Kulvi Outer Seraji Bible
2 शमूएल 13
अमनोन अर तामार
राज़ै दाबेदे ती तामार नाओंए एक शोहरी हेरनी बेघै बित्ती, तेसो भाई त अबशलोम। अमनोन त दाबेदे एकी होरी लाल़ी का शोहरू हुअ द, सह लोभणूंअ तैहा लै। अमनोन लोभणूंअ तामारा लै इहअ कि सह च़ाल्लअ तैहा पिछ़ू मरी कि सह हुअ बमार किल्हैकि सह शोहरी ती अज़ी कुंआरी अर सह निं तैहा संघै किछ़ करी सकदअ त। पर अमनोनो त जोनादाब नाओं एक साथी, सह थिअ दाबेदे भाई शिमेहो शोहरू। सह थिअ खास्सअ छ़लैघ। जोनादाबै बोलअ अमनोना लै, “तूह आसा राज़ैओ शोहरू, मुखा शुझिआ कि तूह हुअ धैल़ी-धैल़ी दुबल़अ ई! मुखा खोज़ ताह किज़ै खरी आसा?”
अमोनै बोलअ, “हुंह झ़ूरा आपणैं भाई अबशलोमे बैहण तामारा लै!”
जोनादाबै बोलअ तेऊ लै, “तूह रह आपणैं कऊंचा प्रैंदै सुत्ती संघा कर इहअ दखाअ कि तूह आसा खास्सअ बमार, ज़ेभै तेरअ बाब ताह भाल़अ एछे, तेभै बोलै तेऊ लै इहअ, ‘ज़ीबाण, मेरी च़ेई तामारा लै बोल मुखा खैऊ रोटी, तैहा लै बोल कि इधी बणाऊं मुंह सम्हनै रोटी संघा खैऊए मुखा सह आपणैं हाथै।’” अमनोनै किअ बमार हणैंओ दखाअ संघा रहअ कऊंचा प्रैंदै सुत्ती।
राज़अ दाबेद आअ तेऊ भाल़अ अर अमोनै बोलअ तेऊ का इहअ, “ज़ीबाण, मेरी च़ेई तामारा लै बोल मुखा खैऊ रोटी, तैहा लै बोल कि इधी बणाऊं मुंह सम्हनै रोटी संघा खैओए सह मुखा आपणैं हाथै।”
दाबेदै दैनअ मैहला लै तामारा सेटा समाद, “आपणैं भाई अमनोने घअरै डेऊई दै तेऊ लै रोटी चाणी।” तामार डेऊअ अमनोने घअरै अर तैहा भाल़अ कि सह आसा च़ैन्नै पल़अ द। तैहा मुछ़अ पिठअ संघा बणाऐं तेला जैंदरी तिधी तेऊ सम्हनै रोटू। तेखअ डेऊई सह तेता थाल़ू दी पाई अमनोना सेटा खाणां लै दैंदी पर तेऊ किअ खाणां लै नांह। तेखअ बोलअ अमोनै आपणैं दासा लै, “मुंह सेटा का डेओआ सोभ बागै।” सोभ दास डेऊऐ बागै। तेखअ बोलअ अमनोनै तामारा लै, “रोटीओ थाल़ू आण ओर्ही मुंह सेटा लै, संघा खैऊ मुखा आपणैं हाथा करै।” तामारै निंयं रोटूओ थाल़ू हाथै संघा डेऊई तेऊ सेटा लै। ज़ांऊं सह तेऊ का रोटीए म्हारा खैऊंदी लागी, तेऊ ढाकी सह संघा बोलअ इहअ, “इधी सुत्त मुंह संघै मेरै च़ैन्नै!”
तामारै बोलअ लेरा पाई, “नांईं, मेरै भाई, मुंह संघै निं इहअ कदुष्ट काम करै! अह आसा घोर पाप! इहअ ऐडअ काम निं इज़राईला दी कधि लोल़ी हुअ! मेरै बारै ता सोठ, मेरी हणीं सदा लै इज़त खतम! आपणैं बारै सोठ, इज़राईला दी करनीं तेरी सोभी बेइज़ती। ज़ीबाण, तूह कर राज़ै संघै गल्ला, सह जाणअ ताल्है मुंह संघै बैह करना लै मनी।” पर अमोनै निं तेसे एक गल्ल बी शूणीं, तेऊ त तैहा का खास्सअ ज़ोर अर तेऊ किअ तैहा संघै ज़ोरा-ज़ोरी कदुष्ट काम संघा लाअ तैहा लै दाग।
ज़ांऊं अमनोन तैहा संघै भोग करी मुक्कअ, तेखअ हुई तेऊ तैहा लै एतरी नफरत कि ज़ेतरअ सह पैहलै तैहा लै झ़ूरा त, तेता का खास्सी हुई तेऊ नफरत। तेखअ बोलअ तेऊ तैहा लै, “खल़ी उझ़ू, इधा का डेऊ!”
