2 शमूएल 7

नातान गूरो दाबेदा लै समाद

(1 इतिहास 17:1-15)

1राज़अ दाबेद रहा त आपणैं मैहलै अर बिधाता त सह तेऊए सोभी दुशमणा का बच़ाऊई डाहअ द। 2तेखअ बोलअ राज़ै नातान नाओंए गूरा लै, “इधी भाल़, हुंह आसा आप्पू केल़ुईए काठा करै बणाऐं दै मैहलै लागअ द रहंदअ पर बिधाते करारो मणशू आसा खिम्भा हेठै डाहअ द!”

3नातान गूरै दैनअ राज़ै लै ज़बाब, “ज़िहअ तेरअ दिल बोला तिहअ कर, किल्हैकि बिधाता आसा ताह संघै।”

4पर तैहा ई राची बोलअ बिधाता नातान गूरा लै, 5“डेऊ, तूह एछ मेरै दास दाबेदा लै बोली कि हुंह बिधाता बोला इहअ, ‘सह निं तूह आथी ज़हा मुंह रहणा लै भबन बणाणअं! 6ज़हा धैल़ी मंऐं इज़राईली मिसर देशा का काढी आणै, तधा ओर्ही आझ़ तैणीं रहअ हुंह खिम्भा दी एछदअ डेऊंदअ लागी, हुंह निं कोई खास भबनै रहअ। 7हुंह ज़िधी-ज़िधी बी आपणीं परज़ा इज़राईली संघै रहअ, मंऐं ज़ेतरै बी इज़राईली प्रैंदै प्रधान छ़ांटै, मंऐं निं तिन्‍नें कोही टोली का एही किछ़ै खरी खोज़ी कि तिन्‍नैं मुल्है केल़ुईए काठा करै भबन किल्है निं बणाअं।’

8“तूह खोज़ मेरै दास दाबेदा का, ‘स्वर्गे सारी सैने मालक बिधाता ज़हा का सारअ बल आसा, सह बोला इहअ कि मंऐं आणअ तूह भेडा-बाकरीए हेल़्ही फुआला बणां का एते तैणीं शादी, संघा बणाअं मंऐं तूह राज़अ कि मेरी परज़ा इज़राईली प्रैंदै राज़ करे। 9ज़िधी बी तूह एछदअ डेऊंदअ रहअ, हुंह रहअ कबल्‍लअ ताह संघै। मंऐं किऐ ताखा आजी तेरै दुशमण खतम। मंऐं किअ तूह संसारै बडै-बडै महान लोगा ज़िहअ मशूर। 10-11मंऐं बिधाता आसा आपणीं परज़ा इज़राईली लै एक ज़ैगा डाही दी अर तिंयां बसाऊंणै मुंह तैहा ज़ैगा। तिधी निं तेखअ तिंयां कोही हंतणैं। तैहा ज़ैगा पुजणैं बाद आऐ खास्सी बारी उपद्रभी लोग तिन्‍नां हारदै-मारदै, पर ऐबै निं इहअ भिई हणअ। मेरी रही ताल्है ज़बान कि तूह डाहणअ मुंह तेरै दुशमणा का बच़ाऊई अर ताल्है दैणीं मुंह खास्सी आद-लुआद। 12ज़ांऊं तूह खास्सअ प्रोढअ जाणअ हई, तेखअ डाहणअ तूह तेरै दादा-बाबा ई ज़िहअ दाबी। तेरअ एक शोहरू बणाणअं मुंह ताह बाद तेरी ज़ैगा राज़अ अर तेऊओ राज़ करनअ मुंह होर बी बलबान।1 13तेरअ सह शोहरू ई हणअ ज़हा मुल्है भबन बणाणअं अर तेरै खिंबै हणअ एक इहअ ज़सरअ राज़ सारी सदा रहणअ। 14तेऊओ बाब हणअ हुंह आप्पै अर सह हणअ मेरअ शोहरू। ज़ै सह गलती करे, तेऊ लै दैणीं मुंह आप्पै सज़ा ज़िहअ एक बाब करा।2 15पर हुंह निं तेऊ झ़ूरनै का पिछ़ू हटदअ ज़िहअ हुंह राज़ै शाऊला का पिछ़ू हटअ ज़ुण ताखा आजी राज़अ थिअ अर ऐबै किअ मंऐं सह दूर। 16तेरी आद-लुआद रहणीं बढदी लागी अर तेरअ राज़ हणअ सदा लै अटल़।’”3

