Kulvi Outer Seraji Bible
मार्कुस 14
ईशूए लै छ़ल़
(मोत्ती 26:1-5; लूका 22:1,2; जोहन्ना 11:45-53)
दूई धैल़ै बाद थिअ ऊवार्णैओ थैर अर आखरी रोटीओ थैर हणैं आल़अ, अर बडै प्रोहत अर शास्त्री तै ऐहा गल्ला लोल़ै लागै दै कि किहअ करै छ़ल़-कपट करी पाणअ त ईशू मारी। पर तिंयां बोला तै इहअ बी कि ऊवार्णे थैरे धैल़ी निं हाम्हां इहअ करनअ, इहअ निं हआ कि लोगा मांझ़ै उपद्रभ होए।
बेथनी गराऊंऐं ईशूए सीख
(मोत्ती 26:6-13; जोहन्ना 12:1-8)
ईशू थिअ बेथनी गराऊंऐं शमौने घअरै ज़ुंण ईशू कोहल़ा का शुचअ किअ त। ज़ांऊं सह रोटी खांदअ बेठअ, तिधी आई एक बेटल़ी। तैहा आणअ संगमरमरे भांडै दी जटामांसीओ किम्मती खुशबूदार तेल अर सह तरैल़अ ईशूए मुंडै।
पर कई लागै आपणैं मन्नें रोश्शै बोल्दै कि अह एतरअ किम्मती तेल किल्है किअ ऐहा बरैबाद? किल्हैकि एऊ खुशबूदार किम्मती तेला सका तै चिई शौआ च़ंदीए सिक्कै का बी खास्सी किम्मती बेच़ी गरीबा लै बांडी। तिंयां लागै तेसे बारै इहअ बोल्दै कि ऐहा किअ अह गलत।
ईशू दैनअ ज़बाब, “ऐहा छ़ाडा, ऐहा किल्है करा तम्हैं तंग? ऐहा किअ मुल्है भलअ।
“गरीब रहणैं कबल्लै तम्हां ई संघै तम्हैं ज़ेभै च़ाहे तेभै सका तिन्नां लै दैई, पर हुंह निं तम्हां संघै कबल्लअ च़ाल्लअ रहई। 1 ज़ुंण बी अह करी सका ती अर ज़ुंण ऐहा किअ, ऐहा मल़अ मुंह दाबणा लै पैहलै ई मेरी देही लै तेल।
“हुंह खोज़ा तम्हां का सत्त कि सारै संसारै ज़िधी बी मेरै बारै खुशीओ समाद प्रच़ार होए तिन्नां मणछा खोज़णअ एसे बारै बी कि ऐहा मुल्है किज़ै किअ।”
यहूदो छ़ल़-कपट
(मोत्ती 16:14-16; लूका 22:3-6)
तैबै करेती गराऊंओ यहूदा ज़ुंण तिन्नां बारा च़ेल्लै मांझ़ै एक त, सह डेऊअ बडै प्रोहता सेटा लै इहअ बोल्दअ कि हुंह करूं थारी ईशू ढाकणा लै मज़त। इहअ शूणीं हुऐ तिंयां खास्सै खुश अर तेऊ लै मनै तिन्नैं खास्सै ढब्बै दैणैं, सह रहअ तेऊ ढाकणें मोक्कै न्हैल़अ लागी।
च़ेल्लै संघै खिरीओ भोज़
(मोत्ती 26:17-25; लूका 22:7-14,21-23; जोहन्ना 13:21-30)
दूई धैल़ै बाद, आखरी रोटीए थैरे पैहली धैल़ी, ज़ेभै तिंयां ऊवार्णैओ मिम्मूं बल़ीदान करा तै, ईशूए च़ेल्लै पुछ़अ तेऊ का, “तूह किधी च़ाहा कि हाम्हैं ताल्है ऊवार्णे थैरो भोज़ बणांए?”2
तेऊ छ़ाडै आपणैं च़ेल्लै मांझ़ै दूई ज़ण्हैं इहअ बोली, “नगरी लै डेओआ तिधी भेटणअ तम्हां एक मणछ तेऊ हणअ पाणींओ घल़अ च़कअ द, तम्हैं लागै तेऊ पिछ़ू हांढदै।
