Kulvi Outer Seraji Bible
2 शमूएल 4
इशबशेते हत्या
ज़ांऊं शाऊले शोहरू इशबशेता का थोघ लागअ कि अबनेर पाअ हेब्रोन नगरी मारी, सह डरअ खास्सअ अर इज़राईल मुल्खे लोगा बी पल़अ सोभी हैल़अ। शाऊले शोहरू इशबशेता संघै तै दूई ज़ण्हैं दूई दले सैणैं बानाह अर रकाब। ईंयां दुहै तै बरोत नगरी का रमोने शोहरू बिन्यामीन गोत्रा का। बरोत नगरी थिई बिन्यामीन गोत्रे हेस्सै। बरोत रहणैं आल़ै लोग तै बरोत नगरी छ़ाडी गतैम नगरी लै ठुर्है दै अर तेखअ बस्सै तिधी। 1
शाऊले शोहरू जोनातानो बी थिअ एक शोहरू, सह थिअ लाट्टअ अर तेऊ नाअं त मोपीबशेत, ज़धू जोनाताने मौत हुई, तधू त सह पांज़ा सालो शोहरू। ज़ांऊं जज्रेला का जोनातान मरने खबर पुजी, तेऊ शोहरू धाचणै आल़ी बेटल़ी ठुर्ही तेऊ शोहरू च़की तुआखुई करै संघा बधल़ूई धरनीं अर सह शोहरू हुअ इहअ करै लाट्टअ।
बरोत नगरीए रमोने शोहरू रकाब अर बानाह आऐ खरै दपहरै इशबशेते घअरा लै अर सह थिअ घणीं निंजा सुत्ती राम करदअ लागअ द। तिंयां दुहै डेऊए पांडा भितरा लै कणका आणने भान्नै, भितरी बाही तिन्नैं इशबशेते पेटै संघा पाअ मारी। संघा ठुर्है रकाब अर तेऊओ भाई बानाह तिधा का दुहै। हुअ इहअ कि ज़ांऊं तिंयां पांडा भितरी डेऊऐ, इशबशेत त भितरी घणीं निंजा सुत्तअ द अर तिन्नैं पाअ सह मारी। तिन्नैं निंयं तेऊओ मूंड काटी आप्पू संघा। तेखअ निखल़ै राचो-राच जरदण अराबा का हांढी दूर। तिन्नैं निंयं इशबशेतो मूंड हेब्रोन नगरी राज़ै दाबेदा सेटा संघा लागै इहअ बोल्दै, “इधी आणअ भाल़ हाम्हैं तेरै दुशमण शाऊले शोहरू इशबशेतो मूंड काटी। मेरै मालक, शाऊल त ताह मारदअ तेरै पिछ़ै पल़अ द। आझ़ लअ बिधाता शाऊल अर तेऊए लुआदा का बदल़अ।”
दाबेदै दैनअ बरोती रमोने शोहरू रकाब अर तेऊए भाई बानाह लै ज़बाब, “ज़िऊंदअ परमेशर बिधाता ज़ुंण मुंह हर खरी अर आफ़ता का बच़ाऊआ, हुंह खाआ तेऊए सोह! सकाल़ग नगरी का आअ त मुंह सेटा एक शाऊले मौते खबर इहअ सोठी कि अह हणीं मुल्है खुशीए खबर। सह मणछ किअ मंऐं तेभी कैद संघा पाअ मारी। सह भेटअ तेऊ तैहा खुशीए खबरो फल!2 तै ऐबै तिन्नां मणछे केही बूरी दशा हणीं ज़ुंणीं एक निंजा सुत्तअ द नर्दोश मणछ तेऊए ई घअरा भितरी पाअ मारी! ऐहा हत्या करनैओ बदल़अ लणअ मुंह तम्हां का लई अर थारअ निं मुंह धरती दी नाअं-नशाण ई डाहणअ!” तेखअ किअ दाबेदै हुकम संघा पाऐ रकाब अर बानाह मारी। सपाही काटै तिन्नें हाथ खूर अर तिन्नें ल्हासा डाही हेब्रोन नगरी सअरा सेटा छ़ड़ाऊई। तिन्नें निंयं इशबशेतो मूंड संघा डाहअ हेब्रोन नगरी तिधी दाबी ज़िधी अबनेर थिअ दाबअ द।
Source notes (2)
- Cross-reference 2 शमू. 9:3
- Cross-reference 2 शमू. 1:1-16
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.