Kulvi Outer Seraji Bible
एज्रा 8
ज़ुंण लोग एज्रा संघै गलामी का फिरी आऐ
इधी आसा तिन्नां इज़राईली टोलीए दादा-बाबे नाअं ज़ुंण माहा राज़ै अर्तक्षत्रे राज़ा दी बाबेल देशे गलामी का एज्रा संघै बापस फिरी एरुशलेम नगरी लै डेऊऐ:
पिनहास टोली का आअ गर्शोम,
ईतामारे टोली का आअ दानिएल,
राज़ै दाबेदे टोली मांज़ै आअ हतूश।
पारोश टोली का शकनये आद-लुआदा मांझ़ै जकर्या अर तेऊ संघै एक शौ पज़ाह ज़ण्हैं होर टबर।
पहात-मोआब टोली का जराया शोहरू एलीहोनाई अर तेऊ संघै तेऊए दूई शौ होर टबर।
ज़ाटू टोली का जहजीएलो शोहरू शकनया अर तेऊ संघै तेऊए चअन शौ होर टबर
आदीन टोली का जोनातानो शोहरू एबेद अर तेऊ संघै तेऊए पज़ाह होर टबर।
एलाम टोली का अताल्यो शोहरू जेशायाह अर तेऊ संघै तेऊए सत्तर होर टबर।
शपताह टोली का मिकाईलो शोहरू जबदीया अर तेऊ संघै तेऊए अश्शी होर टबर।
जोआब टोली का जेहीएलो शोहरू ओबेदिया अर तेऊ संघै तेऊए दूई शौ ठारा टबर।
बैनी टोली का जोशिबीयो शोहरू शेलोमीत अर तेऊ संघै तेऊए एक शौ शाठ होर टबर।
बेबाई टोली का बेबाईओ शोहरू जकर्या अर तेऊ संघै तेऊए ठाई टबर।
अजगाद टोली का हाकतानो शोहरू जोहनान अर तेऊ संघै तेऊए एक शौ दस टबर।
बादा का आऐ पिछ़ू अदोनीकाम टोली का एलीपेलेत, जेइल, शमयाह अर तिन्नां संघै तिन्नें शाठ टबर।
बिगबाई टोली का आऐ ऊताई, जक्कूर अर तिन्नां संघै तिन्नें सत्तर टबर।
एज्रा लोल़ै बिधाते भबना लै लेबी
ईंयां सोभै किऐ मंऐं तैहा गाडा नेल़ कठा ज़ुंण अहावा बाखा लै बगा, तिधी डाहै हाम्हैं चिई धैल़ै तैणीं डेरै पाई। तिधी लागअ हुंह भाल़अ कि तिन्नां जैंदरी प्रोहत ता आसा पर लेबी निं कोहै आथी तै। मंऐं शादै तेखअ तिन्नां मांझ़ै नौ सैणैं, शमयाह, एलीआजर, अरीएल, शमयाह, एलनातान, जोरीब, नातान, जकर्या अर मशूलाम। दूई शादै खास्सै अक्ली आल़ै मणछ जारीब अर एलनातान। तिंयां छ़ाडै मंऐं ईदू सेटा लै ज़ुंण कासिप्पा नाओंए ज़ातीओ सैणअ थिअ। मंऐं डाहअ तिन्नां का खोज़ी कि ईदू अर तेऊए भाऊ नतीना का बोलै इहअ कि तम्हैं छ़ाडै बिधाते भबनै च़ाकरी करनै आल़ै मणछ। म्हारै परमेशरो हुअ इहअ जश कि तिन्नैं छ़ाडै हाम्हां सेटा इज़राईले लुआद लेबी मांझ़ै महली टोली का ज़ाण-प्रबीण मणछ शेरेबयाह अर तेऊए शोहरू अर भाई-बंधा मांझ़ै ठारा ज़ण्हैं। होर छ़ाडै तिन्नैं मरारी टोली का हशाबिया, जेशायाह अर तिन्नां संघै तिन्नें बिह होर भाई-बंध। एता का लाऊआ आऐ लेबी संघै मज़त करदै बिधाते भबनै च़ाकरी करनै आल़ै दूई शौ बिह ज़ण्हैं। तिन्नें दाद-बाब तै खास्सी साला पैहलै राज़ै दाबेद अर तेऊए कार-करिंदै भबने च़ाकरी करना लै छ़ांटै दै। तिन्नें नाअं तै बही दी लिखी डाहै दै।
एज्रा बोलअ सोभी लै ब्रतू रहणा लै