“तेखअ सह ज़हा घअरा लै डेओए तेऊ घअरे मालका लै बोलै तम्हैं कि गूरू बोला इहअ कि तेरी प्राहुंणें पांड किधी आसा? ज़िधी हुंह आपणैं च़ेल्लै संघै ऊवार्णे थैरो भोज़ खाई सकूं। तेऊ रहैऊंणीं तम्हां का एक सज़ाऊई दी पांड, तिधी बणाऐं तम्हैं ऊवार्णे थैरो भोज़।”
च़ेल्लै बी पुजै नगरी अर ज़िहअ ईशू तिन्नां का बोलअ त तिन्नां भेटअ तिहअ ई अर तिन्नैं बणाअं ऊवार्णे थैरो भोज़।
ज़ांऊं सान्ह पल़ी, ईशू आअ तिधा लै आपणैं बारा च़ेल्लै संघै। ज़ांऊं तिंयां रोटी खांदै बेठै, ईशू बोलअ तिन्नां लै, “हुंह खोज़ा तम्हां का सत्त कि तम्हां मांझ़ै आसा एक इहअ ज़ुंण मुंह संघा इधी रोटी खांदअ बी आसा बेठअ द, तेऊ बझ़ैल़णअ हुंह ढाकणैं।”3
तिंयां हुऐ खास्सै दुखी, अर तिंयां लागै एक-एक करी बारी-बारी तेऊ का पुछ़दै, “हे गूरू सह हुंह किनी आसा?”
ईशू दैनअ तिन्नां लै ज़बाब, “सह आसा तम्हां बारा मांझ़ै एक, ज़ुंण मुंह संघै म्हार थाल़ू का डबेऊई करै खाआ।
“किल्हैकि हुंह मणछो पूत ता मरनअ तेऊ ई साबै ज़िहअ मेरै बारै पैहलै ई आसा लिखअ द। पर तेऊ मणछा लै आसा घोर आफ़त! ज़हा हुंह ढाकणैं बझ़ैल़णअ। तेऊ लै त भलअ इहअ ई कि तेऊओ ज़ल्म ई नांईं हंदअ।”
प्रभू भोज़
(मोत्ती 26:26-30; लूका 22:14-20; 1 करिन्थी 11:23-25)
ज़ांऊं तिंयां रोटी खांदै बेठै; ईशू परमेशरो शूकर करी रोटी चोल़ी अर तिन्नां लै दैई बोलअ, “हुंज़ा, अह आसा मेरी देही।”
तेखअ ईशू दाखे रसा करै भरअ द प्रिहअ हाथै लई करै परमेशरो शूकर किअ अर तिन्नां लै दैनअ अर तिन्नैं सोभी झुटअ तेता का।
तेखअ बोलअ ईशू तिन्नां लै, “अह आसा मेरअ लोहू, ज़ुंण खास्सै लै बहाऊंणअ अह आसा परमेशरे मणछा लै करार।4 हुंह खोज़ा तम्हां का सत्त कि अह दाखो रस निं मुंह तेभै तैणीं झुटणअ, ज़ेभै तैणीं हुंह परमेशरे राज़ा दी नऊंअ दाखो रस निं झुटूं।”
तेखअ डेऊऐ ईशू अर तेऊए च़ेल्लै ऊवार्णे थैरे गिहा बोल्दी बागै जैतून धारा लै।
पतरासे हुधणें बारै गल्ला प्रगट करनी
(मोत्ती 26:31-35; लूका 22:31-34; जोहन्ना 13:36-38)
तैबै बोलअ ईशू तिन्नां लै, “तम्हैं ठुहर्नै सोभ मुंह छ़ाडी, किल्हैकि शास्त्रा दी आसा मेरै बारै इहअ लिखअ द कि
‘मुंह पाणअ फुआल मारी
अर भेडा छिंघणीं ओरी-पोरी।’
