Kulvi Outer Seraji Bible
2 शमूएल 9
दाबेद अर मोपीबशेत
एकी धैल़ै सोठअ दाबेदै इहअ, “राज़ै शाऊले आजू लुआद रही बी कि किछ़ै निं? ज़ै रही दी होए, तिन्नां लै हणअ मुंह खास्सै झणैल़ू ज़ेही मंऐं आपणैं साथी जोनाताना लै कऊंलै बच़न आसा दैनै दै।”1
शाऊले खिंबा का थिअ सिबू नाओं एक मणछ ज़ुंण राज़ै दाबेदा सेटा काम करा त, तेऊ लै बोलअ दाबेदा सेटा डेऊंणा लै। ज़ांऊं सह आअ, राज़ै दाबेदै पुछ़अ तेऊ का, “तूह आसा सिबू?”
तेऊ दैनअ ज़बाब, “हाँ माहा राज़अ, हुंह तेरअ दास ई आसा।”
राज़ै दाबेदै पुछ़अ सिबू का, “शाऊले टबरा मांझ़ै कुंण आजू आसा बच़अ द कि हुंह तेऊ लै खास्सी झींण करी सकूं?”2
सिबू दैनअ ज़बाब, “मेरै मालक, जोनातानो आसा एक शोहरू बच़अ द, सह आसा पठी लाट्टअ।”
राज़ै दाबेदै पुछ़अ, “सह आसा किधी?”
सिबू दैनअ ज़बाब, “सह रहअ लोदबेर नगरी अमीएले शोहरू माकीरे घअरै।” राज़ै दाबेदै छ़ाडै अमीएले शोहरू माकीरे घअरा का तेऊ आणदै आदमी।
ज़ांऊं जोनातानो शोहरू राज़ै शाऊलो पोचअ मोपीबशेत राज़ै दाबेदा सेटा पजैल़अ, तेऊ टेक्कअ धरनीं उटअ पल़ी दाबेदा सेटा माथअ। दाबेदै बोलअ, “मोपीबशेत,” तेऊ दैनअ ज़बाब, “बोल माहा राज़अ, आपणैं दासा लै तेरअ किज़ै हुकम आसा?”
दाबेदै बोलअ, “तूह निं डरी आथी, मुंह करनीं तेरै बाब जोनाताना पिछ़ू ताल्है खास्सी झींण। तेरै दादू शाऊले ज़ैगा-ज़िम्मीं दैणीं मुंह तेरै नाओंऐं ताल्है बापस करी। तूह खाऐ धैल़ मुंह संघै मेरै पलगा दी रोटी।”
मोपीबशेत बेठअ जान्हूंए बलै भिई धरनीं, संघा बोलअ इहअ, “हुंह तेरअ दास आसा मूंऐं दै कुक्करा ज़िहअ बृथा! तूह किल्है फिरअ मुल्है एतरअ झणैल़ू?”
तेखअ शादअ राज़ै दाबेदै सिबू ज़ुंण राज़ै शाऊला सेटा काम करा त, संघा बोलअ इहअ, “ज़ुंण शाऊल अर तेऊए टबरो थिअ, सह लाअ मंऐं तेरै मालके पोचै मोपीबशेता लै दैई। तूह, तेरै शोहरू अर तेरै दास-दासी बऊऐ-बचऊऐ तैहा ज़िम्मीं आपणैं मालके टबरा लै संघा करै तेता का तिन्नां लै साल-फसल आणी ताकि तिन्नां रोटी भेटे। पर तेरै मालको पोचअ मोपीबशेत रहणअ मुंह संघै अर एऊ खाणीं मेरै पलगा प्रैंदै धैल़ मुंह संघै रोटी।” सिबूए तै पंद्रा शोहरू अर बिह च़ाकर।
सिबू बोलअ राज़ै दाबेदा लै इहअ, “माहा राज़अ! मेरै मालक, ज़िहअ तूह हुकम करा, मुंह करनअ तिहअ ई।”
मोपीबशेत रहअ एरुशलेम नगरी दाबेदा संघै तिधी। सह खाआ त राज़े पलगा दी राज़े टिक्कै ज़िहअ ठाहठा दी रोटी। मोपीबशेतो बी थिअ मिका नाओं एक शोहरू। सिबूए सारै टबर लागै मोपीबशेते च़ाकरी करदै। मोपीबशेत त दुही ज़ांघो लाट्टअ, अर सह रहअ एरुशलेम नगरी राज़ै दाबेदे मैहलै अर राज़े पलगा दी खाआ त सह धैल़ रोटी।
Source notes (2)
- Cross-reference 1 शमू. 20:15-17
- Cross-reference 2 शमू. 4:4
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.