशूओ पाणीं प्रैंदै हांढणअ
(मोत्ती 14:22-33; जोहन्ना 6:15-21)
तेखअ बोलअ तेभी ईशू आपणैं च़ेल्लै लै किश्ती दी बेशणा लै इहअ कि तम्हैं डेओआ आजू समुंदरा पार बैतसैदा नगरी लै हुंह एछूं इना सोभी लोगा घअरा लै छ़ाडणैं का बाद। तिन्नां मणछा घअरा लै छ़ाडी डेऊअ ईशू प्राथणां करदअ धारठी प्रैंदा लै।
ज़ांऊं सान्ह पल़ी, किश्ती ती समुंदरा मांझ़ै अर ईशू त कल्ही समुंदरे बाढै। ज़ांऊं तेऊ भाल़अ कि तिंयां च़ेल्लै डरै किश्ती च़लाऊंदी किल्हैकि समुंदरै आअ ढिश-बागर इहअ कि; तिंयां आणै हारी-मारी।
ईशू बी आअ राचकै च़ौथै पहरै समुंदरे पाणीं प्रैंदै च़ेल्लै सेटा लै अर तिन्नां का च़ाहा ती ईशू आजू निखल़णअ। तिन्नैं च़ेल्लै भाल़अ सह समुंदरे पाणीं प्रैंदै हांढदअ। तिन्नैं सोठअ इहअ कि अह आसा भूत। तिन्नैं पाई डरै मारै ज़ोरै-ज़ोरै लैल़ा-पकारा। तिंयां सोभै ज़ण्हैं डरै तेऊ भाल़ी करै। पर ईशू किई तेभी तिन्नां संघै गल्ला संघा बोलअ तिन्नां लै, “हैअ डाहा, डरा निं आथी हुंह आसा।”
ईशू उखल़अ तिन्नें किश्ती दी अर ढिश-बागर मुक्की तेभी। तिंयां सोभ हुऐ रहैन। तिन्नें मन्न तै एतरै काठै हुऐ दै कि तिंयां निं पांज़ हज़ारा लोगा का रोटी खैऊणेंओ मतलब बी समझ़ै कि ईशू का केतरी शगती आसा।
गन्नेसरत समुंदरे बाढै किऐ खास्सै रोगी नरोगै
(मोत्ती 14:34-36)
तिंयां सोभ पुजै गलील समुंदरा पार डेऊई गन्नेसरत संघा खरैल़ी किश्ती बाढै। ज़ांऊं तिंयां किश्ती का होथै, लोगै हेरअ ईशू तेभी बछ़ैणीं।
संघा ठुर्है तिंयां लोग ओरी-पोरीए गराऊंआं दी अर कई बमार मणछ आणै मांज़ै प्रैंदै च़की। ज़िधी तिन्नां का थोघ लागअ कि ईशू आसा, तिधा लै रहै तिंयां निंदै लागी।
ज़िधी बी ईशू घअरै, नगरी, च़ाऐ गराऊंआं दी डेओआ त, लोग निंयां तै बमार मणछ तेऊ सेटा लै।
तिंयां करा तै एही अरज़ कि ए ईशू हाम्हां दै तेरै झिकल़ैओ पाल्लअ छ़ुंहंणै ताकि हाम्हैं इना बमारी का बच़े। ज़ेतरै तेऊ छ़ुंहां तै तिंयां छ़ुटै हर बमारी का।
Source notes (3)
- Cross-reference लेब. 18:16; 20:21
- Cross-reference एस. 5:3,6; 7:2
- Cross-reference 2 इति. 18:16; 1 राज़. 22:17
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.