“पर हुंह डेऊणअ ज़िऊंदअ हई तम्हां का आजी गलील मुल्खा लै।”
पतरासै बोलअ ईशू का, “होर लागे ताह छ़ाडी ठुहर्दै पर हुंह निं ताह छ़ाडदअ।” ईशू बोलअ तेऊ लै, “हुंह खोज़ा ताखा सत्त कि आझ़ ऐहा ई राची मुर्गै दूई बारी बाशणैं का आजी हुधणअ तूह मेरै बारै चिई बारी।”
पर पतरासै बोलअ होर बी ज़ोर दैई कि, ज़ै मुंह ताह संघै मरनअ बी लागे, तैबी बी निं हुंह तेरै बारै हुधदअ। इहअ ई बोलअ तिन्नैं होरी सोभी ज़ण्हैं।
गतसमनी नाओंए ज़ैगा ईशूए प्राथणां
(मोत्ती 26:36-46; लूका 22:39-46)
तेखअ आऐ तिंयां गतसमनीं नाओंए एकी ज़ैगा लै अर ईशू बोलअ आपणैं च़ेल्लै लै, “इधी रहा बेशी, ज़ेभै तैणीं हुंह प्राथणां करूं।”
ईशू निंयैं पतरास, याकब अर जोहन्ना आप्पू संघा अर सह हुअ खास्सअ दुखी अर नर्तान। तेऊ बोलअ इहअ, “मेरअ ज़िऊ आसा बडअ दुखी इहअ कि मेरै च़ाल्लै ज़िहै प्राण निखल़ी, तम्हैं खल़्हिया इधी अर बिहुदै रहा।”5
तेखअ डेऊअ ईशू धख आजू ज़िहअ। तिधी लागअ सह धरनीं उटअ पल़ी एही प्राथणां करदअ,
“हे परमेशर ज़ै हई सके ता, तै कर मुखा ऐहा घल़ी एऊ दुखा दूर। ए मेरै बाबा; ताखा सका सोभै गल्ला हई, एऊ दुखे प्रिहअ च़क मुंह सेटा का पोर्ही। पर तैबी बी ज़िहअ हुंह च़ाहा तिहअ निं लोल़ी हुअ। पर ज़िहअ तूह च़ाहा तिहअ लोल़ी हुअ।”
तेखअ आअ ईशू तिन्नां चिई च़ेल्लै सेटा अर तिंयां सुत्तै दै भाल़ी करै, पतरासा लै बोलअ, “शमौन, तूह सुत्तअ द आसा? तूह एकी घल़ी बी निं बिहुदअ रही सकअ?” बिहुदै रहा अर प्राथणां करदै रहा लागी, कि तम्हैं खरी दी पल़ी पाप नां करे, थारअ शाह ता बोला पर देही आसा कमज़ोर।
तेखअ डेऊअ सह भिई प्राथणां करदअ तेऊ किई तेही ई प्राथणां ज़ेही तेऊ पैहलै किई ती। तेखअ आअ सह भिई आपणैं च़ेल्लै सेटा लै अर तेऊ भाल़ै तिंयां घणीं निंजा सुत्तै दै ज़ांऊं तेऊ तिंयां झ़ैऊऐ, तिन्नां निं समझ़ पल़ी कि तेऊ लै कै ज़बाब दैणअ।
तेखअ आअ ईशू चिऊथी बारी प्राथणां करी तिन्नां सेटा लै संघा बोलअ, अज़ी बी तम्हैं सुत्तै दै आसा? बतेर्है सुत्तै ऐबै! भाल़ा, सह घल़ी गई एछी, हुंह मणछो पूत लाअ पापी मणछा का बझ़ैल़ी कैद करनै। खल़ै उझ़िआ, च़ाल्ला, हेरा, ज़ुंणी हुंह ढाकी आसा लाअ द सह गअ एछी।
ईशू धोखै करै ढाकणअ
(मोत्ती 26:47-56; लूका 22:47-53; जोहन्ना 18:3-12)
