एज्रा

एज्रा

बाबेल देशे गलामी का एरुशलेम फिरी एछणेंओ इतिहास

भेत

लिखणैं आल़अ: एज्रा हारण प्रोहते लुआदा मांझ़ै

सन: 457 का 440 ईसा आजी

ऐहा कताबा दी आसा 2 इतिहासे कताबा खतम हणैं आजूओ इतिहास। ऐहा कताबा दी आसा खोज़अ द कि यहूदी मांझ़ै आऐ बाबेल देशे गलामी का एरुशलेम नगरी लै फिरी। 2 इतिहासे कताब हआ फारसी राज़ै तेऊ समादा खोज़ी खतम ज़ुंण तेऊ 538 ईसा आजी दैनअ कि यहूदी आसा एरुशलेम नगरी डेऊंणा लै आज़ाद अर तेऊ ई समादा संघै हआ अह कताब शुरू।

ऐहा कताबे पैहलै भागा दी आसा खोज़अ द कि केतरै यहूदी आऐ एरुशलेम नगरी लै फिरी अर तिन्‍नैं किअ बिधाते भबना भिई च़िणनेओ काम शुरू। पर तिन्‍नां ओर्ही-पोर्ही बस्सै दै होरी लोगै किऐ तिंयां तंग अर इहअ करै निं कामां लै छ़ेक्‍कअ हई निस्सअ त। तिन्‍नैं हंतै तिंयां इधी तैणीं कि तिन्‍नैं किअ खास्सी साला तैणीं भबना बणाणेंओ काम बंद। खिरी छ़ेक्‍कअ 515 ईसा आजी बिधातो भबन भिई च़िणीं।

ऐहा कताबो दुजअ भाग आसा धैअ साता का दस तैणीं। एथ आसा खोज़अ द कि एज्रा एछा यहूदा मुल्खे लोगा का बधाने शिक्षा दैंदअ एरुशलेम नगरी लै। किल्हैकि एज्रा त परशैन हुअ द कि इज़राईली तै तिहै ई पाप करदै लागै दै ज़िहै होर देश करा। इज़राईल त घोर पापा दी डुबी गअ द अर तेता पिछ़ू ती बिधाता तिन्‍नां लै घोर सज़ा लाई दी दैई। एलियाह च़ेती माल़ी संघा किई बिधाता सेटा अरज़ कि इने पाप कर माफ। लोग बी मनै ऐहा गल्‍ला संघा हुऐ बिधाते बधाने साबै ज़िन्दगी ज़िऊंणां लै तैर।

बिधाते परज़ा प्रैंदै च़ाऐ ज़ुंण बी राज़अ राज़ करे, पर तिन्‍नां करा बिधाता आप्पै काबू। तैही बोलअ एज्रा इहअ:

“आपणैं दादा-बाबे परमेशर बिधाते करा ज़ै-ज़ैकार! तेऊ पाई फारसी राज़ेए मन्‍नैं एही कि सह एरुशलेम बिधाते भबनो अदर करे। बिधातो जश हुअ इहअ कि माहा राज़ेए बज़ीर अर तेऊए बलबान कार-करिंदै बी लअ मेरअ पक्ष। परमेशर बिधाता दैनी मुल्है एही हिम्मत अर तेऊ किअ हुंह इज़राईले टोली मांझ़ा का खास्सै सैणैं आप्पू संघै एरुशलेम आणना लै सफल।”

(7:27,28)

कताबे बांड

यहूदी आऐ गलामी का फिरी 1:1—2:70

बिधाते बेदीए मराम्मत अर भबनो काम शुरू 1:1—2:70

एरुशलेम नगरी भिई च़िणना लै हुई आफ़त 4:6-23

बिधातो भबन छ़ेक्‍कअ भिई च़िणीं 4:24—6:22

एज्रा आणै खास्सै यहूदी सैणैं एरुशलेम नगरी लै बापस 7:1—8:36

एज्रा बझ़ैल़ी पराई ज़ातीए बेटल़ी बापस छ़ाडणैं 9:1—10:44