गलाती 2

होरी शधाणूं पल़सी मनणअ

1च़ौदा साला बाद डेऊअ हुंह बरनबासा संघै भिई एरुशलेम नगरी लै अर तितस बी निंयं संघा। 2परमेशरै रहैऊई मुखा अह गल्‍ल कि मुंह लागणअ एरुशलेम नगरी डेऊणअ अर तैही डेऊअ हुंह, ज़ुंण खुशीओ समाद हुंह होरी ज़ाती लै प्रच़ार करा, तिंयां सोभै गल्‍ला खोज़ी मंऐं बाढै तिन्‍नां का, पर खोज़अ मंऐं ज़ुदअ ज़िहअ हई तिन्‍नां ई का ज़ुंण तिन्‍नां मांझ़ै बडै सैणैं तै, ताकि इहअ निं होए कि ज़ुंण मंऐं आझ़ तैणीं मैन्थ किई या ज़ुंण मुंह आजू करनअ सह ज़ांऐं नां होए।

3तितस ज़ुंण मुंह संघै त, सह थिअ यूनानी मणछ अर नां तेऊओ खतैर आथी त हुअ द। सह मनअ एरुशलेम टोलीए सैणैं बी, तिन्‍नैं निं तेऊ लै ज़ोरा-ज़ोरी खतैर करना लै बोली। 4इनै यहूदी मांझ़ा का आऐ दै मसीहा दी विश्वास करनैओ दखाअ करनै आल़ै किई तितसे खतैर करने बारै खास्सी हठ। ईंयां एछा म्हारी टोली दी च़ुप्प-च़ुप्पै अर ईंयां च़ाहा मसीहा दी हाम्हां भेटी दी तैहा आज़ादी खतम करनअ ताकि हाम्हैं भिई यहूदी बधाने गलाम बणें! 5हाम्हैं शधाणूं निं एकी धख बी तिन्‍नां दखाअ करनै आल़ै विश्वासी भाईए गल्‍ला मनी ताकि तम्हैं खुशीए समादे सत्ता दी बणी रहे।

6ज़ुंण तिंयां एरुशलेम टोली दी सैणैं थिऐ तिन्‍नैं निं मेरी शिक्षा दी होर किछ़ै गल्‍ल ज़ोल़ी। एते निं मुंह किछ़ै फिकर आथी कि तिंयां सैणैं किज़ै आसा किल्हैकि परमेशर निं बाघलअ रूप भाल़ी फैंसलअ करदअ।1

7पर ज़ांऊं तिन्‍नैं सैणैं भाल़अ कि ज़िहअ यहूदी मणछा लै खुशीए समादो काम पतरासा का सभाल़अ द आसा, तिहअ ई आसा होरी ज़ातीए लोगा लै खुशीए समादा खोज़णेंओ काम मुखा सभाल़अ द। 8अह आसा इहअ ई ज़ुंणी परमेशरै पतरास यहूदी मांझ़ै परमेशरे खुशीए समादा पजैल़णां लै शधाणूं बणाअं तेऊ ई बणाअं हुंह बी होरी ज़ातीए बाझ़ी खतैर आल़ै लोगा मांझ़ै खुशीए समादा पजैल़णां लै शधाणूं।

9ज़हा मणछा टोलीए थाम्ह मना, मतलब-याकब, पतरास अर जोहन्‍ना, तिन्‍नैं बछ़ैणअ सह बरदान ज़ुंण मुल्है परमेशरै दैनअ। तिन्‍नैं मनै हुंह अर बरनबास आपणैं संघी काम करनै आल़ै। तिन्‍नैं दैनअ हाम्हां लै होरी ज़ाती मांझ़ै खुशीए समादा खोज़णा लै होर बी हैअ अर आप्पू रहै तिंयां यहूदी मणछा मांझ़ै काम करदै लागी। 10तिन्‍नैं किई हाम्हां का सिधी एही अरज़ कि गरीबो डाहै धैन-खैल अर अह ती एही गल्‍ल ज़ेता हुंह पैहलै ई का च़ाहा त करनअ।

पल़सी किअ पतरासो बरोध

11पर ज़ांऊं पतरास अन्ताकिया लै आअ, मंऐं बोलअ तेते बारै तेऊए मुंहैं ज़ुंण तेऊ गलत किअ त।2

