Kulvi Outer Seraji Bible
2 करिन्थी 13
खिरी चतैनगी दैणीं
ऐबै एछणअ मुंह चिऊथी बारी इना गल्ले फैंसलै करदअ तम्हां सेटा लै ज़िहअ पबित्र शास्त्र बोला, “हर गल्लो फैंसलअ करनअ दूई या चिई शाजत सम्हनै।”1
ज़धू हुंह दुजी बारी तम्हां सेटा लै आअ तधू तै हाम्हैं चअन ज़ण्हैं, तधू हेरअ त मंऐं बोली कि मुंह दैणीं तिन्नां लै सज़ा ज़ुंण तम्हां मांझ़ै कबल्लै पाप करनै आल़ै मणछ आसा। ऐबै दैआ हुंह भिई तिन्नां लै अर होरी सोभी लै भिई चतैनगी कि हुंह अज़ी बी तम्हां का दूर, ज़ेभै हुंह भिई तम्हां सेटा लै एछे तेभै निं तिन्नां हुंह छ़ाडी गअ।
मुंह दैणैं तम्हां लै तेते सोभै सबूत ज़ुंण तम्हैं च़ाहा कि ईशू बोला मुंह बाती। मसीहा निं दुबल़अ आथी पर तेऊ हेरनी आपणीं शगती तम्हां का रहैऊई ज़ेभै तम्हां तेऊओ सम्हनअ पल़े करनअ। सह कमज़ोरीए बज़्हा क्रूसा प्रैंदै, छ़ड़ाऊअ, ता, तैबी आसा परमेशरे शगती करै ज़िऊंदअ। हाम्हैं बी आसा देही दी मसीहा ज़िहै दुबल़ै पर ज़ेभै हाम्हैं थारअ सम्हनअ करे तेभै हणैं हाम्हैं तेऊ संघै ज़िऊंदै अर हाम्हां का हणीं तेभै परमेशरे शगती।
तम्हैं दैआ आप्पू भाल़णीं कि तम्हैं असली दी विश्वासा दी आसा कि नांईं आथी। कै तम्हां का आपणैं बारै थोघै ई निं आथी कि ईशू मसीहा आसा तम्हां दी? नांईं ता आसा तम्हैं परखा दी निक्कै निखल़ै दै। पर मेरी आशा आसा कि तम्हां का जाणअ थोघ लागी कि हाम्हैं निं निक्कै आथी।
हाम्हैं करा परमेशरा का एही अरज़ कि तम्हैं निं लोल़ी किछ़ै कदुष्ट काम किअ। हाम्हैं निं ऐहा गल्ला रहैऊंणा लै प्राथणां करदै कि ज़ुंण मसीहे च़ाकरी हाम्हैं तम्हां मांझ़ै किई तेथ हुऐ हाम्हैं सफल, पर हाम्हैं च़ाहा इहअ कि तम्हैं तेता करे ज़ुंण भलअ आसा। ज़ै हाम्हैं सफल हंदै नांईं बी शुझिए, तैबी च़ाहा हाम्हैं कि तम्हैं लोल़ी सफल हुऐ। किल्हैकि हाम्हैं निं सत्ते खलाफ किछ़ बी करी सकदै, पर सत्ता लै सका सोभ किछ़ करी। ज़ेभै हाम्हैं दुबल़ै आसा, अर तम्हैं आसा जोधै, हाम्हैं हआ खुश, अर एही अरज़ करा कि तम्हैं लोल़ी विश्वासा दी पाक्कै हुऐ।
तैही आसा हुंह तम्हां सेटा एछणैं का आजी पिठी पिछ़ू इना गल्ला लिखदअ लागअ द। ताकि ज़ुंण हक मुल्है प्रभू आसा दैनअ द तेता करै मुंह तम्हां लै सज़ा नां दैणीं पल़े। हुंह निं तेऊ हका डाही करै थारअ विश्वास खतम करनअ च़ाहंदअ पर हुंह च़ाहा कि तम्हैं विश्वासा दी पाक्कै होए।
राज्ज़ी-खुशी
ऐबै ए मेरै भाईओ, नंद रहा, अर सिध्द रहा हंदै लागी, एकी-दुजै लै दैआ हैअ अर आप्पू मांझ़ै डाहा एक मन्न अर मेल़-ज़ोल़। झ़ूरी अर शांती दैणैं आल़अ परमेशर हणअ तम्हां संघै।
एकी-दुजै लै दैआ मल़्हैची दैई राज्ज़ी-खुशी। मसीहा ईशूए सोभी पबित्र लोगा बाखा का तम्हां सोभी लै राज्ज़ी-खुशी।
प्रभू ईशू मसीहो जश अर परमेशरे झ़ूरी अर पबित्र आत्मां लोल़ी सदा तम्हां संघै रही।
Source notes (1)
- Cross-reference बधा. 19:15
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.