इब्रानी

इब्रानी

इब्रानी बोली बोल़णैं आल़ै यहूदी विश्वासी लै च़िठी

भेत

लिखणैं आल़अ: एता लिखणे तरिकै का ज़ाण्हिंआं इहअ कि अह आसा पल़सी लिखी दी, हई सका कि अह कुंणी होरी होए लिखी दी

पहल़णैं आल़ै: ईशू दी विश्वास करनै आल़ै यहूदी

सन: 67-69

इब्रानी बोली बोल़णैं आल़ै विश्वासीए नाओंऐं च़िठी थिई लिखी दी विश्वासी भाईए एकी बडी टोली लै ज़ुंण लोगे बरोधे बज़्हा मसीही विश्वासा का दूर तै हणैं आल़ै। लिखणैं आल़अ करा तिन्‍नां आपणैं विश्वासा दी रहणा लै खुशी-खुशी रही खासकर ऐहा गल्‍ला खोज़दी कि मसीहा ई आसा परमेशरो असली अर खिरीओ रूप। इहअ करदी दैआ सह सत्ता दी ज़ोर।

पैहलै धैऊआ दी खोज़ा सह कि ईशू ई आसा परमेशरो पूत, ज़ुंणी दुख ज़िरी बाब परमेशरो शुचअ हुकम मनणअ शिखल़अ। परमेशरे शोहरूए रुपै आसा ईशू पराणैं बधाने कई परमेशरे गूर, स्वर्ग दूता अर परमेशरे गूर मोसा का महान। दुजै धैऊआ दी खोज़ा सह इहअ कि ईशू बणाअं परमेशरै सारी सदा लै प्रोहत, सह आसा पराणैं बधाने प्रोहता का महान। चिऐ धैऊआ दी खोज़ा सह कि ईशू करै हेरै मणछ पाप, डअर अर मौता का बच़ाऊई अर ईशू दैआ माहा प्रोहते रुपै शुचअ उद्धार, ज़ेतो यहूदी धर्म-बिधी अर पशू बल़ी करै पल़ा सिधअ भैस्स।

इज़राईलीए दादा-बाबे कई मशूर मणछे विश्वासे बारै खोज़ी करा लिखणैं आल़अ पहल़णैं आल़ै का विश्वासा दी टेक्‍की रहणें अरज़ गैर्हुऐ धैऊआ दी। बार्हूऐ धैऊआ दी करा सह आपणैं पहल़णैं आल़ै का एही अरज़ कि खिरी तैणीं रहा विश्वासा दी टेक्‍की अर आपणीं आछी डाहा ईशू बाखा लाई, ज़ुंण दुख अर कष्ट तिन्‍नां प्रैंदै एछा; तिन्‍नां ज़िरा सुलै करै। अह च़िठी हआ कई सलाह अर चतैनगी करै खतम।

पल़सी खोज़ा इहअ कि इहअ कि मसीहा ईशू ज़िहअ माहा प्रोहत हणैंओ किज़ै मतलब आसा:

“म्हारअ माहा प्रोहत ईशू मसीहा रहा म्हारै दाह-दुखा दी हाम्हां संघै, सह परखअ सोभी गल्‍ला लै हाम्हां ज़िहअ, पर तैबी निं तेऊ दी एक पाप बी निखल़अ। एछा, हाम्हां करनी हिम्मत संघा डेऊणअ तेऊ मसीहा नेल़, ज़ुंण स्वर्गे राज़गाद्दी का राज़ करा। तेऊ किई हाम्हां लै एही झींण ज़ेते हाम्हैं हकदार बी नांईं तै आथी। म्हारी खरीए पलका रहणअ सह मसीहा ई हाम्हां लै झणैल़ू अर म्हारी मज़त बी करनी तेऊ ई।”

(4:15,16)

कताबे बांड

भेत, मसीहा परमेशरो पूरअ रूप 1:1-3

मसीहा स्वर्ग दूता का बी महान 1:4—2:18

मसीहा मोसा अर ज़ैहसू का बी महान 3:1—4:13

मसीहे प्रोहते महान पदबी 4:14—7:28

मसीहे महान करार 8:1—9:28

मसीहो महान बल़ीदान 10:1-39

महान विश्वास 11:1—12:29

खिरी दैनी दी शिक्षा अर नचोल़ 13:1-25