Kulvi Outer Seraji Bible
इब्रानी 6
तैही बोला हुंह इहअ कि तिन्नां शिक्षे बारै निं आप्पू मांझ़ै गल्ला करनी छ़ाडणीं ज़ुंण हाम्हैं पैहली बारी मसीहे बारै आसा शिखल़ी दी। तिंयां गल्ला ज़ुंण हर विश्वासी लै शिखल़णीं ज़रूरी आसा। इना मांझ़ै आसा कई एही गल्ला ज़ेता करै परमेशर हाम्हां का इहअ खोज़ा कि तिन्नां पापी कामां का किहअ करै रहणअ दूर ज़ुंण हाम्हां मौता बाखा लै निंयां। एही ई आसा हाम्हैं कई होर गल्ला बी तम्हां का सखाऊई दी। ज़िहै कि कई बारी एकी-दुजै लै हाथ डाही करै प्राथणां करनी अर परमेशरा किहअ करै करने म्हारी मौत हणैं का बाद भिई ज़िऊंदै अर सोभिओ नसाफ करी रहणैं सदा ज़िऊंदै। कई रंगे डुबकी अर सदा रहणैं आल़ी ज़िन्दगीए बारै आसा एही होर बी खास्सी गल्ला करना लै तेता होए केभै होरी बारी करी। ज़ै परमेशर हाम्हां लै एतो मोक्कअ दैए। पर एभै करनी हाम्हां तेते बारै गल्ला ज़ुंण समझ़णीं कठण आसा, च़ाऐ किछ़ बी होए तिंयां गल्ला आसा एही ज़ेता करै सदा हाम्हां मसीहा दी भरोस्सै करना लै थारी मज़त हणीं।
हुंह खोज़ूं इना गल्ला तम्हां का बाढै कि ईंयां किल्है आसा ज़रूरी किल्हैकि ज़ुंण विश्वासा का कबाता गऐ पेठी तिन्नां निं तेखअ भिई प्राश्त करना लै बापस फरेऊई सकदै। तिन्नैं हेरअ सह सत्त बछ़ैणीं ज़ुंण परमेशरा का एछा अर तिन्नां गअ स्वर्गा का बरदान अर होरी संघै पबित्र आत्मां भेटी। तिन्नैं आसा हेरअ द परखी कि परमेशरो समाद आसा बधिया अर तिन्नां का इहअ बी आसा गअ द थोघ लागी कि इहअ बगत आसा एछणैं आल़अ ज़ेभै परमेशरा आप्पै करनअ राज़। तिन्नां निं केऊ बी साबै भिई बापस फरेऊई सकदै किल्हैकि तिन्नैं किअ परमेशरो पूत एकी बारी भिई क्रूसा टोक्की करै बेइज़त अर ज़िहअ करै होर लोग मसीहो सुहांग करा।
ज़हा मणछा शोभली शिक्षा भेटा तिंयां आसा एही ज़िम्मीं ज़िहै ज़िधी सरग हंदअ रहा। ज़ै ज़िम्मीं बधिया होए, तेथ लागा बधिया फसल ज़ेता लै सह बऊई दी आसा अर तेथ हआ परमेशरे बर्गत। पर होर लोग आसा एही ज़िम्मीं ज़िहै ज़ेथ कज़ेही कांडै-रिंडै लागा। तिन्नां लै आसा परमेशरो फिटक पल़अ द अर तिंयां हणैं आगी करै खतम।1
मेरै पैरै भाईओ, एही ता आसा हाम्हैं एऊ साबै लागै दै बोल्दै, तज़ी बी आसा हाम्हां निहंचअ कि थारी हालत आसा एता का कई राम्बल़ी अर तम्हैं आसा तैहा बाता हांढदै लागै दै ज़ेथ उद्धार आसा। परमेशर निं बेनसाफी करदअ, सह निं बिस्सरदअ कि तम्हैं तेऊ लै केही मैन्थ किई, अर होरी विश्वासी आप्पू संघै नढैऊई तम्हैं तेऊ लै किहै झ़ूरै, ज़िहै तम्हैं अज़ी बी आसा करदै लागै दै।
पर हाम्हैं च़ाहा इहअ कि ज़ेभै तैणीं तम्हैं ज़िऊंदै रहे तेभै तैणीं डाहा सोभी संघै झ़ूरी अर इना भलै कामां रहा करदै लागी। ताकि तम्हां निहंचअ होए कि ज़ेते तम्हैं आशा डाहा सह हणीं पूरी। हुंह निं च़ाहंदअ कि तम्हैं लापरबाह होए, पर हुंह च़ाहा इहअ कि तम्हैं तिन्नां ज़िहै काम करे ज़ुंण विश्वास अर सबर करी परमेशरै ज़ुंण करार आसा किई दी तैहा बरासते हकदार आसा।
परमेशरे अटल़ करार
परमेशरै ज़धू आबरामा लै ज़बान दैनी, तेता लै निं परमेशरा सम्हनै आप्पू का बडअ कोहै आथी त ज़सरै सोह खाई सह करार करदअ। तेखअ बोलअ परमेशरै आपणैं सोह खाई,
“मुंह दैणीं सच्च़ी ताल्है बर्गत अर तेरी लुआदा रहणअ मुंह बढाऊंदै लागी।”2
आबरामै किअ खास्सी साला सबर अर तेखअ भेटअ तेऊ तेतो फल ज़ुंण परमेशरै करार ती किई दी।
ज़ेभै मणछ ज़बान दैआ, तिंयां लआ सोह काढणा आप्पू का बडैओ नाअं, अर तिन्नें हरेकी झ़गल़ैओ फैंसलअ हआ सोह खाई करै पाक्कअ।3
तैही खाऐ परमेशरै बी सोह ज़हा लै तेऊ ज़बान दैनी ती, ताकि तिन्नां निहंचअ होए कि परमेशरै ज़ुंण करार तिन्नां लै किई, सह हणीं पूरी। इहअ करै किई परमेशरै करार अर तेऊ खाऐ तेता लै सोह बी। ईंयां दुहै गल्ला निं बदल़ी सकदी, किल्हैकि परमेशर निं झ़ुठअ बोली सकदअ। तेऊ दैनी हाम्हां लै ज़बान कि तेऊ करनी म्हारी मज़त अर तेऊ लाणअ आप्पू लै दोश ज़ै सह म्हारी मज़त नांईं करे। तैही आसा म्हारी आशा परमेशरा दी, ज़िहै हाम्हैं जोश डाही खुशी-खुशी तेऊ नेल़ डेओए।4
ज़ुंण हाम्हां आशा आसा, सह आसा ज़हाज़े लंगरा ज़ेही ज़ुंण पाक्कअ रहा टेक्की। अह निं हाम्हां परमेशरा का दूर करदी पर अह निंयां हाम्हां भबना भितरी खास पबित्र ज़ैगा लै परमेशरा सेटा।5
ईशू डेऊअ परमेशरा सेटा हाम्हां का आजू ताकि हाम्हैं बी तेऊ संघै परमेशरे तैहा ज़ैगा पुजे। ईशू बणअ सदा लै म्हारअ माहा प्रोहत, ज़िहअ मल्किसदोक माहा प्रोहत थिअ।
Source notes (5)
- Cross-reference जोह. 15:6
- Cross-reference मूल. 22:17
- Cross-reference लुआ. 22:11
- Cross-reference गण. 23:19; 1 शमू. 15:29
- Cross-reference गण. 23:19; 1 तिम. 2:13
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.