तैहा दैनअ ज़बाब, “हुंह निं च़ाल्ली डेऊई, ऐबै हुंह इधा का बागै काढणीं आसा तेता का बी खास्सअ बडअ ज़ुल्म ज़ुंण तंऐं मुंह संघै एभै किअ।”
पर अमोनै निं तेसे गल्ल मनी, तेऊ शादै आपणैं दास संघा बोलअ इहअ, “ऐहा बेटल़ी करा मेरी आछी सेटा का दूर! ऐहा शोटा दुआरा बागै संघा लाआ भितरा बाखा दुआरै आगल़।” तिन्नैं काढी तामार दुआरा बागै संघा लाई पिछ़ू दुआरै आगल़।
तामारै त पूरी बाहो रंग-बरंगअ लाम्मअ घाघरअ बान्हअ द, किल्हैकि राज़े देई ज़ुंण कुंआरी हआ ती, तिंयां बान्हां तेऊ ज़मानै इहै ई झिकल़ै। तैहा तरैल़अ आपणैं मुंडै छ़ार संघा पाअ आपणअ सह रंग बरंगअ घाघरअ धेल़ी संघा डेऊई आपणैं मुंहैं हाथ लाई लेरा लांदी-लांदी। ज़ांऊं सह तेसे भाई अबशलोमै भाल़ी, तेऊ पुछ़ी सह, “शुची गल्ला खोज़ अमनोन रहअ-बस्सअ ताह संघै भाल़ी? पर ऐबै रहअ तूह च़ुप्पी च़ेईऐ लेरा निं लाऐ। सह आसा तेरअ काक्कअ भाई, एते बारै निं होरी का खोज़ी आथी।” तेखअ रही तामार आपणैं भाई अबशलोमा सेटा तिधी तेऊए घअरै दुखी अर तिंयां गल्ला डाही तैहा आपणैं दिलै दाबी।
ज़ांऊं राज़ै दाबेदा का थोघ लागअ कि इहअ हुअ, तेऊ निस्सअ रोश्शै उझ़ुई नां बेशी राम हई। अबशलोमै बी डाही अमनोना लै खास्सी ज़ीद किल्हैकि तेऊ किई ती ज़ोरा-ज़ोरी तेऊए च़ेई तामारे कुंआरी ज़िन्दगी खतम। सह निं तेऊ संघै तेखअ चिंजदअ ई आथी त।
अमनोन पाअ मारी
दूई साला बाद हुअ इहअ कि अबशलोमै मुनी एप्रैम नगरी नेल़ बाल-हसोर ज़ैगा आपणीं भेडा, तेऊ शादै राज़े सोभ टिक्कै तिधा लै। अबशलोम डेऊअ राज़ै दाबेदा सेटा लै संघा बोलअ इहअ, “माहा राज़अ, मेरै दास आसा मेरी भेडा मुनदै लागै दै। तम्हैं आपणैं कार-करिंदै संघै तेऊ थैरा लै एछणैं?”
राज़ै दाबेदै बोलअ अबशलोमा लै, “नांई बेटैआ, ज़ै हाम्हैं सोभै एछे, सह हणअ ताल्है खास्सअ सैप्पअ।” अबशलोमै लाअ खास्सअ ज़ोर पर राज़ै किअ एछणा लै नांईं अर तेखअ बोलअ राज़ै अबशलोम लै डेऊ।
पर अबशलोमै बोलअ इहअ, “ज़ै तम्हां नांईं एछणअ, तै मेरअ भाई अमनोन ता लाअ मुंह संघै छ़ाडी?”
