Kulvi Outer Seraji Bible
एज्रा 4
परदेसी मणछ आऐ मज़त करदै
यहूदा अर बिन्यामीने लोगा संघै ज़ुंण ज़ीद डाहा तै, ज़ांऊं तिन्नैं शूणअ कि ज़ुंण गलामी का फिरी आसा आऐ दै, तिंयां आसा इज़राईले परमेशर बिधाते भबना भिई च़िणदै लागै दै। तिंयां डेऊऐ जरूबाबेल अर होरी टोलीए सैणैं भाल़ै संघा लागै तिन्नां लै इहअ बोल्दै, “हाम्हां बी दैआ थारी मज़त करनै! ज़धकै हाम्हैं अश्शूर देशे माहा राज़ै एसर्दोनै एऊ देशै पजैल़ी बसाऊऐ, तधकै आसा हाम्हैं थारै परमेशरे पूज़ा-गाज़ा करदै लागै दै।”
जरूबाबेल, जेशूआ अर टोलीए होरी सैणैं बोलअ तिन्नां लै इहअ, “हाम्हां इज़राईली निं आपणैं परमेशर बिधाते भबना बणाणां लै थारी मज़त लोल़ी। हाम्हां हेरनअ अह आप्पै च़िणीं ज़िहअ हाम्हां लै फारस देशे माहा राज़ै कुस्रू हुकम आसा किअ द।”
तेखअ लागै तेऊ देशै बस्सै दै लोग यहूदी डरैऊंदै कि तिन्नों हैअ चुटे अर तिंयां भबना च़िणने छ़ाड़ पाए। तिन्नैं दैनी फारस देशे राज़े कार-करिंदै लै रेशपत बी। तिंयां रहै फारस देशे माहा राज़ै कुस्रूए राज़ा पोर्ही फारस देशै दारा माहा राज़ेए राज़ा तैणीं इहअ ई करदै लागी।
बिधाते भबना भिई च़िणना लै हुई बेघै आफ़त
ज़ांऊं क्षयर्ष फारस देशो राज़अ बेठअ, तेऊए राज़ा दी पैहली साला किअ फेर बस्सै दै दुशमणै यहूदा अर एरुशलेम नगरी बस्सै दै इज़राईलीओ क्षयर्ष माहा राज़ै सेटा च़िठी दैई दाऊअ।
बादा का दैनी अर्तक्षत्र माहा राज़ेए राज़ा दी बिशलाम, मिथ्रदात, ताबेल अर तिन्नें होरी साथी अर्तक्षत्र माहा राज़ै लै च़िठी लिखी। च़िठी ती अरामी आखर अर अरामी बोली दी लिखी दी अर सह शणाऊंईं माहा राज़ै का अनुबाद करी।
राज़पाल रहूम, शिमशाई काईथै दैनअ ऐहा च़िठी दी माहा राज़ै अर्तक्षत्रा लै एरुशलेम नगरीओ सारअ हाल लिखी।
च़िठी दी दैनी तिन्नैं माहा राज़ै लै रहूम राज़पाल, शिमशाई काईथ, तिन्नें होरी साथी पांच़, सैणैं, तर्पेली लोगा, फारसी, बाबेल देशे, अरेकी, शुशा, देहबी अर एलामी लोगा बाखा राज्ज़ी-खुशी। तिन्नां होरी लै बी दैनी राज्ज़ी-खुशी ज़ुंण महान अर मशूर ओसनापरै तिन्नें घअरा का झ़ैऊई सामरी नगरी अर एप्रात दरैऊआ पछ़मा बाखा मुल्खै बसाऊऐ तै।
ज़ुंण च़िठी तिन्नैं अर्तक्षत्र माहा राज़ै लै लिखी, तेते नकल आसा अह:
“अर्तक्षत्र माहा राज़ै लै आसा फरात दरैऊआ पारा बाखा मुल्खे सोभी शुचै-पाक्कै दासा बाखा राज्ज़ी-खुशी।
