2 शमूएल 11

दाबेदे भलै हुअ पाप

1ईंयां आसा च़ैत्रे गल्‍ला, खासकर ज़ेभै राज़ै जुधा लै निखल़ा तै। दाबेदै छ़ाडी आपणीं इज़राईले सारी सैना अर तिन्‍नें ज़िम्मैंबारी दैनी जोआब अर तेऊ संघे कार-करिंदै लै। तिन्‍नैं किई अमोनी लोगे सैना पठी बरैबाद संघा डाही तिन्‍नें राज़धानी रबाह नगरी फेर-फिरदी गोटी। दाबेद त आप्पू आपणीं राज़धानी एरुशलेम नगरी।1

2एकी धैल़ै हुअ इहअ कि सान्हां उझ़ुअ राज़अ दाबेद संघा निखल़अ आपणैं मैहलै बागै च़बारू लै संघा त तिधी हांढदअ-फिरदअ लागअ द। तिधा का शुझुई तेऊ का एक बेटल़ी आसा आपणैं घअरै बागा बाखा न्हैऊंदी लागी दी अर सह थिई हेरनी शुणनी बेघै बित्ती। 3दाबेदै छ़ाडअ आपणअ आदमी एही पुछ़-ज़ाच़ करना लै कि अह बेटल़ी कुंण आसा? तेथ खोज़अ कुंणी कि सह बेटल़ी आसा एलीआमे शोहरी बेतशेबा अर हित्ती उरियाहे लाल़ी। 4दाबेदै छ़ाडै तैहा आणदै दूत, तिन्‍नैं पजैल़ी सह राज़ै सेटा संघा सुत्तअ दाबेद तैहा संघै। सह थिई अज़ी तधू पै ज़ुठै झिकल़ै धोई शुची हुई दी। तेखअ डेऊई सह आपणैं घअरा लै बापस फिरी। 5तेखअ ज़ाण्हुंअ तैहा कि सह हुई सुंदी अर तैहा दैनअ राज़ै दाबेदा लै समाद।

6दाबेदै दैनअ आपणैं सैनापति जोआबा लै समाद, “हित्ती उरियाह छ़ाडै ओर्ही मुंह सेटा लै।” जोआबै छ़ाडअ उरियाह जुधा का घअरा लै। 7ज़ांऊं उरियाह दाबेद राज़ै सेटा पुजअ, दाबेदै पुछ़अ सह राज्ज़ी-खुशी, जोआब अर सारी सैनो अर जुधो हाल। 8तेखअ बोलअ उरियाह लै इहअ, “तूह डेऊ आपणैं घअरा लै संघा कर राम।” उरियाह निखल़अ राज़े मैहला का बागै अर पिछ़ू दैनी दाबेदै उरियाहे घअरा लै भैंट बी। 9पर उरियाह निं आपणैं घअरा लै डेऊअ, सह रहअ राज़े मैहलै प्रऊल़ी बागै पहरी संघै सुत्ती। 10ज़ांऊं दाबेदा का थोघ लागअ कि उरियाह निं आपणैं घअरै बेटल़ी सेटा डेऊअ, तेऊ पुछ़अ सह, “तूह आसा दूरा का खास्सै धैल़ै बाद घअरा लै आअ द! तूह आपणैं घअरा लै किल्है निं डेऊंदअ?”

11उरियाह दैनअ राज़ै दाबेदा लै ज़बाब, “इज़राईल अर यहूदा का आसा सैना जुधा लै खिम्भा हेठै रहंदी लागी दी, करारो मणशू बी आसा खिम्भा दी। मेरअ सैनापति जोआब अर तेऊ संघै होर कार-करिंदै बी आसा सऊंई ज़ैगा डेरै पाई जुधा लै। मेरै मालक, तै हुंह किहअ करै सका आपणैं घअरै डेऊई खाई-पिई आपणीं बेटल़ी संघै सुत्ती मौज़ करी? मंऐं खाऐ तेरै सोह कि हुंह निं इहअ करी ई सकदअ।”

12तेखअ बोलअ दाबेदै उरियाह लै, “तै रह आझ़ इधी अर काल्‍ला छ़ाडूं हुंह ताह बापस।” तैहा राची अर दुजै धैल़ै रहअ उरियाह एरुशलेम तिधी। 13तेखअ शादअ दाबेदै सह आप्पू सेटा संघा दैनअ तेऊ लै खास्सअ खाणां-पिणां लै एतरी शराब झुटणा लै कि तेऊ लागअ खास्सअ नशअ। पर तैहा बैल़ी बी निं उरियाह आपणैं घअरै बेटल़ी सेटा डेऊअ! सह सुत्तअ तिधी राज़े मैहले पहरी संघै आपणैं दोहल़ू प्रैंदै।

