Kulvi Outer Seraji Bible
इब्रानी 7
मल्किसदोक प्रोहत
अह मल्किसदोक त शालेम नगरीओ राज़अ अर परम प्रधान परमेशरो प्रोहत। तेऊए नाओं मतलब आसा, “धर्मीं राज़अ” अर शालेमो राज़ैओ मतलब आसा, “शांतीओ राज़अ।” तेऊओ ज़ल्म कधू हुअ अर तेऊए ईज-बाब अर दाद-बाब कुंण आसा अर सह कधू मूंअ तेते बारै निं पबित्र शास्त्रा दी किछ़ै आथी लिखअ द। सह थिअ सदा लै प्रोहत। तैही आसा सह परमेशरे पूता ज़िहअ। ज़ांऊं आबराम च़ऊ राज़ै मारी करै जुध ज़िती आअ, तधू आअ मल्किसदोक तेऊ सेटा लै अर तेऊ लै दैनी बर्गत। आबरामै दैनअ तिन्नां सोभी शोभली का शोभली किम्मती च़िज़ो दसुअ निसब तेऊ लै ज़ुंण तेऊ जुध ज़िती करै लुटी आणी ती।
ऐबै दैआ ऐहा गल्ला लै धैन कि मल्किसदोक किहअ महान त, ज़हा लै दाद-बाब आबरामै तिन्नां शोभली का शोभली किम्मती च़िज़ो दसुअ निसब दैनअ त ज़ुंण तेऊ जुध ज़िती करै लुटी आणी ती? लेबी खिंबा का ज़हा प्रोहते पदबी भेटा, मोसा गूरो बधान बोला तिन्नां लै इहअ कि लेबी खिंबा का आजू ज़ुंण प्रोहत निखल़ा, तिन्नां लणअ इज़राईली मणछा का सोभी च़िज़ो दसुअ निसब। किल्हैकि तिंयां आसा तिन्नें आपणैं लोग। तिंयां होर प्रोहत अर लोग आसा भाई ज़िहै किल्हैकि तिंयां आसा सोभै आबरामे खिंबा का। पर अह मल्किसदोक प्रोहत नांईं त लेबी खिंबा का आथी तेऊ ढाकअ आबरामा का दसुअ निसब। एही ता थिअ आबराम सह ज़हा का परमेशरे करार आसा पर तज़ी बी दैनी मल्किसदोक प्रोहतै तेऊ लै बर्गत।
ऐहा गल्ला समझ़ा सोभै कि ज़हा बर्गत भेटा सह हआ तेऊ का होछ़अ ज़ुंण बर्गत दैआ।
लेबी खिंबे प्रोहत ज़ुंण दसुअ निसब लआ तै, तिंयां बी तै मणछ ज़ुंण मूंऐं। पर मल्किसदोक प्रोहत ज़ुंण दसुअ निसब लआ तेऊए बारै खोज़ा पबित्र शास्त्र इहअ सह आसा अज़ी बी ज़िऊंदअ। तै सका हाम्हैं इहअ बी बोली कि लेबी ज़ुंण लोगा का दसुअ हेस्सअ लआ तै तिंयां थिऐ आबरामे आजू लुआद। इहअ करै ज़ांऊं आबरामै मल्किसदोक प्रोहता लै दसुअ निसब दैनअ, तेता लै सका हाम्हैं बोली कि एऊ साबै दैनअ लेबी बी आबरामा बाती मल्किसदोक प्रोहता लै दसुअ निसब। किल्हैकि ज़धू मल्किसदोक तेऊए बाब सेटा लै मिलदअ पुजअ, तैहा बगती त सह आपणैं बाबे देही दी।1
ईशू आसा मल्किसदोका ज़िहअ माहा प्रोहत
लोगा लै दैनअ बधान प्रोहते साबै ज़ुंण लेबी गोत्रा दी हारणे आजू लुआद तै, पर तिन्नां प्रोहता करै निं किछ़ै सिध्द हई सकअ। तेखअ पल़ी एकी इहै प्रोहता एछणें ज़रुरत ज़ुंण हारणा ज़िहअ नां हई मल्किसदोक प्रोहता ज़िहअ होए।
पर हाम्हैं ज़ाणा ऐहा गल्ला कि तिंयां प्रोहत निं किछ़ै सिध्द करी सकै किल्हैकि ऐबै आअ मल्किसदोका ज़िहअ एक नऊंअ प्रोहत। ज़ै परमेशरै एक नऊंऐं साबै प्रोहत बणाअं, तेऊ बदल़अ बधान बी।