ईशू त इहअ बोल्दअ ई लागअ द कि यहूदा, ज़ुंण तिन्नां बारा मांझ़ै एक त, सह गअ आप्पू संघा बडै प्रोहत, शास्त्री, सैणैं संघै खास्सै मणछ तलबारा अर शोठै पाई तेभी तिधी पुजी।
करेती गराऊंओ यहूदा त तिन्नां लै इहअ डाहअ द बोली कि ज़हा लै हुंह माख्खी दैंऊं, सह ई आसा ईशू तेऊ करै तम्हैं कैद। सह आअ तेभी अर तेऊ बोलअ ईशू सेटा डेऊई तेऊ लै, “हे गूरू,” संघा दैनअ तेऊ लै माख्खू।
तिन्नैं होरी किअ ईशू कैद। ईशू नेल़ खल़्हुऐ दै च़ेल्लै मांझ़ै काढी एकी आपणीं तलबार अर तेऊ बाही माहा प्रोहते दासा लै, तेऊओ कान शोटअ धरनीं।
ईशू बोलअ तिन्नां लै, “तम्हैं कै हुंह डाकू समझ़अ कि मुंह ढाकदै आसा तलबारा अर शोठै पाई निखल़ै दै?” हुंह, हर धैल़ै तम्हां संघा भबनै शिक्षा दैआ त, तेभै किल्है निं हुंह तम्हैं ढाकअ? पर अह हुअ तै कि पबित्र शास्त्रा दी लिखी दी गल्ला पूरी होए।
ज़ुंण तिधी ईशू संघै तै तिंयां सोभ च़ेल्लै ठुर्है तिधा तेऊ छ़ाडी ओर्ही-पोर्ही। एक ज़ुआन मणछ डेऊअ आपणीं घेरी सिधअ बाछो च़ादरू पल़ेटी तेऊ पिछ़ू-पिछ़ू, अर लोगै ढाकअ सह। पर सह छ़ुटअ तिन्नां का, संघा ठुर्हअ सह आपणैं च़ादरू तिधी छ़ाडी नांगअ ई।
माहा सभा दी ईशू
(मोत्ती 26:57-68; लूका 22:54,55,63-71; जोहन्ना 16:13,14,19-24)
तेखअ निंयं तिन्नैं ईशू माहा प्रोहता सेटा लै, अर होर बडै प्रोहत, शास्त्री अर सैणैं बी हुऐ तिधी सोभै ज़ण्हैं कठा। पतरास डेऊअ तिन्नां पिछ़ू-पिछ़ू माहा प्रोहते खोल़ै तैणीं अर लोगा मांझ़ै बेठअ माहा प्रोहते घअरे पहरी संघै आगी नैथदअ।
बडै प्रोहत अर सारी यहूदी सभा आल़ै तै पैहलै ई इहै लोगा लोल़ै लागै दै ज़ुंण ईशूए खलाफ झ़ुठी शाजत दैए। ताकि तिंयां तेऊ मारी पाए पर तिंयां निं इहअ करी सकै।
किल्हैकि कई तै लागै दै तेऊए खलाफ झ़ुठी शाजत दैंदै, पर तिन्नें शाजत बी नांईं ती एकी रंगे आथी। तैबै दैनी कई खल़ै उझ़ुई करै एही झ़ुठी शाजत कि “हाम्हैं शूणअ अह इहअ बोल्दअ कि मुंह पाणअ अह हाथा करै बणाअं द भबन ढोल़ी अर चिई धैल़ै बाद बणाणअं दुजअ भबन, ज़ुंण हाथा करै नांईं होए बणाअं द।” ऐहा गल्ला लै बी नांईं ती तिन्नें शाजत एकी रंगे ती।
तैबै माहा प्रोहतै मांझ़ै खल़ै हई ईशू का पुछ़अ, “तूह ज़बाब किल्है निं दैंदअ? ईंयां लोग भाल़ तेरै खलाफ किज़ै बोला?” पर ईशू रहअ च़ुप्पी, अर तेऊ निं किछ़ै ज़बाब दैनअ। माहा प्रोहतै पुछ़अ तेऊ का एकी बारी भिई, “तूह कै परमेशरो पूत मसीहा आसा?”