दाबेद राज़ै बोलअ इहअ, “अह किल्है लाअ ताह संघै छ़ाडी?” पर अबशलोमै लाअ खास्सअ ज़ोर कि दाबेदै छ़ाडै खिरी अमनोन अर होर शोहरू अबशलोमा संघै।
अबशलोमै बणाईं राज़ै लै धाम। अबशलोमै डाहअ आपणैं नोकर-च़ाकरा का खोज़ी, “तम्हैं रहै चतैन, ज़ेभै अमनोन दाखो नशअ झुटी खास्सअ नशै दी होए, तेभै दैंऊं हुंह तम्हां लै शारअ कि एऊ पाआ मारी। तम्हैं निं फिकर करी, हुंह लऊं तेऊ मारने ज़िम्मैंबारी आप्पै। तम्हां लै बोलअ मंऐं, हिम्मत करै पिछ़ू निं हटी!” ज़िहअ अबशलोमै खोज़ी त डाहअ द, तेऊए नोकर-च़ाकरै किअ तिहअ ई संघा पाअ अमनोन मारी। होर राज़े टिक्कै ठुर्है तिधा का आपणीं-आपणीं खच़रा प्रैंदै बेशी बापस।
तिंयां थिऐ अज़ी बाता ई घअरा बाखा एछदै लागै दै, राज़ै दाबेदा का हेरअ कुंणी इहअ खोज़ी, “अबशलोमै पाऐ तेरै सोभ शोहरू मारी, तिन्नां मांझ़ै निं एक बी बच़अ!” दाबेद उझ़ुअ खल़अ अर तेऊ दुखै पाऐ तेऊ आपणैं झिकल़ै धेल़ी संघा बधल़ुअ आप्पू धरनीं। ज़ुंण राज़ै दाबेदा संघै तेऊए नोकर-च़ाकर थिऐ, तिन्नैं बी धेल़ै आपणैं झिकल़ै। पर दाबेदे भाई शिमेहे शोहरू जोनादाबै बोलअ, “राज़अ, मेरै मालक, तेरै सोभ शोहरू निं मारै आथी, तेऊ मारअ सिधअ अमनोन। ज़हा धैल़ी अमोनै ज़ोरा-ज़ोरी तामारा संघै सुत्ती तैहा लै दाग लाअ त, तधा ई ओर्ही ती अबशलोमै आपणैं दिलै अमनोना मारने डाही दी। माहा राज़अ, मेरै मालक, तैही निं ऐहा गल्ला दी विश्वास करी कि तेरै पाऐ सोभ शोहरू मारी, हुंह बोला भाल़ सिधअ अमनोन पाअ मारी।”
अबशलोम ठुर्हअ दाबेदे डरै
तेतरी गअ अबशलोम आप्पू ठुर्ही।
ज़ुंण सपाही एरुशलेम नगरीए गहल़ा सेटा पहरी थिऐ, तिन्नां का शुझुऐ उझै पछ़मा बाखा होथै धारे बाता खास्सै मणछ। तिन्नां मांझ़ै ठुर्हअ एक सपाही राज़ै का खोज़दअ, “माहा राज़अ, हाम्हां का शुझुऐ पिछ़िए बाता धारा बाती खास्सै मणछ एछदै।” तेखअ बोलअ जोनादाबै राज़ै लै, “भाल़ी बी, तिंयां आऐ तेरै शोहरू ज़िहअ मंऐं बोलअ त तिहअ ई हुअ।” ज़ेतरी जोनादाब गल्ला करी निं मुक्कअ, दाबेदे तिंयां शोहरू गऐ भितरी पुजी अर तिंयां लागै ज़ोरै-ज़ोरै लेरा लांदै अर राज़अ दाबेद अर तेऊए कार-करिंदै बी लागै हिक्की-सल़िक्की लेरा लांदै। 1
अबशलोम ठुर्हअ बच़णा लै संघा पुजअ गशूर नगरीए राज़ै अमीहूदे शोहरू तलमाई सेटा संघा रहअ चिई साला तैणीं तिधी। दाबेद रहअ आपणैं शोहरू अमनोना लै खास्सै धैल़ै तैणीं शोग करदअ लागी। पर ज़ांऊं अमनोने मौत हई मुक्की ती, ऐबै च़ाहा त राज़अ दाबेद आपणैं शोहरू अबशलोमा सेटा दिला का डेऊणअ।
Source notes (1)
- Cross-reference 2 शमू. 3:3
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.