“माहा राज़अ, ताखा लोल़ी इना गल्लो थोघ लागअ कि ज़ुंण यहूदी बाबेल देशे गलामी का इधी एरुशलेम फिरी आसा आऐ दै, तिंयां आसा हाम्हां सेटा इधी उपद्रभी अर कदुष्ट नगरी भिई बसाऊंदै लागै दै। तिन्नैं हेरी आथरी सदेरी अर तिन्नैं आणअ नगरी फेर गहल़ च़िणीं छ़ेक्की! माहा राज़अ, हाम्हैं च़ाहा इहअ कि तूह ऐहा गल्ला समझ़े, ज़ै तिंयां नगरी फेर गहल़ च़िणीं मुक्के अर तिंयां नगरी बसाऊई मुक्के, तेखअ निं तिंयां सुंढ, पाही अर कारअ दैई गऐ अर एतो घाटअ पल़णअ हेरे माहा राज़ेए खज़ानै दी! हाम्हैं आसा माहा राज़ै लै शुचै-पाक्कै अर हाम्हैं निं एऊ साबै माहा राज़ेए नकदरी हंदी भाल़ी सकदै। तैही हेरी हाम्हैं च़िठी पठी गल्ला खोज़ी चतैनगी दैई कि एथ आसा हेरे इहअ-इहअ हंदअ लागअ द। माहा राज़अ, तूह दैऐ आपणैं दादा-बाबे इतिहासे कताबा दी पहल़णीं कि तेथ किज़ै आसा लिखअ द! तेता का जाणअ ताखा थोघ लागी कि अह नगरी आसा पैहलै ओर्ही द्रोही, ऐहा नगरी आअ पैहलकै ज़मानै ओर्ही तिन्नां देशे राज़ै लै द्रोह हंदी ज़ुंणीं ईंयां आपणैं धीन तै किऐ दै। माहा राज़अ, हाम्हां बाखा आसा अह गल्ल पाक्की, ज़ै अह नगरी बस्सी जाए अर एता फेर गहल़ च़िणीं मुक्के, तेखअ छ़ुटअ ताखा फरात दरैऊआ पार पछ़मा बाखो मुल्ख पठी!”
तेखअ दैनअ राज़ै अर्तक्षत्रै च़िठी लिखी तिन्नां लै इहअ समाद बापस, “राज़पाल रहूम, शिमशाई काईथ, सामरी अर फरात दरैऊआ पार रहणैं आल़ै तिन्नें सोभी साथी लै मुंह बाखा राज्ज़ी-खुशी।
“ज़ुंण तम्हैं च़िठी ती दैनी दी, सह हेरी मुखा पहल़ी तर्ज़ुमअ करी शणाऊंईं। मंऐं किअ इतिहासे कताबा दी लोल़णैंओ हुकम, ईंयां गल्ला निखल़ी शुची ऐहा नगरीए लोग आऐ पराणैं ज़मानै ओर्ही इना धीन करनै आल़ै राज़ै लै द्रोह करदी, द्रोह अर उपद्रभ आसा ऐहा नगरी आम। बडै-बडै बलबान राज़ै किअ एरुशलेम नगरी राज़ तिंयां करा तै फरात दरैऊआ पार पछ़मा बाखा सारै देशा प्रैंदै राज़ अर इना का गराहा तै सुंढ, पाही अर कारअ। तम्हैं करा इहअ हुकम नाअं ज़ारी कि इना मणछो काम निं आजू हणैं दैई। ज़ेभै तैणीं मेरअ हुकम निं होए, तेभै तैणीं निं ऐहा नगरी एक पात्थर बी होर लोल़ी लागअ। तम्हैं डाहै धैन अर ऐहा गल्ला लै निं ढील छ़ाडी, तैहा गल्ला किल्है दैणअ हाम्हां आजू बढणैं ज़ेथ माहा राज़ैओ घाटअ होए?”
ज़ांऊं माहा राज़ै अर्तक्षत्रे अह च़िठी रहूम राज़पाल, शिमशाई काईथ अर तिन्नें होरी साथी सेटा पुजी। तिंयां डेऊऐ नढैऊऐ एरुशलेम यहूदी सेटा संघा रोक्कै तिंयां ज़ोरा-ज़ोरी कामां करनै का।
इहअ करै लागी एरुशलेम बिधाते भबना च़िणने कामां लै रोक। तेखअ रही फारस देशै दारा माहा राज़अ बणनें दुजी साला तैणीं अह रोक लागी।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.