Kulvi Outer Seraji Bible
गलाती 1
पल़सीए राज्ज़ी-खुशी
हुंह पल़सी ज़ुंण शधाणूं आसा, हुंह निं कहा मणछा बाखा या कहा मणछे बोलै शधाणूं आथी। पर हुंह आसा मसीहा ईशू अर तेऊ परमेशरै शधाणूं छ़ांटअ द ज़ुंणी ईशू मरी करै भिई ज़िऊंदअ किअ। सोभै विश्वासी भाई-बैहण ज़ुंण मुंह संघै इधी आसा, हाम्हैं लिखी अह च़िठी
गलात मुल्खे विश्वासी टोलीए सोभी भाई-बैहणी लै।
म्हारै बाब परमेशर अर प्रभू ईशू मसीहा का आसा मेरी एही अरज़ कि तम्हां सोभी लोल़ी झींण अर शांती सदा हुई। मसीहा ईशू हुअ म्हारै बाब परमेशरे मरज़ी करै म्हारै पापा लै बल़ीदान ताकि हाम्हां एऊ संसारे कदुष्ट मणछा मांझ़ा का बच़ाऊए। हुंह करा प्राथणां कि लोग लोल़ी परमेशरे स्तोती अर बड़ैई लोल़ी जुगै-जुगै करदै रहै। एवमस्तू।
एता छ़ाडी निं होर खुशीओ समाद आथी
मुंह हआ ऐहा गल्ले रहैनी कि ज़ुंणी परमेशरै तम्हैं मसीहे झींणा करै शादै, तेऊ का लागै तम्हैं एतरै छ़ेक्कै पिठ फरेऊई करै होरी खुशीए समादा दी विश्वास करदै ज़ेता लै कई इहअ बोला कि अह आसा खुशीओ। असली खुशीओ समाद आसा एक्कै ई, पर गल्ल आसा एही कि कई लोग आसा इहै, ज़ुंण तम्हां डरैऊआ, अर तिंयां च़ाहा मसीहे खुशीए समादा बगाल़णअ।
पर ज़ुंण खुशीओ समाद तम्हां का आसा खोज़अ द, ज़ै तम्हां लै स्वर्ग दूत बी तेऊ खुशीए समादा छ़ाडी किज़ै होर खुशीओ समाद खोज़े, परमेशरै लोल़ी तिन्नां लै फिटक लाअ। ज़िहअ मंऐं तम्हां का पैहलै बी आसा खोज़ी हेरअ द, तिहअ ई बोला हुंह आझ़ बी कि ज़ुंण खुशीओ समाद तम्हां का मंऐं आसा खोज़दअ द, तेऊ छ़ाडी ज़ै कुंण किज़ै होरी रंगो खुशीओ समाद खोज़ा ज़ुंण तेऊ खुशीए समादा संघै मेल़-ज़ोल़ नांईं खांदअ ज़ेता तम्हैं विश्वास करा, हुंह करा परमेशरा का अरज़ कि तेऊ लै दैऐ सज़ा।
हुंह निं असली दी मणछा खुश करदअ आथी लागअ द पर हुंह च़ाहा परमेशरा खुश करनअ। ज़ै हुंह अज़ी बी परमेशरा छ़ाडी मणछा खुश करदअ रहअ हंदअ, तै निं हुंह मसीहा प्रभूओ दास हंदअ त।
पल़सी किहअ करै बणअ शधाणूं
भाईओ, हुंह दैआ तम्हां का खोज़ी कि ज़ुंण खुशीओ समाद मंऐं तम्हां का खोज़अ द आसा, सह निं मणछै आथी बणाअं द। किल्हैकि सह निं मंऐं आपणैं दादू बाबा का आथी शूणअ द, अर नां हुंह कुंणी होरी मणछै सखाऊअ, पर सह किअ मसीहा ईशू मुखा प्रगट।
तम्हां का आसा थोघ कि हुंह यहूदी धर्म-बिधी केही तत्त-दिला का मना थिअ, अर परमेशरे टोली विश्वासी टोली हुंह किहअ नर्दैई हई हंता अर बरैबाद करा थिअ। म्हारै दादा-बाबे रिती-रबाज़ मनणा लै निं मेरी अमरे कोह यहूदी मेरअ मकाबलअ करी सकदै तै, हुंह थिअ सोभी का आजू।
पर परमेशरै थिअ हुंह आपणीं च़ाकरी करना लै मेरी माए ओदरा ई का छ़ांटअ द। तेऊ बणाअं छ़ांटी करै हुंह आपणअ दास किल्हैकि सह आसा खास्सअ झणैल़ू।1 तेऊ परमेशरै खोज़अ मुखा कि ईशू आसा तेऊओ पूत, तेऊ किअ इहअ एते तैणीं कि हुंह होरी का तेऊओ खुशीओ समाद तिन्नां ज़ैगा खोज़ूं ज़िधी होरी ज़ातीए लोग रहा।
पर हुंह निं तेभी एऊ खुशीए समादे बारै सलाह लणा लै कहा होरी कोही मणछा सेटा डेऊअ। नां हुंह एरुशलेम नगरी लै तिन्नां सेटा लै डेऊअ ज़ुंण मुखा पैहलै शधाणूं तै, पर तेभी डेऊअ हुंह अरब देशा लै अर तिधा का आअ दमिश्क नगरी लै बापस।
तेखअ चिई साला बाद डेऊअ हुंह पतरासा का मिलदअ एरुशलेम नगरी लै अर तेऊ सेटा रहअ पंद्रा धैल़ै तैणीं तिधी। मुंह भेटअ तिधी सिधअ प्रभूओ भाऊ एरुशलेम रहणैं आल़ै विश्वासीओ सैणअ याकब पर होर शधाणूं निं मुंह तिधी भेटै। हेरा ज़ुंण गल्ला हुंह तम्हां लै लिखा तिन्नां लिखा हुंह इहअ समझ़ी कि परमेशर आसा हाम्हां मांझ़ै, ईंयां गल्ला निं झ़ुठी आथी।
एरुशलेम नगरी हांढ दैई आअ हुंह सिरीया अर किलकिआ मुल्खै। पर यहूदा मुल्खे विश्वासीए टोली ज़ुंण मसीहा दी थिई, तिन्नैं निं हुंह पैहलै आथी त भाल़अ द। पर तिंयां शूणां तै इहअ कि ज़ुंण हाम्हां विश्वासी पैहलै दुख तकलिफ दैआ त, सह खोज़ा ऐबै तेऊ ई विश्वासे बारै खुशीओ समाद, ज़हा मसीहे बारै सह होरी विश्वास करनै का रोक्का त। तिन्नैं किअ परमेशरो शूकर किल्हैकि परमेशरै बणाअं हुंह लोगा लै दुख तकलिफी दैणैं आल़ै का बदल़ी करै मसीहा पिछ़ू हांढणै आल़अ।
Source notes (1)
- Cross-reference ईशा. 49:1,5; जेर. 1:5
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.