Kulvi Outer Seraji Bible
इब्रानी 5
ज़ेभै परमेशर माहा प्रोहत बणाआं, सह छ़ांटा एक मणछ लोगा मांझ़ा का। एऊ मणछा लागा लोगे तैणीं परमेशरे च़ाकरी करनी, सह दैआ परमेशरा लै लोगे भैंट अर बल़ीदान ताकि तिन्नें पाप माफ होए। एक माहा प्रोहत सका तिन्नां लै झींण करी ज़ुंण परमेशरा का पाप करदै शुझिआ, अर ज़हा तेऊए बारै खास्सअ थोघ निं हंदअ। किल्हैकि माहा प्रोहत आसा आप्पू बी मणछ अर पाप करी हआ सह आप्पू बी कमज़ोर। तैही लागा तेऊ माहा प्रोहता आप्पू बी आपणैं पापो प्राश्त करना लै पाप बल़ी दैणीं ताकि तेऊए पाप माफ होए। किल्हैकि सह करा आप्पू बी लोगा ई ज़िहअ पाप।1
पर आप्पै निं आप्पू लै कोहै माहा प्रोहते पदबी दैंदअ ज़ेतो एतरअ अदर हआ। पर परमेशर छ़ांटा हरेकी मणछा ऐहा पदबी लै आप्पै ज़िहअ हारण बणाअं पैहलअ माहा प्रोहत।2
तैही निं प्रभू मसीहा बी माहा प्रोहत हणें बड़ैई आप्पू लई। पर तेऊओ अदर किअ परमेशरै ज़ुंणी सह छ़ांटअ अर तेखअ बोला सह तेऊ लै इहअ,3
“तूह आसा मेरअ पूत,
आझ़ किअ मंऐं अह प्रगट कि तूह आसा मेरअ पूत!”
दुजी ज़ैगा बोला पबित्र शास्त्रा दी परमेशर इहअ,
“तूह हणअ सदा लै माहा प्रोहत, ज़िहअ मल्किसदोक थिअ।”
ज़धू मसीहा एऊ संसारै देही दी रहअ, तेऊ किई ज़ोरै-ज़ोरै लेरा लाई आछी का आशू बहाऊई करै प्राथणां। तेऊ बोलअ तेऊ परमेशरा का ज़ुंण तेऊ मरनै का बच़ाऊई सका त। परमेशरै शूणीं तेऊए किल्हैकि मसीहा करा त तेऊओ हर गल्ला मनी अदर। एही ता थिअ ईशू परमेशरो पूत पर तेऊ शिखल़ी दुख ज़िरी अर ज़ान दैई परमेशरे हर गल्ला मनणी। सोभी गल्ला दी सिध्द हई बणअ सह सोभी लै उद्धार दैणैंओ मूल़ ज़ुंण तेऊए गल्ला शूणां अर मना।4
तेऊ लै दैनी परमेशरै माहा प्रोहते पदबी, ज़िहअ मल्किसदोक थिअ।5
विश्वासा का दूर हणैंओ फल
एते बारै आसा हाम्हां खास्सी गल्ला बोल़णा लै, पर एते बारै बाढै लिखणअ आसा एभै कठण, किल्हैकि तम्हां निं परमेशरो बैण एकी बारी बोली समझ़ ई एछदअ।
तम्हैं आसा खास्सी साला ओर्ही विश्वासी, तेते साबै ता लोल़ी तै तम्हैं होरी सखाऊंणै आल़ै हुऐ, तैबी कै अह ज़रूरी आसा कि कोई तम्हां लै परमेशरे शुरूआती शिक्षा दबारी सखाऊऐ? अर तम्हैं हुऐ इहै लान्हैं ज़िहै कि तम्हां लोल़ी रोटीए बदल़ै अज़ी बी दुध ई। किल्हैकि दुधा झुटणैं आल़ै लान्हैं निं परमेशरे साबै धर्मीं ज़िन्दगी ज़िऊंणें थोघ हंदअ किल्हैकि तिंयां आसा अज़ी लान्हैं! पर सैणैं लै आसा रोटी, ज़सरी ज्ञैन इंद्री भलै अर बूरै दी भेद समझ़णा लै पाक्की हई भैस्सुई आसा गई दी।
Source notes (5)
- Cross-reference लेब. 16:6
- Cross-reference लुआ. 28:1
- Cross-reference भज. 2:7
- Cross-reference ईशा. 45:17
- Cross-reference इब्रा. 2:10
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.