12किल्हैकि ज़ांऊं पतरास सोभी का आजी अन्ताकिया आअ, तधू खाई तेऊ होरी ज़ाती का विश्वासा दी आऐ दै लोगा संघै रोटी ज़सरअ खतैर निं आथी हुअ द। तेखअ बादा का ज़ांऊं याकबा बाखा यहूदी विश्वासी अन्ताकिया आऐ, तेखअ पाई तेऊ होरी ज़ातीए लोगा मांझ़ै खाणैं-पिणें छ़ाड़। सह डरअ तिन्‍नां लोगे बरोधा का ज़ुंण लोग इहअ बोला तै कि खतैर करनअ आसा ज़रूरी।3

13तेतो नतिज़अ हुअ इहअ कि होरी यहूदी विश्वासी बी किअ पतरासा ज़िहअ कपट, इधी तैणीं कि बरनबासै बी किअ तिहअ ई ज़िहअ पतरासै किअ।

14पर ज़ांऊं मंऐं भाल़अ कि तिन्‍नों च़ाल-च़लण निं खुशीए समादे शुची शिक्षे साबै आथी, मंऐं बोलअ सोभी नदरी पतरासा का, “ज़ै तूह यहूदी हई बी यहूदी बधाना नांईं मंदअ अर होरी ज़ाती ज़ेही काटा तूह आपणीं ज़िन्दगी! तै किल्है बोला तम्हैं इना होरी ज़ातीए लोगा लै यहूदी रिती-रबाज़ मनणा लै?”

विश्वासा करै धर्मीं हणअ

15“तम्हैं अर हाम्हैं आसा हुऐ ज़ल्मां ओर्ही यहूदी, अर होरी ज़ाती ज़िहै ‘पापी’ मांझ़ा का निं आथी। 16ज़ै हाम्हां का थोघ आसा कि मणछ हआ मसीहा ईशू दी विश्वास करी परमेशरा संघै धर्मीं, बधान मनी धर्मीं निं सह हंदअ। हाम्हैं किअ मसीहा ईशू दी विश्वास अर तेता करै हुऐ हाम्हैं परमेशरा संघै धर्मीं, हाम्हैं निं बधान मनी धर्मीं हुऐ। कोहै निं बधाना मनी परमेशरा संघै धर्मीं हणअ।”4

17कई यहूदी सोठा इहअ कि हाम्हैं किअ पाप किल्हैकि हाम्हैं किअ धर्मीं हणां लै बधाना छ़ाडी सिधअ मसीहा ईशू दी विश्वास। एतो मतलब निं इहअ आथी कि मसीहा बणाआं हाम्हां पापी! इहअ निं हई सकदअ। 18ज़ै हुंह अज़ी बी इहअ विश्वास करूं कि परमेशरा सेटा धर्मीं हणअ हुंह बधान मनी! तै हणअ हुंह तेऊ मणछा ज़िहअ ज़ुंण आप्पै ढोल़ै दै घअरा भिई तिहै ई च़िणां। इहअ करै शुझणअ सोभी का कि हुंह निं परमेशरो बधान मंदअ त। 19पर परमेशरे बधानै रहैऊअ मुखा कि हुंह निं बधाने सोभी बिधी पूरअ करी सकदअ। तिहअ करै थिअ हुंह मूंऐं दै मणछा ज़िहअ, तिन्‍नां सूल अर बिधी का आज़ाद। मतलब ऐबै सका हुंह परमेशरा लै ज़िऊई।

20ऐबै आसा मेरी पराणीं ज़िन्दगी मसीहा संघै क्रूसा दी छ़ड़ाऊई दी अर ऐबै निं हुंह ज़िऊंदअ रहअ पर मसीहा आसा मुंह दी ज़िऊंदअ। हुंह ज़ुंण देही दी ऐबै ज़िऊंदअ आसा, हुंह आसा सिधअ तेऊ विश्वासा संघै ज़िऊंदअ, ज़ुंण परमेशरे पूता दी आसा, ज़ुंणी मुल्है झ़ूरी किई, अर मेरी तैणीं आपणीं ज़ान दैनी। 21हुंह निं परमेशरे जशा बृथा समझ़दअ किल्हैकि, ज़ै बधाना करै धर्मीं हंदै तै निं मसीहा क्रूसा दी मरने ज़रुरत आथी ती।