Kulvi Outer Seraji Bible
इब्रानी 3
ईशू आसा मोसा का महान
मसीहा दी विश्वास करनै आल़ै मेरै भाई-बैहणीओ, तम्हैं ज़ुंण तेऊ आप्पू संघै स्वर्गे ज़िन्दगी ज़िऊंणां लै आसा शादै दै, ज़हा हाम्हैं मना, तेऊ मसीहा ईशू दी दैआ धैन ज़ुंण परमेशरे खुशीए समादो दूत अर माहा प्रोहत आसा। ईशू किई तिंयां सोभै गल्ला ज़ुंण परमेशरै तेऊ लै बोलअ त, ज़िहअ मोसा गूरै बी किई शुचअ-पाक्कअ रही परमेशरे तिंयां गल्ला पूरी ज़ुंण तेऊ लै बोलअ त करना लै।
लोग बणाआं आप्पू लै घअर पर परमेशर आसा इहअ ज़ुंणी सोभै गल्ला बणाईं। ज़िहअ घअरा बणाणैं आल़ै घअरा का खास्सअ अदर भेटा, तिहअ ई आसा ईशू बी, तेऊ ई करै बणाईं परमेशरै आपणैं घअरे सोभै गल्ला, सह आसा मोसा का खास्सअ अदर करनै जोगी।
मोसा रहअ परमेशरे घअरे सोभी लोगे च़ाकरी करनै आल़ै ज़िहअ शुचअ-पाक्कअ कि ज़ुंण गल्ला आजू ती हणैं आल़ी, तिन्नां गल्ला प्रगट करे।1
मसीहा आसा पूते रुपै परमेशरे घअरे सोभी लोगो सैणअ अर ज़ै हाम्हैं हिम्मत डाही करै आपणीं आशा दी खिरी तैणीं विश्वासा दी मज़बूत रहे तै आसा हाम्हैं तेऊए घअरे टबर।
विश्वास नांईं करने बारै चतैनगी
तै ज़िहअ पबित्र शास्त्रा दी पबित्र आत्मां बोला,2
“भलअ हणअ त इहअ, ज़ै तम्हैं आझ़ परमेशरो बोल शुणदै,
परमेशरा संघै निं हठ करदै लागा,
ज़िहअ थारै दादै-बाबै तधू परमेशरा लै द्रोह किअ
ज़धू तिंयां रेगीस्तानै परखै तै।
ज़िधी थारै दाद-बाब च़ाल़्ही साला तैणीं मेरै महान कामां आपणीं आछी भाल़ी बी
मुंह ई परखदै ई रहै लागै।
एता ई पिछ़ू आई मुंह तेऊ जुगे लोगा लै रोश्शै, तेखअ बोलअ मंऐं इहअ
‘इना निं सुंबल़ी सोर ई आथी अर नां ईंयां
इहअ समझ़दै कि हुंह किज़ै च़ाहा कि ईंयां करे!’”
तेखअ खाऐ मंऐं रोश्शै इहै सोह, “ईंयां निं मेरी बशैघे ज़ैगा कधि पुजणैं।”3
भाईओ, ऐहा गल्ला लै रहा चतैन कि थारअ मन्न निं लोल़ी तेऊ ज़िऊंदै परमेशरे विश्वासा का दूर हुअ। हर धैल़ै दैणअ एकी-दुजै लै हैअ। ताकि पाप तम्हां धोखअ दैई थारै मन्नां काठै नां करे। एता लै रहा तेभै तैणीं एकी-दुजै लै हैअ दैंदै लागी ज़ेभै तैणीं हाम्हैं “आझ़की धैल़ी” बोला।
ज़िहै हाम्हैं शुरू दी विश्वासा दी मज़बूत तै, ज़ै तम्हैं तिहै ई खिरी तैणीं रहे तै हणैं हाम्हैं मसीहा दी साझ़ू। ज़िहअ पबित्र शास्त्र बोला,
“भलअ हणअ त इहअ, ज़ै तम्हैं आझ़ परमेशरो बोल शुणदै,
परमेशरा संघै निं हठ करदै लागा,
ज़िहअ थारै दादै-बाबै तधू परमेशरा लै द्रोह करी
परमेशरा लै रोश्श फरेऊई ती।”
कुंणी लोगै फरेऊई परमेशरो बैण शूणीं बी तेऊ लै रोश्शै? कै तिन्नैं सोभी निं फरेऊई परमेशरा लै रोश्शै ज़ुंण मोसा संघै मिसर देशे गलामी का छ़ुटी आऐ तै? सह च़ाल़्ही साला तैणीं कहा का रहअ रुश्शी? सह कै तिन्नां ई का निं रुश्शअ ज़ुंणी पाप किअ, अर तिन्नें ल्हासा रही रेगीस्तानै पल़ी?4
परमेशरै कहा लै बोलअ सोह खाई इहअ कि तम्हैं निं मेरै बशैघे ज़ैगा पुजणैं! पर तिंयां जाणैं पुजी ज़ुंणीं हुकम मनै?5
एता करै आई हाम्हां अह गल्ल समझ़ कि तिंयां निं तिधी तै पुजी सकै किल्हैकि तिन्नैं निं परमेशरे गल्ला दी विश्वास किअ।
Source notes (5)
- Cross-reference गण. 12:7
- Cross-reference लुआ. 17:7; गण. 20:2-5,13
- Cross-reference गण. 14:21-23; बधा. 1:34-35
- Cross-reference गण. 14:29
- Cross-reference भज. 106:24-26
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.