14दुजै धैल़ै लिखी दाबेदै च़िठी संघा दैनी उरियाहे हाथै कि एता दैऐ सैनापति जोआबा का। 15दाबेदै त तैहा च़िठी दी लिखअ द, “उरियाह डाहै जुधा लै सोभी का आगली लगैगा दी, ज़िधी घणअ जुध होए लागअ द अर आप्पू हटै होर तिधा का पिछ़ू, एऊ छ़ाडै कल्ही कि अह ज़खमी हई मरे।” 16जोआबै किई नगरी फेर राम्बल़ै करै ज़ाच़-भाल़ अर ज़िधी तेऊ का थोघ थिअ कि इधी आसा दुशमणे खास्सै बलबान शूरबीर, तिधी डाहअ तिन्‍नैं उरियाह। 17दुशमणे सैना निखल़ी नगरी बागै अर संघा लागअ जोआबे सैना संघै घणअ जुध। तिधी पाऐ दाबेदे कई जोधै दुशमणै मारी अर हित्ती उरियाह बी त तिन्‍नां मरनै आल़ै मांझ़ै।

18तेखअ छ़ाडअ जोआबै दाबेदा सेटा लै दूत कि जुधो पूरअ हाल खोज़े, 19तेऊ डाहअ दूता का इहअ खोज़ी, “ज़ेभै तूह राज़ै का जुधो पूरअ हाल खोज़ी मुक्‍के, 20ज़ै ताखा राज़अ इहअ पुछ़े, ‘तम्हैं दुशमणा संघै जुधा करदै तिन्‍नें नगरी खास्सै नेल़ किल्है डेऊऐ? तम्हां एही समझ़ निं आथी कि तिंयां सका गहल़ा पिछ़ू का तम्हां लै कतीरै बाही? 21तम्हां आद निं रही कि जेरूबशेतो शोहरू अबीमोलक तेबेस नगरी कुंणी मारअ त? तेऊ प्रैंदा लै शोटअ त एकी बेटल़ी उझै कोठी का नाज़ा पिशणैंओ थरेट संघा हुअ सह तिधी मरी हक्‍क। तेखअ किल्है डेऊऐ तम्हैं नगरी एतरै नेल़?’ तै बोलै तूह राज़ै लै इहअ, ‘तेरअ दास हित्ती उरियाह बी मूंअ तेऊ जुधा दी।’”2

22सह दूत पुजअ दाबेद राज़ै सेटा तेखअ खोज़ी तिंयां पठी गल्‍ला ज़िहअ जोआबै तेऊ का खोज़ी त डाहअ द। 23तेऊ दूतै बोलअ दाबेदा का इहअ, “म्हारै दुशमण तै तिधी हाम्हां का खास्सै बलबान, तिंयां आऐ हाम्हां संघै मकाबलै लै नगरी बागै सरलै दी अर हाम्हैं खद्रेल़ै तिंयां पिछ़ू नगरीए प्रऊल़ी तैणीं। 24माहा राज़अ, तिधी बाही तिन्‍नैं हाम्हां लै गहल़ा पिछ़ू का कतीरै अर म्हारै पाऐ कई जोधै मारी अर तिन्‍नां संघै पाअ तेरअ दास हित्ती उरियाह बी मारी!”

25दाबेद राज़ै दैनअ तेऊ दूता का जोआबा लै बापस समाद, “जोआबा लै दैऐ इहअ हैअ, ‘ऐहा गल्‍ला पिछ़ू निं दुखी हई, एतो थोघ निं हंदअ कि जुधा दी कुंण मरनअ। तूह लाऐ नगरीए गहल़ा ढोल़णा लै दुगणअ ज़ोर संघा कर तेथ कबज़अ।’”

26ज़ांऊं उरियाहे बेटल़ी बेतशेबा का थोघ लागअ कि तेसो मर्ध मूंअ जुधा दी, सह लागी तेऊ लै हिक्‍का पटाक्‍की लेरा लांदी। 27ज़ांऊं तेसे शोगे धैल़ै मुक्‍कै, दाबेदै शादी सह आपणैं मैहला लै संघा डाही सह आप्पू लै बेटल़ी। तैहा का हुअ एक शोहरू पर बिधाता निं दाबेदे एऊ कामां का खुश आथी त।