Kulvi Outer Seraji Bible
एज्रा 3
बिधाते बेदी बणाईं भिई
ज़ुंण इज़राईली गलामी का फिरी आपणीं-आपणीं नगरी बस्सै तै, तिंयां डेऊऐ तैहा ई साला काती एरुशलेम नगरी लै संघा किअ सोभी झाल़अ। जोसादको शोहरू जेशूआ, तेऊ संघै होर प्रोहत अर शालतीएले शोहरू जरूबाबेल अर तेऊए संघै होरी प्रोहतै बणाईं इज़राईले परमेशरे बेदी भिई ताकि तिंयां तेथ तेऊ साबै हूम बल़ीदान करी सके ज़िहअ परमेशरे दास मोसा लिखै दै बधाना दी बधान आसा खोज़अ द। एही ता थिई तिन्नां गलामी का फिरी एछी आप्पू फेर बस्सै दै लोगा का डअर लागी दी, पर तज़ी बी किई तिन्नैं बेदी तैहा ई ज़ैगा बणाणें हिम्मत ज़िधी सह पैहलै थिई। तेखअ लागै तिंयां तेथ धैल़ दोत्ती अर उडै बिधाता लै हूम बल़ीदान करदै। तेखअ मनाऊंअ तिन्नैं ज़िहअ बधाना दी थिअ खोज़अ द, तेऊ साबै छ़ानींओ थैर संघा किऐ हर धैल़ै हूमा लै तेतरै बल़ीदान ज़ेतरअ सूल थिअ। एता का लाऊआ किऐ तिन्नैं बिधाता लै धैल़ हूम बल़ीदान, पुनूंई लै बल़ीदान, लोगे मानत मनै दै बल़ीदान अर तिंयां होर सोभी थैरे बल़ीदान बधाने साबै करी। साज़ै काती किअ तिन्नैं बिधाता लै हूम बल़ीदान पर अज़ी निं तिन्नैं बिधाते भबना भिई च़िणना लै आथरी पाई ती।
बिधाते भबना भिई च़िणनेओ काम किअ शुरू
तिन्नैं दैनी पात्थरे मिस्त्री अर काठे कारीगीरा लै ढब्बै दैई मज़दूरी। सूर अर सदोनी लोगा लै बी दैनी ज़िणस अर जैतूनो तेल कि तिंयां तेते बदल़ै लाबानोन बणां का केल़ुईए काठ काढी जोपा नगरी नेल़ समुंदरे बाढै तैणीं पजैल़ी दैए। इना सोभी कामां करना लै थिई फारस देशे राज़ै कुस्रू च़िठी लिखी ज़ाज़त दैनी दी। गलामी का फिरी एछणैं बाद दुजी साला बशाहा पोर्ही लागै शालतीएलो शोहरू जरूबाबेल, जोसादको शोहरू जेशूआ अर तिन्नें भाई-बंधा मांझ़ै होर लेबी प्रोहत बी एरुशलेम नगरी बिधाते भबनो काम करदै। ज़ेतरै लेबी बिहा साले या तेता का प्रोढी अमरे थिऐ, तिंयां सोभै लागै बिधाते भबना भिई च़िणने कामां। यहूदे आद-लुआदा मांझ़ै जेशूआ अर तेऊए शोहरू अर सोभ टबर, होदाबया टोली का कदमीएल अर तेऊए शोहरू सभाल़ी बिधाते भबना बणाणें ज़िम्मैंबारी। तिन्नां संघै मज़त करनै आल़ै तै हेनदाद टोलीए लेबी।
ज़ांऊं मिस्त्री बिधाते भबने आथरी पाई, प्रोहत आऐ प्रोहतच़ारी करने च़ोल़ै बान्हीं, आप्पू संघै आणै नर्शिंगै, असाप टोलीए लेबी खल़्हुऐ आपणैं हाथै छ़छ़ाल़ा ढाकी। तिन्नैं सोभी किई तेऊ साबै बिधाते स्तोती ज़िहअ इज़राईले राज़ै दाबेदै रबाज़ बणाअं द। तेखअ लागै तिंयां ऐहा गिहा बोली बिधाते ज़ै-ज़ैकार करदै,
“बिधाता आसा भलअ अर सह झ़ूरा हाम्हां इज़राईली लै सदा।”
लेबी, प्रोहत, टोली मांझ़ै ज़ुंण सैणैं ज़ुंण प्रोढै थिऐ, तिन्नैं त बिधातो पराणअ भबन भाल़अ द। ज़ांऊं तिन्नां नदरी भिई भबने आथरी पांदै लागै, तिंयां लागै हिंह करै लेरा लांदै। ज़ुंण तिधी तिन्नां संघै होर थिऐ, तिंयां लागै ज़बर खुश हई ज़ोरै-ज़ोरै बिधाते ज़ै-ज़ैकार करदै। लेरनै अर ज़ैकारे हाल्लै दी निं तिधी फरक ई रहअ कि लेरदै आसा लागै दै कि ज़ैकार करदै आसा लागै दै! तिन्नें बोल लागै खास्सै दूर तैणीं शुण्हदै।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.