हाम्हैं आसा इना गल्ला मसीहे बारै लागै दै बोल्दै, ज़ुंण होरी गोत्रा का आसा। तेऊ गोत्रा का निं कोही प्रोहते रुपै बेदी दी च़ाकरी किई। ऐहा गल्लो आसा हाम्हां का थोघ कि म्हारै प्रभू ईशूओ ज़ल्म आसा यहूदे गोत्रा का हुअ द। यहूदा गोत्रा का प्रोहत निखल़णें बारै निं मोसा गूरै किछ़ै आथी बोलअ द अर नां तेऊ खिंबा का कधू कुंण प्रोहत बणअ।2
ऐबै सका हाम्हैं ऐहा गल्ला होर बी राम्बल़ै करै समझ़ी कि बधान गअ ऐबै बदल़ी। किल्हैकि ऐबै गअ दुजै साबो नऊंअ प्रोहत एछी अर सह आसा मल्किसदोक प्रोहता ज़िहअ। सह प्रोहत आसा ईशू, सह बणअ प्रोहत, पर तिहअ करै निं बणअ ज़ुंण गल्ला लेबी गोत्रा लै परमेशरे बधाना दी ज़रूरी ती। सह बणअ सदा रहणैं आल़ी ज़िन्दगीए शगती करै सदा लै प्रोहत। किल्हैकि तेऊए बारै दैआ पबित्र शास्त्र एही शाजत दैनी दी,
“तूह आसा मल्किसदोक प्रोहता ज़िहअ
सदा लै माहा प्रोहत।”
प्रोहता बणाणेंओ सह पराणअ बधान डाहअ परमेशरै पिछ़ू किल्हैकि तिंयां प्रोहत निं पापी लोगा पबित्र करी सकै। मोसा गूरो बधान निं किछ़ू गल्ला असली ज़ैगा पजैल़ी सकअ अर तेते ज़ैगा आसा हाम्हां एही बडी आशा ज़ुंण ईशू मसीहा दी आसा, ज़हा करै हाम्हैं परमेशरा नेल़ सका डेऊई।
परमेशरै खाऐ तेभै बी सोह ज़ेभै तेऊ मसीहा माहा प्रोहत बणाअं। लेबी गोत्रा दी हारणे खिंबा का ज़ुंण प्रोहत हुऐ, तिन्नां लै निं परमेशरै सोह खाई एही ज़बान दैनी आथी। पर मसीहे बारै आसा परमेशरै आप्पै ज़बान दैनी दी, अर सह निं तेता का हुधदअ, ज़िहअ तेऊ बोलअ,
“तूह हणअ सदा लै माहा प्रोहत, ज़िहअ मल्किसदोक थिअ।”
ईशू आसा ऐहा बडी करार पूरी करनैओ भरोस्सअ।
एथ आसा एक होर फरक बी, कि तिंयां रहै एकी का बाद आजू दुजअ प्रोहत बणदै लागी किल्हैकि तिंयां सोभ मूंऐं ज़ुंण पैहलै तै, पर ईशू रहणअ जुगै-जुगै, एता करै ई आसा अह प्रोहते पदबी अटल़। तैही ज़ुंण ईशू करै परमेशरा सेटा एछा, सह सका तिन्नों पूरअ उद्धार करी, किल्हैकि सह आसा तिन्नां लै अरज़ करना लै सदा ज़िऊंदअ।3
किल्हैकि हाम्हां ती इहै ई माहा प्रोहते ज़रुरत ज़िहअ ईशू आसा। सह आसा पबित्र, तेऊ निं धख बी गलती किई अर सह आसा नर्दोश। ऐबै हेरअ सह परमेशरै संसारे पापी मांझ़ा का दूर करी उझै सोभी का उछ़टै स्वर्गा लै निंईं।
ईशू निं हारणे खिंबे तिन्नां माहा प्रोहता ज़ेही ज़रुरत आथी कि हर धैल़ै आपणैं पापा लै बल़ीदान करे, किल्हैकि ईशू किई सोभै गल्ला आप्पू बल़ीदान हई एकी बारी पूरी।4
किल्हैकि मोसा गूरो बधान छ़ांटा कमज़ोर मणछा लै प्रोहत, पर बधाना दी ज़ुंण परमेशरै ज़बान आसा दैनी दी, सह दैआ तेऊ पूता लै प्रोहते पदबी अर सह बणअ सदा लै सिध्द माहा प्रोहत।
Source notes (4)
- Cross-reference मूल. 14:18-20
- Cross-reference मूल. 49:10; ईशा. 11:1
- Cross-reference 1 जोह. 2:1-2; 1 तिम. 2:5
- Cross-reference लेब. 16:6; इब्रा. 10:10,12,14
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.