Kulvi Outer Seraji Bible
एज्रा 5
बिधाते भबनो काम किअ भिई शुरू
तेखअ लागै ईदूओ पोचअ जकर्या अर हगाई गूर एरुशलेम नगरीए यहूदी सेटा बिधाते गल्ला प्रगट करदै। तिन्नैं किई इज़राईले परमेशरा बाखा गल्ला। ज़ांऊं शालतीएले शोहरू जरूबाबेल अर जेशूए शोहरू जोसादक प्रोहतै तिन्नों समाद शूणअ, तिन्नैं किअ एरुशलेम बिधाते भबना बणाणेंओ काम भिई शुरू अर तिन्नैं दूई गूरै दैनअ तिन्नों साथ।
पर फरात दरैऊआ पार पछ़मा बाखा मुल्खो राज़पाल तत्तनाई, शेतेर-बोज़नाई अर तिन्नें होर साथी गऐ तेतरी एरुशलेम पुजी संघा पुछ़अ तिन्नैं इहअ, “तम्हैं कहा पुछ़ी लागै एऊ भबना च़िणदै अर नगरीए गहल़ा सदेरदै? तम्हैं खोज़ा तिन्नां सोभिए नाअं ज़ुंण तम्हां एऊ कामां कराऊंदै आसा लागै दै!” पर बिधाते हुणाकार हुई यहूदी सैणैं लै एही कि ज़ेभै तैणीं राज़पालै अर तिन्नें साथी माहा राज़ै दारा लै समाद दैनअ अर तेखअ ज़ेभै तैणीं च़िठी दी माहा राज़ैओ ज़बाब निं आअ, तेभै तैणीं निं तिन्नैं भबना च़िणनेओ काम रोक्कअ। ज़ुंण फरात दरैऊआ पार बाखे राज़पाल तत्तनाई, शेतेर-बोज़नाई अर आर बाखा तेऊए साथी फारसी मलाज़मै माहा राज़ै दारा लै च़िठी दैनी, तेते नकल आसा अह:
“माहा राज़ै दारा लै हाम्हां बाखा राज्ज़ी-खुशी।
“माहा राज़अ, हाम्हैं डेऊऐ तै यहूदा मुल्खै तैहा ज़ैगा ज़िधी महान परमेशरा लै भबना च़िणदै आसा लागै दै। तेता च़िणदै आसा बडै-बडै काटुऐ पात्थरा करै लागै दै, भित्ती दी आसा हेरी दी चाची पाई। तिंयां आसा एऊ कामां करदै धैल़-राच लागै दै अर सह भबन हेरनअ तिन्नां छ़ेक्कै बणाईं।
“हाम्हैं पुछ़ै तिन्नें सैणैं बी, ‘तम्हैं कहा पुछ़ी लागै एऊ भबना च़िणदै अर नगरीए गहल़ा सदेरदै?’ हाम्हैं पुछ़ै तिन्नें सैणें नाअं बी ताकि हाम्हैं तेता ताल्है लिखी दैए।
“तिन्नैं दैनअ हाम्हां लै इहअ ज़बाब, ‘हाम्हैं करा तेऊ परमेशरे च़ाकरी ज़ुंण सरग अर पृथूईओ मालक आसा, हाम्हैं आसा तेऊ भबना भिई च़िणदै लागै दै ज़ुंण एक ज़मानैं इज़राईले एकी महान राज़ै बणाअं त। पर म्हारै दादै-बाबै ठैऊई स्वर्गे परमेशरा लै रोश्शै, तैही दैनअ तेऊ हाम्हां बाबेल देशे कसदी राज़ै नबूकदनेसरे गलामी दी डेऊणैं ज़ुंणीं अह भबन पठी पाअ ढोल़ी अर हाम्हैं निंयैं तै कैद करी बाबेल देशा लै। पर ज़ांऊं बाबेल देशै कुस्रू माहा राज़अ बेठअ, तेऊ किअ हाम्हां लै परमेशरे भबना भिई च़िणनैओ हुकम। परमेशरे भबना का माहा राज़ै नबूकदनेसरै ज़ुंण सुन्नैं-च़ंदीए चाण-भांडै एरुशलेम नगरी का बाबेल देशा लै निंईं आपणैं देहुरै डाहै तै, तिंयां भांडै बी दैनै माहा राज़ै कुस्रू देहुरै का काढी शेशबासरा का सभाल़ी बापस। शेशबासर त माहा राज़ै कुस्रू यहूदा मुल्खो राज़पाल बणाअं द अर तेऊ बोलअ हाम्हां लै, “इना भांडै डाहा एरुशलेम बिधाते भबनै अर भबना च़िणां भिई तैहा ई ज़ैगा ज़िधी सह पैहलै थिअ। शेशबासर आअ आप्पै संघा दैनी एरुशलेम एछी परमेशरे भबने आथरी पाई। तधा ओर्ही आसा हाम्हैं एता च़िणदै लागै दै पर अज़ी निं हाम्हैं एता च़िणी मुक्कै।”’
“माहा राज़अ, तैही च़ाहा हाम्हैं इहअ कि तूह कर बाबेल देशै पराणैं सरकारी कागदा दी लोल़णैंओ हुकम कि माहा राज़ै कुस्रू कधू असली दी इना लै एरुशलेम नगरी भबना बणाणेंओ हुकम किअ द आसा कि नांईं? तेखअ दैऐ हाम्हां लै बी फैल़अ कि हाम्हैं किज़ै करूं।”
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.