17नातान गूरै खोज़ी दाबेदा का पठी गल्‍ला ज़ुंण बिधाता तेऊ का प्रगट किई ती।

दाबेदे प्राथणां

(1 इतिहास 17:16-27)

18तेखअ डेऊअ राज़अ दाबेद बिधाते खिम्भा भितरी अर करारे मणशू सेटा बेशी बोलअ इहअ, “मेरै मालक, तूह आसा पबित्र परमेशर, ज़ुंण बी तंऐं मुल्है किअ, हुंह निं तेता जोगी आथी त, नां मेरअ खिंब तेता जोगी आथी त। 19बिधाता, मेरै मालक, मेरै साबै किअ तंऐं मुल्है खास्सअ। पर तंऐं डाही आजू मेरी आद-लुआदा लै बी करार करी। पबित्र परमेशर बिधाता, तंऐं रहैऊई अह गल्‍ल मणछा का। 20हुंह ताल्है होर किज़ै सका बोली! ए बिधाता, मेरै मालक, हुंह आसा तेरअ दास अर ताखा आसा मेरै बारै पठी थोघ। 21अह किअ तंऐं तिहअ ज़िहअ तेरै दिलै त अर तंऐं किअ तिहअ, ज़िहअ तंऐं बोलअ त। तंऐं किऐ ईंयां महान काम कि मुखा थोघ लागे।

22“बिधाता, मेरै मालक तूह आसा पबित्र परमेशर, तूह आसा सोभी का महान! ताह ज़िहअ शुचअ निं कोहै आथी तूह आसा एक्‍कै परमेशर होर निं आथी ई। 23नां सारी धरती दी इज़राईला ज़िहअ होर देश आथी ज़ुंण तंऐं गलामी का छ़ड़ैऊई आपणीं खास परज़ा बणाऐं। ज़ुंण महान अर नुआहरै काम तंऐं तिन्‍नां लै किऐ, तेता करै हुअ तूह सारै संसारै मशूर। तंऐं काढै होरी देशे लोग अर तिन्‍नें देअ आपणीं परज़ा पजैल़णैं का आजी दरल़ाऊई ताकि तिधी तेरै आपणैं लोग बस्से ज़ुंण तंऐं मिसर देशे गलामी का आज़ाद करी आणै।4 24तंऐं बणाऐं इज़राईली सदा लै आपणीं खास परज़ा अर हे बिधाता, तूह हुअ सदा लै तिन्‍नों परमेशर।

25“ऐबै हे परमेशर बिधाता, ज़ुंण करार तंऐं मुंह अर मेरी आद-लुआदा संघै किई, तेता कर तूह सदा लै पाक्‍की अर तूह करै तिहअ ई ज़िहअ तंऐं बोलअ द आसा। 26तै रहणअ तेरअ नाअं सदा अर लोगा बोल़णअ सदा इहअ, ‘इज़राईला प्रैंदै आसा सह स्वर्गे सारी सैने मालक बिधाता ज़हा का सारअ बल आसा।’ मुंह तेरै दास दाबेदो खिंब डाहै तूह सदा अटल़। 27ए स्वर्गे सारी सैने मालक बिधाता, इज़राईले परमेशर, मुंह हुई ताखा एही अरज़ करने हिम्मत किल्हैकि तंऐं आसा मुंह तेरै दासा का सोभै गल्‍ला खोज़ी हेरी दी अर इहअ बी कि ताह बणाणैं मेरै खिंबा का राज़ै।

28“ऐबै हे मेरै मालक बिधाता, तूह आसा पबित्र परमेशर, तूह निं आपणीं ज़बानी का हुधदअ अर तंऐं आसा मुल्है अह ज़बान दैनी दी। 29ऐबै आसा ताखा मेरी अरज़ कि ऐबै दै खुशी-खुशी मेरै खिंबा लै बर्गत ताकि तूह सदा मुंह बाखा रहे। हे मेरै मालक बिधाता, तंऐं हेरअ इहअ ई करी अर तेरी बर्गत रहणीं मेरी आद-लुआदा लै सदा।”