तेखअ किअ मंऐं तिन्नां सोभी लै अहावा गाडा नेल़ हुकम कि सोभै रहा ब्रतू संघा कर परमेशरा का अरज़। परमेशरा सेटा हआ धिठै, संघा करा तेऊ सेटा एही अरज़ कि हाम्हां अर म्हारै शोहरू-माठै पजैल़ै म्हारी ज़ैदाता संघी राज्ज़ी-राम्बल़ै एरुशलेम। किल्हैकि माहा राज़ै का इहअ बोल़णा लै लागी मुंह झअच कि सह बाता दुशमणा का म्हारी फाज़त करना लै सपाही छ़ाडे! किल्हैकि हाम्हैं त माहा राज़ै का इहअ हेरअ द बोली, “म्हारअ परमेशर दैआ तिन्नां लै बर्गत ज़ुंण तेऊ दी भरोस्सअ डाहा, पर ज़ुंण तेऊ का दूर डेओआ, तिन्नां का हआ सह नराज़ संघा दैआ तिन्नां लै सज़ा।” तैही किई हाम्हैं ब्रतू रही बिधाता सेटा अरज़ कि सह हाम्हां बाता राज्ज़ी-राम्बल़ै डाहे अर तेऊ किई हाम्हां लै ज़ेही हाम्हैं अरज़ किई तेही ई पूरी।
बिधाते भबना लै भैंट
सैणैं प्रोहता मांझ़ै छ़ांटै मंऐं बारा ज़ण्हैं, शेरेबयाह, हशाबिया अर तिन्नें भाई-बंधा मांझ़ै दस ज़ण्हैं होर। तेखअ दैनै मंऐं तिंयां सुन्नैं अर च़ंदीए भांडै तिन्नां का तोली करै सभाल़ी ज़ुंण माहा राज़ै, तेऊए बज़ीरै अर इज़राईली परमेशरे भबना लै भैंट दैनै तै। ज़ुंण भांडै मंऐं तिन्नां का सभाल़ै, तिंयां थिऐ तोली करै:
दूई शौ पज़ाह कुंटल़ च़ंदी,
सत्तर किलू च़ंदीए भांडै,
चऊती कुंटल़ सुन्नअ
कोई आठ किलू बज़नी बिह सुन्नें कऊली
सुन्नैं ज़ेही किम्मती कांस्से च़मकिल्ली कऊली।
मंऐं बोलअ तिन्नां लै इहअ, “तम्हैं आसा बिधाता लै पबित्र अर ईंयां भांडै बी आसा पबित्र। अह सुन्नअ च़ंदी आसा थारै दादा-बाबे परमेशरा लै लोगै खुशी-खुशी भैंट किअ द। इनो डाहै तम्हैं एरुशलेम पुजणैं तैणीं धैन खैल। तिधी पुजी दैऐ बिधाते भबनै माहा प्रोहत, लेबी अर इज़राईली टोलीए सैणैं नदरी तोली करै तिन्नां का सभाल़ी। तेखअ ढाकै प्रोहत अर लेबी तिंयां सुन्नैं-च़ंदीए भांडै तोली करै आप्पू का तेखअ पजैल़ै एरुशलेम परमेशरे भबनै।”
एरुशलेम पुजै फिरी
बारा च़ैत्रै लागै हाम्हैं अहावा गाडा का एरुशलेम बाखा लै हांढदै। बिधाता रहअ हाम्हां संघै इहअ कि सारी बाता डाहै हाम्हैं म्हारै दुशमण अर डाकू का हाम्हैं राज्ज़ी-राम्बल़ै बच़ाऊई। एरुशलेम नगरी पुजी किअ हाम्हैं चिई धैल़ै तैणीं राम। च़ौथै धैल़ै डेऊऐ हाम्हैं बिधाते भबना लै संघा दैनै हाम्हैं तिंयां सुन्नैं-च़ंदीए भांडै तोली करै उरियाहे शोहरू मरमोत प्रोहता का सभाल़ी। तेऊ संघै त पिनहास प्रोहतो शोहरू एलीआजर अर दूई तै तिन्नां संघै होर लेबी जेशूओ शोहरू जोजबाद अर बिनूईओ शोहरू नोदिया। तिन्नैं तोली तिंयां सोभै च़िज़ा संघा डाही गणी करै तेभी लिखी कि केतरअ तोल निखल़अ अर केतरी च़िज़ा आसा।
ज़ुंण गलामी का फिरी आऐ तै, तिन्नैं सोभी किऐ इज़राईले परमेशर बिधाता लै हूम बल़ीदान। तिन्नैं काटै सोभी इज़राईलीए नाओंऐं बारा बाछ़ू, छैनूंऐं रिठ अर सतत्तर गाभू। एता का लाऊआ काटै पाप माफी लै बारा बाकरै पाप बल़ी। ईंयां सोभ बल़ीदान किऐ पठी बेदी दी हूम। ज़ुंण माहा राज़ै तिन्नें हाथै हुकम लिखी त दैनअ द, सह च़िठी दैनी तिन्नैं फरात दरैऊआ आर पछ़मा बाखा मुल्खे राज़पाल अर तिन्नां होरी कार-करिंदै का ज़ुंणीं परमेशरे भबने कामां लै इज़राईलीए मज़त किई ती।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.