2 शमूएल

2 शमूएल

इज़राईला दी महान राज़अ दाबेद

भेत

लिखणैं आल़अ: खास थोघ निं आथी

सन: 1050 का 722 ईसा आजी

पहल़णैं आल़ै: इज़राईली

शमूएले अह दुजी कताब आसा असली तै शमूएले पैहली कताबो दुजअ भाग। अह ती एक्‍कै कताब अर अह आसा बादा का दूई बाखा बांडी 1 शमू. अर 2 शमू. किअ द, किल्हैकि कठा ती अह बेघै बडी कताब। 2 शमूएले कताबा दी आसा खासकर राज़ै दाबेदे बारै कि तेऊओ राज़ किअ त।

इज़राईले पैहलै राज़ै शाऊला मरनै बाद बणाअं यहूदा गोत्रा आल़ै आपणअ राज़अ। बादा का बणअ दाबेद सारै इज़राईलीओ राज़अ।

दाबेदै कि एरुशलेम नगरी दी जबेशी लोगा का छ़ड़ैऊई कबज़अ संघा बणाईं एरुशलेम नगरी तेऊ आपणीं नऊंईं राज़धानी। बादा का आणअ तेऊ बिधातो करारो मणशू बी तिधा लै। ज़िधी तेऊ बिधाते करारो मणशू त डाहअ द, सह च़ाहा त तिधी एक बडअ भबन बणाणअं ताकि बिधातो खास्सअ अदर होए। पर बिधाता निं तेऊ इहअ करनै दैनअ। पर बिधाता त तेऊ लै बोलअ द कि सह हणअ एक महान राज़अ अर आजू बी रहणअ तेऊए आद-लुआदो सदा राज़।

दाबेदै ज़ितै इज़राईले दुशमणा का कई जुध संघा किअ तेथ राज़। सह हुअ खास्सअ मशूर अर महान राज़अ। पर तेऊए भलै हुअ पाप बी अर तेता पिछ़ू पल़ी तेऊ लै खास्सी आफ़त बी। मतलब इहअ निं आथी कि दाबेद त हर गल्‍ला लै पूरअ, पर सह थिअ बिधाता लै शुचअ-पाक्‍कअ अर सह निं तेऊ छ़ाडी होरी किछ़ू गल्‍ले पूज़ा-गाज़ा करदअ त। ज़ेभै तैणीं यहूदा मुल्ख रहअ, बिधाते दाबेदा संघै करार रही तेभै तैणीं बणी।

“मंऐं आसा आपणीं परज़ा इज़राईली लै एक ज़ैगा डाही दी अर तिंयां बसाऊंणै मुंह तैहा ज़ैगा। तिधी निं तेखअ तिंयां कोही हंतणैं। तैहा ज़ैगा पुजणैं बाद आऐ खास्सी बारी उपद्रभी लोग तिन्‍नां हारदै-मारदै, पर ऐबै निं इहअ भिई हणअ। मेरी रही ताल्है ज़बान कि तूह डाहणअ मुंह तेरै दुशमणा का बच़ाऊई अर ताल्है दैणीं मुंह खास्सी आद-लुआद। ज़ांऊं तूह खास्सअ प्रोढअ जाणअ हई, तेखअ डाहणअ तूह तेरै दादा-बाबा ई ज़िहअ दाबी। तेरअ एक शोहरू बणाणअं मुंह ताह बाद तेरी ज़ैगा राज़अ अर तेऊओ राज़ करनअ मुंह होर बी बलबान। तेरअ सह शोहरू ई हणअ ज़हा मुल्है भबन बणाणअं अर तेरै खिंबै हणअ एक इहअ ज़सरअ राज़ सारी सदा रहणअ। तेऊओ बाब हणअ हुंह आप्पै अर सह हणअ मेरअ शोहरू। ज़ै सह गलती करे, तेऊ लै दैणीं मुंह आप्पै सज़ा ज़िहअ एक बाब करा।”

(7:10-14)

कताबे बांड

दाबेद यहूदा मुल्खो राज़अ 1:1—4:12

सारै इज़राईला दी दाबेदो राज़ 5:1—24:25