Kulvi Outer Seraji Bible
इब्रानी 4
परमेशरे लोगा लै बशैघ
ज़ै कि तेऊए बशैघा दी पुजणें करार आझ़ तैणीं आसा, हाम्हां बी लागा डरनअ, हाम्हां मांझ़ै निं लोल़ी कोही का तेऊ बशैघा दी डेऊणेओ मोक्कअ छ़ुटअ। ज़िहअ हाम्हैं ईशू मसीहो खुशीओ समाद शूणअ, तिहअ ई शूणअ त तिन्नैं इज़राईली मणछै बी बशैघे ज़ैगा लै डेऊणेओ खुशीओ समाद। पर तिन्नैं निं तेतो विश्वास किअ। इहअ करै निं तेऊ समादो तिन्नां लै किछ़ै फाईदअ हुअ।
तैही ज़ुंणी हाम्हैं परमेशरै बोली दी गल्ला दी विश्वास किअ, हाम्हैं डेऊणैं तैहा बशैघे ज़ैगा लै। ज़िहअ परमेशरै आसा आप्पै बोलअ द,
“मंऐं खाऐ रोश्शै इहै सोह,
‘ईंयां निं मेरी बशैघे ज़ैगा कधि पुजणैं।’”
परमेशरै निं इहअ एते तैणीं बोली कि बशैघे ज़ैगा निं अज़ी बणाईं आथी ती। अह ती तधू हेरी दी बणाईं ज़धू संसार बणाअं। किल्हैकि सातुई धैल़ीए बारै आसा परमेशरै पबित्र शास्त्रा दी इहअ लिखअ द, “परमेशरै किअ सातुऐ धैल़ै आपणैं सोभै काम करी बशैघ।” दुजी ज़ैगा बोला पबित्र शास्त्रा दी परमेशर इहअ,
“ईंयां निं मेरै बशैघा दी कधि पुजणैं?”
तिंयां इज़राईली मणछ ज़हा का सोभी का आजी खुशीओ समाद खोज़अ तिंयां निं बशैघे ज़ैगा पुजी सकै किल्हैकि तिन्नैं निं तिहअ किअ ज़िहअ परमेशरै तिन्नां लै बोलअ त। पर परमेशरे बशैघे ज़ैगा लै डेऊणेओ मोक्कअ आसा अज़ी बी। तैही आसा परमेशरै बशैघे ज़ैगा लै डेऊणेओ एक होर बगत काढअ द, अर सह बगत आसा आझ़काला। खास्सी साला पैहलै किअ त एकी ज़मानै म्हारै दादै-बाबै परमेशरा लै द्रोह। परमेशरै आसा दाबेद राज़ै बाती पैहलै ई डाहअ द बोली,
“भलअ हणअ त इहअ ज़ै आझ़ तम्हैं परमेशरो बोल शुणदै, परमेशरा संघै निं हठ करदै लागा।”1
हाम्हां का आसा इहअ बी थोघ कि ज़हा बशैघे ज़ैगे बारै परमेशरै करार आसा किई दी, अह निं सह कनान देश आथी ज़िधी लै ज़ैहसू म्हारै दाद-बाब पजैल़ै। पर ज़ै सह कनान देश ई हंदअ तै निं बादा का परमेशरा इहअ बोल़णअ त कि अज़ी बी आसा बशैघे ज़ैगा लै डेऊणेओ होर बगत।2
तैही आसा परमेशरे लोगा लै अज़ी बी एक ज़ैगा बणाईं दी ज़िधी तिन्नां पूरअ बशैघ करनअ। तिन्नां करनअ तिहअ बशैघ ज़िहअ परमेशर सातुई धैल़ी बशैघ करा। परमेशरै किअ आपणैं सोभ काम करी बशैघ। इहअ ई हणअ तिन्नां सोभी लै बी ज़ुंण परमेशरा संघै बशैघा दी डेओआ। तिन्नां बी करनअ बशैघ ज़ेभै तिंयां आपणअ काम पूरअ करे।3
तैही करा तैहा बशैघे ज़ैगा पुजणें मैन्थ, तिन्नां ज़िहअ निं कोहै करी ज़ुंणी परमेशरे गल्ला शूणीं नां शूणीं किई। तै सका हाम्हैं बशैघे ज़ैगा पुजी।4
किल्हैकि परमेशरो बैण आसा ज़िऊंदअ, शगती आल़अ अर दुही बाखा तिछी तलबारा का बी तिछअ। सह करा आत्मां, प्राण, गांठ-गांठ अर हर ज़ोल़ ज़ुदै करी छ़िन्ह-बिन्ह। सह हेरा मन्नें गल्ला अर म्हारी सोठ परखी।5
कोहिए निं एही किछ़ै गल्ला आथी ज़ुंण तेऊ का थोघ निं आथी ज़ुंण हाम्हां तेऊ का खोज़णीं लागे कि हाम्हैं आपणीं ज़िन्दगी दी किज़ै किअ, तेऊए आछी सम्हनै आसा सोभै गल्ला घुआल़ी अर प्रगट।
माहा प्रोहत
ईशू ज़ुंण स्वर्गा लै डेऊअ सह आसा परमेशरो पूत। सह आसा हाम्हां सोभी लै माहा प्रोहत। तैही एछा, हाम्हां रहणअ तेऊए विश्वासा दी पाक्कै टेक्की ज़ुंण हाम्हैं सोभी नदरी मनअ। किल्हैकि म्हारअ माहा प्रोहत ईशू मसीहा रहा म्हारै दाह-दुखा दी हाम्हां संघै, सह परखअ सोभी गल्ला लै हाम्हां ज़िहअ, पर तैबी निं तेऊ दी एक पाप बी निखल़अ।
एछा, हाम्हां करनी हिम्मत संघा डेऊणअ तेऊ मसीहा नेल़, ज़ुंण स्वर्गे राज़गाद्दी का राज़ करा। तेऊ किई हाम्हां लै एही झींण ज़ेते हाम्हैं हकदार बी नांईं तै आथी। म्हारी खरीए पलका रहणअ सह मसीहा ई हाम्हां लै झणैल़ू अर म्हारी मज़त बी करनी तेऊ ई।
Source notes (5)
- Cross-reference भज. 95:7-8
- Cross-reference बधा. 31:7; ज़ैह. 22:4
- Cross-reference प्रका. 14:13; मूल. 2:2
- Cross-reference इब्रा. 4:1; 2 पत. 1:10-11
- Cross-reference जेर. 23:29; ईशा. 55:11
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.