ईशू बोलअ, “हाँ, हुंह आसा, तम्हां भाल़णअ हुंह मणछो पूत सर्वशक्तिमान परमेशरे दैहणै बेठअ द अर सरगै बादल़ा संघै एछदअ।”6
तैबै माहा प्रोहतै आपणैं च़ोल़अ धैल़ी करै बोलअ, “ऐबै निं हाम्हां कोही शाजते ज़रुरत आथी?7 तम्हैं सोभी बी हेरी अह गल्ला शूणीं कि अह बोला आप्पू लै परमेशर अर इहअ करै किई एऊ परमेशरे निंदा! तम्हां होरीए कै राऐ आसा?”8
तिन्नैं होरी बोलअ, “अह आसा मारनै ई जोगी।”
तैबै कई पाअ तेऊए मुंहैं थुक्की, संघा लागै कोऐ तेऊए आछी ढोपी करै धमुक्कै बाहंदै। तेखअ लागै तेऊ लै इहअ बोल्दै, “ऐबै कर आजू हणैं आल़ी गल्ला प्रगट!” ज़ुंण तिधी जोधै मणछ तै, तिन्नैं बाही तेऊ लै च़ैंडै।
पतरासो हुधणअ
(मोत्ती 26:69-75; लूका 22:56-62; जोहन्ना 18:15-18)
पतरास थिअ भबने आजू ताटी बेठअ द, तिधी आई माहा प्रोहते दासी मांझ़े एक बेटल़ी। पतरासा आगी सेटा नैथदअ भाल़ी लागी सह तेऊ कोहरी भाल़ी संघा बोलअ तेऊ लै, “तुबी त तेऊ नासरत गराऊंए ईशू संघै भाल़ी?”
पतरास हुधूअ संघा लागअ इहअ बोल्दअ, “मुखा निं थोघै अर मुंह निस्सी समझ़ पल़ी कि तूह किज़ै बोला?” तेखअ डेऊअ सह बागै डेहल़ा सेटा अर मुर्गअ बी बाशअ।
तेखअ लागी सह दासी तेऊ भाल़ी तिन्नां का बोल्दी ज़ुंण तिधी नेल़ तै, “अह आसा तिन्नां मांझ़ै कोई एक ज़ण्हअ।” पर पतरास हुधूअ भिई।
थोल़ी घल़ी बाद बोलअ तिन्नैं बी ज़ुंण तेऊ नेल़ तै खल़्हुऐ दै, “तूह आसा सच्च़ी तिन्नां ई मांझ़ै कुंण एक किल्हैकि तेरी गल्ला का ज़ाण्हिंआं कि तूह आसा गलील मुल्खा का?”
पतरास लागअ हुधदअ अर सोह खाई करै बोल्दअ, “तम्हैं ज़हा मणछे गल्ला करा, हुंह निं तेऊ बछ़ैणदअ बी आथी।” तेभी बाशअ दुजी बारी मुर्गअ अर
पतरासा फिरी सह गल्ल आद ज़ुंण ईशू तेऊ लै बोली ती, “मुर्गै दुजी बारी बाशणैं का आजी हुधणअ ताह मेरै बारै चिई बारी।” ऐहा गल्ला सोठी करै लागअ सह लेरा लांदअ।
Source notes (8)
- Cross-reference बधा. 15:11
- Cross-reference लुआ. 12:6; 15
- Footnote भज. 41:9
- Cross-reference लुआ. 24:8; जक. 9:11
- Cross-reference भज. 42:5
- Footnote दान. 7:13; भज. 110:1
- Cross-reference मोत्त. 26:65
- Cross-reference लेब. 24:16
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.