2 करिन्थी

2 करिन्थी

करिन्थ नगरीए विश्वासी टोली लै दुजी च़िठी

भेत

लिखणैं आल़अ: पल़सी

पहल़णैं आल़ै: करिन्थ नगरीए विश्वासी

सन: 56

ज़धू करिन्थ रहणैं आल़ै विश्वासी लै शधाणूं पल़सीए दुजी च़िठी लिखी ती, तधू नांईं तै पल़सी अर करिन्थ नगरीए विश्वासीए टोली मांझ़ै मेल़-ज़ोल़ ठीक आथी। टोलीए कई लोगै लाऐ तै पल़सी लै ज़ाणीं भुझ़ी करै सिधै साबै कई दोश, पर पल़सी करा मेल़-ज़ोल़ करने आपणीं पाक्‍की च़ाहा प्रगट अर ज़िहअ सह च़ाहा त ज़ांऊं तिहअ हआ, तैहा गल्‍ले आपणैं दिला दी खास्सै नंदा बी करा सह प्रगट।

पैहलै करा ऐहा च़िठी दी पल़सी विश्वासीए टोली संघै आपणैं रिश्तै दी बच़ार, संघा समझ़ाऊआ तिन्‍नां सह इहअ कि तेऊ किल्है किअ विश्वासीए टोली दी बेइज़ती अर बरोध करनै ज़िहअ काठअ बर्ताअ, अर ऐहा गल्‍लो नंद करा सह प्रगट कि तेऊए काठै हणैंओ फल हआ विश्वासीए टोली दी पछ़ताअ अर मेल़-ज़ोल़। तेखअ करा सह विश्वासीए टोली का यहूदा दी रहणैं आल़ै गरीब विश्वासी मसीही भाई लै झींण-धर्मां दी रही दान दैणें अरज़। खिरीए धैऊआ दी करा पल़सी करिन्थ नगरी दी रहणैं आल़ै किछ़ लोगो शधाणूंओ बरोध ज़ुंणी आप्पू लै आप्पै ई असली शधाणूं हणें पदबी दैनी ती। पल़सी लै लाआ तै तिंयां झ़ुठै हणैंओ दोश।

पल़सी खोज़ा ऐहा च़िठी दी मणछा संघै नऊंईं करारे बारै। पल़सी बोला इहअ कि सह रहणअ लोगा परमेशरा सेटा आणना लै शुचअ-पाक्‍कअ, च़ाऐ तेता पिछ़ू तेऊ लै घोर आफ़ता पल़े अर तेऊ आपणीं ज़ान बी किल्है निं लागे दैणीं। पल़सी बोला इहअ कि म्हारअ परमेशरा नेल़ एछणअ हुअ मसीहा करै:

“ईंयां सोभै गल्‍ला आसा परमेशरा बाखा का, ज़ुंणी मसीहा करै हाम्हैं आप्पू सेटा लै मेल़-ज़ोल़ करी बापस आणै, अर परमेशरा सेटा होरी मेल़-ज़ोल़ करी बापस फरेऊंणे च़ाकरी आसा तेऊ हाम्हां लै दैनी। मतलब परमेशरै हेरै मसीहा करै आप्पू संघै संसारो बी मेल़-ज़ोल़ करी, अर ज़ुंण मणछै पाप बी किऐ, तेतो बी निं तिन्‍नां लै दोश लाअ आथी अर परमेशरै आसा हेरअ द अह मेल़-ज़ोल़ करनैओ समाद हाम्हां का सभाल़ी।”

(5:18,19)

कताबे बांड

भेत 1:1-11

पल़सी अर करिन्थ नगरीए विश्वासीए टोली 1:12—7:16

यहूदा रहणैं आल़ै विश्वासी लै दान 8:1—9:15

पल़सीओ शधाणूंए रुपै आपणैं हके गल्‍ल करनी 10:1—13:10